బ్యాంకులకు వేల కోట్లు ఎగ్గొట్టి లండన్లో క్రికెట్ ఎంజాయ్ చేస్తున్న మాల్యా, లలిత్ మోదీ!
భారతీయ బ్యాంకుల నుంచి వేల కోట్ల రూపాయలు అప్పుగా తీసుకుని తిరిగి చెల్లించకుండా విదేశాలకు పారిపోయిన విజయ్ మాల్యా, లలిత్ మోదీలు మరోసారి వార్తల్లోకి వచ్చారు.
By: A.N.Kumar | 2 Aug 2025 11:48 AM IST
భారతీయ బ్యాంకుల నుంచి వేల కోట్ల రూపాయలు అప్పుగా తీసుకుని తిరిగి చెల్లించకుండా విదేశాలకు పారిపోయిన విజయ్ మాల్యా, లలిత్ మోదీలు మరోసారి వార్తల్లోకి వచ్చారు. ప్రస్తుతం బ్రిటన్లో నివసిస్తున్న ఈ ఇద్దరూ, లండన్లో జరుగుతున్న భారత్-ఇంగ్లాండ్ టెస్ట్ మ్యాచ్ను కలిసి చూస్తూ కనిపించారు. ఈ సందర్భంగా వారితో వెస్టిండీస్ క్రికెటర్ క్రిస్ గేల్ కూడా ఉండటం అందరి దృష్టిని ఆకర్షించింది.
-క్రికెట్ మ్యాచ్లో హంగామా
లలిత్ మోదీ స్వయంగా సోషల్ మీడియాలో కొన్ని ఫోటోలు, వీడియోలను పోస్ట్ చేశారు. అందులో ఆయన తన స్నేహితురాలు రీమా బౌరీ, విజయ్ మాల్యా, క్రిస్ గేల్తో కలిసి మ్యాచ్ను ఆనందిస్తున్నట్లు కనిపించింది. వారితో పాటు ఫరూక్ ఇంజినీర్, రాడ్ బ్రాన్స్గ్రోవ్లతో కూడా దిగిన ఫోటోలను ఆయన షేర్ చేశారు.
-విజయ్ మాల్యాపై ఆరోపణలు
కింగ్ఫిషర్ ఎయిర్లైన్స్ పేరుతో వేల కోట్ల రూపాయల రుణాలు తీసుకుని ఎగ్గొట్టిన కేసులో విజయ్ మాల్యా నిందితుడు. 2016 మార్చిలో దేశం విడిచి బ్రిటన్కు పారిపోయినప్పటి నుంచి అక్కడే ఉంటున్నాడు. భారత ప్రభుత్వం అతన్ని వెనక్కి రప్పించేందుకు ప్రయత్నిస్తున్నప్పటికీ, మాల్యా మాత్రం ఇటీవల కర్ణాటక హైకోర్టులో తనపై అన్యాయంగా వసూలు చేశారంటూ బ్యాంకులకు వ్యతిరేకంగా కేసు వేశారు.
-లలిత్ మోదీ వ్యవహారం
ఐపీఎల్ వ్యవస్థాపకుడైన లలిత్ మోదీపై కూడా అనేక అవినీతి ఆరోపణలు ఉన్నాయి. వాటి కారణంగానే ఆయన దేశం విడిచి బ్రిటన్కు వెళ్లిపోయారు, అప్పటినుంచి అక్కడే ఉంటున్నారు.
క్రిస్ గేల్తో బంధం
క్రిస్ గేల్ గతంలో మాల్యా యాజమాన్యంలో ఉన్న రాయల్ ఛాలెంజర్స్ బెంగళూరు (RCB) జట్టుకు ఐపీఎల్లో ఆడాడు. మాల్యాతో అతనికి మంచి సంబంధాలు ఉండటం వల్ల, ఈ ముగ్గురూ కలిసి కనిపించడం ఆశ్చర్యమేమీ కాదన్న అభిప్రాయాలు వ్యక్తమవుతున్నాయి.
బ్యాంకులకు వేల కోట్లు ఎగ్గొట్టి విదేశాలకు పారిపోయినప్పటికీ, మాల్యా, లలిత్ మోదీలు లండన్లో చాలా ఆనందంగా జీవిస్తున్నట్లు కనిపిస్తోంది. ఇది భారత చట్ట వ్యవస్థ వీరిపై పట్టు సాధించలేదా అనే ప్రశ్నలను మరోసారి లేవనెత్తుతోంది.