శత్రు దేశంలో బ‌య‌ట‌ప‌డ్డ భారీ బంగారు నిక్షేపాలు

ఇటీవ‌ల పాకిస్తాన్ భూభాగంలో హిమాల‌యాల‌లో భారీ బంగారు నిక్షేపాల‌ను క‌నుగొన్నార‌ని, ఈ బంగారంతో పాకిస్తాన్ ప్ర‌పంచ‌బ్యాంక్ అప్పు స‌గం తీరిపోతుంద‌ని ప్ర‌చార‌మైంది. అయితే ఇప్పుడు చైనాలో బంగారు నిక్షేపాలు బ‌య‌ట‌ప‌డ్డాయి. వేల కోట్ల‌ డాల‌ర్ల‌ విలువైన ఒక భారీ బంగారు నిక్షేపాన్ని భూవిజ్ఞాన శాస్త్రవేత్తలు కనుగొన్నారు

చైనా భూభాగంలోని హునాన్ ప్రావిన్స్‌లోని పింగ్జియాంగ్ కౌంటీలోని వాంగు బంగారు క్షేత్రం దిగువ‌న ఈ కొత్త గ‌ని బ‌య‌ట‌ప‌డింది. దాదాపు 1000 మెట్రిక్ టన్నుల కంటే ఎక్కువ బంగారం ఉండవచ్చని అంచ‌నా. 300 టన్నుల బంగారానికి సంబంధించిన ఆన‌వాళ్లు ఇక్క‌డ ఇంత‌కుముందే బ‌య‌ట‌ప‌డ్డాయి. దాదాపు 2000 మీటర్ల భూగర్భంలో ఇప్పుడు మ‌రో కొత్త గ‌నిని చైనా భూవిజ్ఞాన శాస్త్రవేత్తలు క‌నుగొన్నారు. ఇప్పటివరకు బ‌య‌ట‌ప‌డ్డ‌ అతిపెద్ద బంగారు గ‌నుల‌లో ఇది ఒకటి. దీని విలువ దాదాపు 600 బిలియన్ యువాన్లు. 21 డిసెంబర్ 2025 నాటికి దీని విలువ‌ సుమారు 8000 కోట్ల డాల‌ర్లు ఉంటుంద‌ని అంచనా.

ఇది కేవ‌లం అంచ‌నా మాత్ర‌మే. ప్రారంభ వనరుల అంచనాలు డ్రిల్లింగ్, కోర్ లాగింగ్, మోడలింగ్‌పై ఆధారపడి ఉంటాయి. నిధి విలువ ఇంకా పెర‌గ‌వ‌చ్చు లేదా త‌గ్గ‌వ‌చ్చ‌ని కూడా చెబుతున్నారు. ఇది ప్ర‌పంచంలో అతి పెద్దది అవ్వొచ్చు.. అవ్వ‌క‌పోవ‌చ్చు.. అంటూ పరిశోధకులు చెబుతున్నారు. హునాన్ ప్రావిన్స్‌లోని జియోలాజికల్ బ్యూరో ప్రకారం.. భూవిజ్ఞాన శాస్త్రవేత్తలు దాదాపు 2000 మీటర్ల లోతులో 40 కంటే ఎక్కువ బంగారు పొర‌ల‌ను గుర్తించారు. 3D మోడలింగ్‌ను ఉపయోగించి దాదాపు 3000 మీటర్ల వరకు ఖనిజీకరణను అంచనా వేశారు.

లోతైన గనులు వేడిగా ఉండే రాతి నిర్మాణాల‌తో సంక్లిష్టమైన వెంటిలేషన్, బలమైన నేల పీడనాలు, గాలిని కదిలించడానికి.. పని ప్రదేశాలను చల్లబరచడానికి అధిక ఒత్తిడిని ఎదుర్కొంటాయి. గని శక్తి వినియోగంలో వెంటిలేషన్ దాదాపు 40 నుండి 80 శాతం ఉంటుందని మైనింగ్ పరిశ్రమ చెబుతోంది. బంగారు తవ్వకాలతో ముడిపడి ఉన్న ప్రపంచ గ్రీన్‌హౌస్ వాయు ఉద్గారాలు సంవత్సరానికి 100 మిలియన్ టన్నుల CO2 మొత్తాన్ని మించిపోతాయని పరిశోధన వెల్ల‌డించింది. ఉద్గారాల తీవ్రత ఆయా దేశాలు, వాటి కార్యకలాపాలను బట్టి విస్తృతంగా మారుతుంది. అయితే భూమి పొర‌లలో లోతుల్లోకి వెళ్లి గ‌నుల‌ను అన్వేషించ‌డం ప్ర‌పంచానికి చాలా పెద్ద ప్ర‌శ్న‌ల‌ను లేవ‌నెత్తుతుంద‌ని సైంటిస్టులు చెబుతున్నారు.

వాంగు క్షేత్రం జియాంగ్నాన్ ఒరోజెన్‌లో ఉంది. ఇది పురాతన కాలంలో వాతావ‌ర‌ణ‌ ఘర్షణలు, లోపాల నుండి ఏర్పడిన బెల్ట్.. ఇక్క‌డ‌ వేడి ద్రవాలు బంగారు గ‌నులు ఏర్ప‌డ‌టానికి కార‌ణం. ఈశాన్య హునాన్‌ను జియాంగ్నాన్ ప్రాంతంలో అత్యంత ముఖ్యమైన బంగారు గ‌నుల‌ ప్రాంతంగా రికార్డులు ఉన్నాయి. తాజా ప్రకటనకు ముందే వనరులు ఈ ప్రాంతంలో 315 టన్నులకు మించి ఉన్నాయి.