'వీసా' లేకుండానే 30 రోజులు.. భారతీయులకు ఆ దేశం బంపర్ ఆఫర్..

భారతీయ పర్యాటకులు, వ్యాపారవేత్తలకు ఉజ్బెకిస్థాన్ ప్రభుత్వం గుడ్‌న్యూస్ చెప్పింది. భారత పౌరులు ఇకపై ఎలాంటి వీసా లేకుండానే ఉజ్బెకిస్థాన్‌లో 30 రోజుల వరకు పర్యటించే అవకాశం కల్పించింది. ప్రధాని నరేంద్ర మోదీ ఉజ్బెకిస్థాన్ పర్యటన సందర్భంగా ఆ దేశ అధ్యక్షుడు షావ్కత్ మిర్జియోయేవ్ ఈ కీలక నిర్ణయాన్ని ప్రకటించారు. ఈ నిర్ణయంతో భారత్‌–ఉజ్బెకిస్థాన్ మధ్య పర్యాటకం, వాణిజ్యం, ప్రజల మధ్య సంబంధాలు మరింత బలోపేతం కానున్నాయి.

30 రోజుల పాటు వీసా అవసరం లేదు

భారతీయ ప్రయాణికులకు 30 రోజుల వరకు వీసా రహిత ప్రవేశం కల్పించడం రెండు దేశాల మధ్య సంబంధాల్లో కీలక ముందడుగుగా భావిస్తున్నారు. ఉజ్బెకిస్థాన్‌లోని చారిత్రక ప్రాంతాలు, సాంస్కృతిక ప్రదేశాలను సందర్శించాలనుకునే భారతీయులకు ఈ నిర్ణయం మరింత సౌకర్యవంతంగా మారనుంది. అలాగే వ్యాపార అవసరాల కోసం ఉజ్బెకిస్థాన్‌కు వెళ్లే భారతీయులకు కూడా ప్రయాణ ప్రక్రియ సులభతరం కానుంది.

ద్వైపాక్షిక వాణిజ్యంపై కీలక లక్ష్యం

రెండు రోజుల పర్యటనలో భాగంగా ప్రధాని మోదీ, అధ్యక్షుడు మిర్జియోయేవ్ మధ్య ప్రతినిధుల స్థాయి చర్చలు జరిగాయి. భారత్‌, ఉజ్బెకిస్థాన్ తమ సంబంధాలను ‘కాంప్రహెన్సివ్ స్ట్రాటెజిక్ పార్ట్‌నర్‌షిప్’ స్థాయికి తీసుకెళ్లేందుకు అంగీకరించాయి. 2030 నాటికి ఇరు దేశాల మధ్య ద్వైపాక్షిక వాణిజ్యాన్ని 5 బిలియన్ డాలర్లకు పెంచాలని లక్ష్యంగా పెట్టుకున్నాయి.

ఏఐ, డిజిటల్ నెట్‌వర్క్‌లు, అంతరిక్ష పరిశోధనలు, న్యూక్లియర్ ఎనర్జీ వంటి కీలక రంగాల్లో పరస్పర సహకారాన్ని పెంచుకోవాలని నిర్ణయించాయి. దీంతో భవిష్యత్‌లో సాంకేతిక, ఇంధన రంగాల్లో ఇరు దేశాల భాగస్వామ్యం మరింత విస్తరించే అవకాశం ఉంది.

భారత్‌కు యురేనియం సరఫరా

ఈ పర్యటనలో ఇంధన రంగానికి సంబంధించి కూడా కీలక ఒప్పందం కుదిరింది. ఉజ్బెకిస్థాన్ నుంచి భారత్‌కు దీర్ఘకాలం పాటు యురేనియం సరఫరా చేయడానికి ఒప్పందం కుదిరినట్లు ప్రధాని మోదీ వెల్లడించారు. భారత అణు విద్యుత్ అవసరాలకు ఈ ఒప్పందం ప్రాధాన్యత సంతరించుకోనుంది.

అదేవిధంగా రక్షణ రంగంలో పరస్పర సహకారం పెంచుకోవడంతో పాటు ఉగ్రవాదం, తీవ్రవాదంపై కలిసి పోరాడాలని ఇరు దేశాల నేతలు నిర్ణయించారు. గుజరాత్‌లోని గిఫ్ట్ సిటీలోని సాంకేతిక, ఆర్థిక వ్యవస్థను అధ్యయనం చేసేందుకు ఉజ్బెకిస్థాన్ నుంచి ప్రత్యేక బృందాన్ని భారత్‌కు పంపనున్నట్లు వెల్లడించారు.

తాష్కెంట్‌లో యోగాకు ప్రత్యేక ఆదరణ

ఉజ్బెకిస్థాన్‌లో యోగా ప్రజాదరణ కూడా పెరుగుతోందని అధ్యక్షుడు మిర్జియోయేవ్ తెలిపారు. 2018 నుంచే అక్కడ యోగా ఫెడరేషన్ పనిచేస్తోందని చెప్పారు. తాష్కెంట్‌లో స్థానికులు ప్రదర్శించిన యోగాసనాలను ప్రధాని మోదీ స్వయంగా వీక్షించారు.

ఇదిలా ఉండగా ప్రధాని మోదీకి ఉజ్బెకిస్థాన్ అత్యున్నత పౌర పురస్కారమైన ‘ఆర్డర్ ఆఫ్ ఒలీ దరాజాలి దుస్త్లిక్’ ను ప్రదానం చేసి ఘనంగా సత్కరించింది. ప్రస్తుతం భారత్–ఉజ్బెకిస్థాన్ మధ్య వారానికి 14 ప్రత్యక్ష విమానాలు నడుస్తున్నాయి. వీసా రహిత ప్రవేశ నిర్ణయంతో ఈ విమాన సేవలకు, ముఖ్యంగా పర్యాటక రంగానికి మరింత డిమాండ్ పెరిగే అవకాశం ఉంది.

ఉజ్బెకిస్థాన్ పర్యటన ముగించుకున్న ప్రధాని మోదీ 26వ షాంఘై సహకార సంస్థ (ఎస్.సీఓ) సదస్సులో పాల్గొనేందుకు కిర్గిజిస్థాన్‌కు బయలుదేరనున్నారు. మొత్తంగా చూస్తే వీసా రహిత ప్రయాణ సౌకర్యం నుంచి వాణిజ్యం, ఇంధనం, సాంకేతికత, రక్షణ రంగాల వరకు భారత్‌–ఉజ్బెకిస్థాన్ సంబంధాల్లో ఈ పర్యటన కీలక మైలురాయిగా నిలిచింది.