మిలిటరీ శక్తివంతమైన నౌకలో టాయిలెట్ సమస్యలు.. కారణాలు ఏమిటి?

ప్రపంచంలోనే అత్యంత శక్తివంతమైన దేశం అమెరికా. ఆ దేశానికి చెందిన 'యూఎస్ఎస్ గెరాల్డ్ ఆర్. ఫోర్డ్' యుద్ధనౌక పేరు వింటే శత్రు దేశాలకు వణుకు పుడుతుంది. కానీ, ప్రస్తుతం ఈ నౌకలోని సైనికులు శత్రువులతో కాదు.. టాయిలెట్ల కోసం యుద్ధం చేస్తున్నారు. ఇరాన్‌పై నిఘా ఉంచేందుకు సముద్రంలో మోహరించిన ఈ భారీ నౌకలో వెలుగుచూసిన 'టాయిలెట్ తిప్పలు' ఇప్పుడు అంతర్జాతీయంగా చర్చనీయాంశంగా మారాయి.

5 వేల మంది సైనికులు.. 650 టాయిలెట్లు:

ఈ అత్యాధునిక యుద్ధనౌకలో సుమారు 5 వేల మంది సైనికులు విధులు నిర్వహిస్తున్నారు. వీరి అవసరాల కోసం షిప్‌లో 650 టాయిలెట్లను ఏర్పాటు చేశారు. అయితే, గత 8 నెలలుగా ఈ నౌక నిరంతరాయంగా సముద్రంలోనే ఉండటంతో నిర్వహణ లోపం తలెత్తింది. ఇక ఈ 650 టాయిలెట్లలో మెజారిటీ పనిచేయకపోవడంతో సైనికులకు కష్టాలు మొదలయ్యాయి. ఒక టాయిలెట్ కోసం సైనికులు రోజుకు కనీసం 45 నిమిషాల పాటు క్యూలో నిలబడాల్సి వస్తోందంటే పరిస్థితి ఎంత దారుణంగా ఉందో అర్థం చేసుకోవచ్చు.

రిపేర్లు చేస్తున్నా తగ్గని కష్టాలు:

టాయిలెట్ వ్యవస్థలో ఏర్పడిన సాంకేతిక లోపాలను సరిదిద్దేందుకు ఇంజనీర్లు నిరంతరం ప్రయత్నిస్తూనే ఉన్నారు. వేల కోట్లు ఖర్చు పెట్టి నిర్మించిన ఈ నౌకలో డ్రైనేజీ వ్యవస్థ తరచూ జామ్ అవుతుండటంతో రిపేర్లు చేసినా ఫలితం ఉండటం లేదు. ఇక ఒకవైపు ఇరాన్‌తో యుద్ధ వాతావరణం, మరోవైపు ఎనిమిది నెలలుగా కుటుంబాలకు దూరంగా సముద్రం మధ్యలో ఉండటం వల్ల సైనికులు ఇప్పటికే మానసిక ఒత్తిడిలో ఉన్నారు. దీనికి తోడు కనీస అవసరమైన టాయిలెట్ల కోసం గంటల తరబడి వేచి చూడాల్సి రావడంతో వారిలో కోపం, నిరాశ పెరిగిపోతున్నాయి.

అత్యాధునిక నౌకకు అతుకుల కష్టాలు:

యూఎస్ఎస్ గెరాల్డ్ ఆర్. ఫోర్డ్ అనేది అమెరికా నావికా దళంలోనే అత్యంత ఖరీదైన మరియు హైటెక్ యుద్ధనౌక. ఇలాంటి నౌకలో డ్రైనేజీ సమస్య తలెత్తడం అమెరికా రక్షణ శాఖను ఆశ్చర్యానికి గురిచేస్తోంది. ఇక ఈ షిప్‌లో ఉపయోగించిన కొత్త తరహా వాక్యూమ్ టాయిలెట్ సిస్టమ్ వల్ల ఈ తిప్పలు వస్తున్నాయని నిపుణులు భావిస్తున్నారు. ఈ సమస్యను శాశ్వతంగా పరిష్కరించాలంటే భారీ ఖర్చుతో కూడిన మార్పులు చేయాల్సి ఉంటుంది. అప్పటివరకు ఈ భారీ నౌకలోని సైనికులకు టాయిలెట్ యుద్ధం తప్పేలా లేదు.

యుద్ధ తంత్రంలో మేటి అనిపించుకున్న అమెరికా, తన సొంత నౌకలోని చిన్న టాయిలెట్ సమస్యను పరిష్కరించలేకపోవడం విడ్డూరంగా ఉంది. మరి ఈ 'టాయిలెట్ యుద్ధం' ఎప్పుడు ముగుస్తుందో చూడాలి అని నెటిజన్స్ కామెంట్లు చేస్తున్నారు.