విజయ్ పార్టీకి అన్ని సీట్లా.. నిజమేనా ?

దళపతి విజయ్ టీవీకే పార్టీకి గెలుపు అవకాశాలు ఉన్నాయని ఒకే ఒక్క సంస్థ యాక్సెస్ మై ఇండియా స్పష్టం చేసింది. ఆ సంస్థ కూడా 98 నుంచి 120 మధ్యలో వస్తాయని చెప్పింది. తమిళనాడు ఎన్నికల్లో ఏ రాజకీయ పార్టీ అయినా గెలిచి అధికారం చేపట్టాలి అంటే మొత్తం 234 అసెంబ్లీ సీట్ల సగానికి ఒకటి కలిపితే వచ్చే మ్యాజిక్ ఫిగర్ అయిన 118 సీట్లు సాధించాల్సి ఉంటుంది. యాక్సిస్ మై ఇండియా కూడా బొటాబొటీ కటా కటీ 120 దాకా గరిష్టంగా విజయ్ పార్టీకి వస్తాయని ఒక అంచనాగా వేసింది. ఇక 98 నుంచి అని కనిష్టమైన నంబర్ కూడా చెప్పింది. 98 సీట్లు వస్తే అధికారానికి 20 సీట్ల కొరత పడుతుంది.

తదుపరి సీఎం అంటూ :

ఇక కేవలం యాక్సిస్ మై ఇండియా మాత్రమే ఈ సర్వే చేసి 120 నంబర్ చెప్పింది. మిగిలిన సర్వే సంస్థలు వేటికీ విజయ్ పార్టీ టీవీకే ప్రభావం కానీ ప్రభంజనం కానీ కనబడలేదా అన్న చర్చ మరో వైపు ఉంది. ఇవన్నీ ఇలా ఉంటే ఏకంగా టీవీకే పార్టీ అయితే తమ పార్టీ బ్రహ్మాండమైన మెజారిటీతో గెలిచినట్లే అని తమ నాయకుడు విజయ్ కాబోయే సీఎం అని కడు ధీమాగా చెబుతోంది. ఇక తమకు వచ్చే సీట్లు కూడా ఒకనాడు జయలలిత కరుణానిధి ఎంజీఆర్ లు సృష్టించిన ప్రభజనం మాదిరిగా వస్తాయని చెప్పడం గమనార్హం.

అలాంటి పరిస్థితి ఉందా :

తమిళనాడు ఎన్నికల్లో టీవీకే 180 నుంచి 200 దాకా సీట్లను గెలుచుకుంటుందని టీవీకే నాయకులు తాజాగా ప్రకటించారు. తదుపరి ప్రభుత్వాన్ని తమిళనాడులో తామే ఏర్పాటు చేస్తామని టీవీకే నేతలు గట్టిగానే చెబుతున్నారు. మా నాయకుడు విజయ్ సీఎంగా ప్రమాణం చేస్తారు అని వారు ఇప్పటికే ప్రకటిస్తున్నారు. అంతే కాదు ఆయన దార్శనికత తో కూడిన పాలనను రాష్ట్రానికి అందిన్స్తారు అని కూడా చెబుతున్నరు. విజయ్ ఎన్నో పరీక్షలను దాటుకుని మరీ ఈ రోజున విజయానికి చేరువ అవుతున్నారని టీవీకే నేతలు విశ్లేషిస్తున్నారు. అనుమానాలు ఏవీ లేవని విజయ్ కాబోయే సీఎం అని టీవీకే పార్టీ నాయకుడు సెంగోట్టయాన్ చెప్పడం జరుగుతోంది.

ఆ రెండు సంస్థలే :

ఇక గ్రౌండ్ రియాలిటీ చూస్తే విజయ్ పార్టీకి ఊపు అయితే కొన్ని సెక్షన్లలో కనిపించింది కానీ అధి అధికారం దిశగా తీసుకుని వెళ్తుందా అన్న చర్చ ఉంది. అలాగే ఎన్నో సంస్థలు ఎగ్జిట్ పోల్స్ నివేదికలు ఇచ్చాయి. ఆ సర్వేలలో ఎక్కడా టీవీకే ప్రస్తావన పెద్దగా లేదు, కేవలం పాతిక ముప్పై సీట్లు మాత్రమే వస్తాయని చెప్పాయి. కానీ యాక్సిస్ మై ఇండియా 98 నుంచి 120 దాకా సీట్లు వస్తాయని ఒక స్వల్ప ఆధిక్యతతో చూపించింది. మరో సర్వే సంస్థ టుడేస్ చాణక్య అయితే 52 నుంచి 74 దాకా సీట్లు టీవీకేకి వస్తాయని పేర్కొంది. మరి ఈ రెండు సంస్థల అంచనాలు చూసినా కచ్చితంగా అధికారంలోకి టీవీకే వస్తుందని చెప్పలేదని అంటున్నారు. కానీ టీవీకే నేతలు మాత్రం తామే విన్నర్ అని అంటున్నారు అంటే మరి వారి సొంత సర్వేలు ఏమి చెప్పాయో పోలింగ్ అనంతరం వారు చేసిన కసరత్తు తెచ్చుకున్న నివేదికలలో ఏముందో అని అంతా అంటున్నారు. అసలైన ఫలితాలు మే 4న వచ్చేంతవరకూ అన్ని పార్టీలలో గెలుపు ధీమా ఉండడం సహజం అని రాజకీయ విశ్లేషకులు అంటున్నారు.