గ్రీన్‌కార్డ్ దరఖాస్తుదారులు ఈ పొరపాట్లు చేయవద్దు.. సూచనలివీ

అమెరికాలో శాశ్వత నివాసం పొందాలని ఆశించే వేలాది మంది విదేశీయులకు ముఖ్య గమనిక. గ్రీన్‌కార్డు దరఖాస్తు ప్రక్రియలో చిన్నపాటి పొరపాట్లు కూడా మీ కలలకు అడ్డుకట్ట వేయొచ్చని యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) తాజాగా హెచ్చరించింది. పోటీ అధికంగా ఉన్న నేపథ్యంలో దరఖాస్తుదారులు ప్రతి అడుగులోనూ చాలా అప్రమత్తంగా ఉండాలని నిపుణులు సూచిస్తున్నారు.

ఐ-485 దరఖాస్తులో అత్యంత కీలకమైన అంశాలు

గ్రీన్‌కార్డు కోసం దరఖాస్తు చేసేటప్పుడు సమర్పించాల్సిన అత్యంత ముఖ్యమైన ఫారం I-485 (Application to Register Permanent Residence or Adjust Status). దీనిని నింపే విషయంలోనే చాలామంది పొరపాట్లు చేస్తున్నారని USCIS స్పష్టం చేసింది.

* ఖాళీగా వదలొద్దు!

I-485 ఫారంలోని Part-9 లోని ప్రశ్నలకు చాలామంది దరఖాస్తుదారులు సమాధానాలు ఇవ్వకుండా ఖాళీగా వదిలేస్తున్నారట. ఇలా ఖాళీగా వదిలేయడం వలన దరఖాస్తులు తిరస్కరణకు గురవడం లేదా ఆమోద ప్రక్రియ తీవ్రంగా ఆలస్యం కావడం జరుగుతోంది. దరఖాస్తులోని ఏ ఒక్క ప్రశ్నను కూడా ఖాళీగా వదలకుండా, జాగ్రత్తగా, పూర్తి స్థాయిలో సమాధానం ఇవ్వడం తప్పనిసరి.

* అవసరమైన పత్రాలు

దరఖాస్తుతో పాటు జనన ధృవీకరణ పత్రాలు, వైద్య పరీక్షా రిపోర్టులు, చట్టబద్ధంగా అమెరికాకు వచ్చారని నిరూపించే పత్రాలను పూర్తి స్థాయిలో సమర్పించాలి.

* దరఖాస్తు నియమాలు

కుటుంబ సభ్యులు ఎవరైనా గ్రీన్‌కార్డు కోసం దరఖాస్తు చేయాలనుకుంటే, ప్రతి ఒక్కరూ వేరువేరుగా ప్రత్యేక దరఖాస్తు చేసుకోవాలి. దరఖాస్తు చేసే సమయంలో వారు తప్పనిసరిగా అమెరికాలోనే ఉండాలి.

* గ్రీన్‌కార్డ్ పరిమితులు, పెరుగుతున్న పోటీ

అమెరికా ఇమిగ్రేషన్ చట్టాల ప్రకారం.. ప్రతి సంవత్సరం సుమారు 2,26,000 ఫ్యామిలీ-బేస్డ్ గ్రీన్‌కార్డులు , 1,40,000 ఉద్యోగ ఆధారిత గ్రీన్‌కార్డులను మాత్రమే జారీ చేస్తుంది. దరఖాస్తులు ఈ సంఖ్యలకంటే ఎక్కువగా ఉండటంతో గ్రీన్‌కార్డు పొందడం కోసం పోటీ తీవ్రంగా ఉంది. ఈ కారణంగానే, దరఖాస్తులో చిన్న పొరపాట్లు కూడా తిరస్కరణకు దారితీస్తున్నాయి.

* అక్టోబర్ 20 నుండి కొత్త టెస్టింగ్ విధానం

వలసల విధానంలో వస్తున్న మార్పుల నేపథ్యంలో, గ్రీన్‌కార్డు పొందాలనుకునే వారికి అక్టోబర్ 20 నుండి కొత్త టెస్టింగ్ విధానం అమలులోకి రానుంది. ఈ టెస్టింగ్ ద్వారా దరఖాస్తుదారుల యొక్క కింది అంశాలను తనిఖీ చేస్తారు:

*అమెరికా విలువల పట్ల నిబద్ధత

యూఎస్ చరిత్ర, ప్రభుత్వం పట్ల అవగాహన కలిగి ఉండాలి.

* నైతిక ప్రవర్తన

ఈ పరీక్షలో మొత్తం 20 ప్రశ్నలు ఉంటాయి. దరఖాస్తుదారులు తప్పనిసరిగా కనీసం 12 ప్రశ్నలకు సరైన సమాధానం ఇవ్వాల్సి ఉంటుంది.

నిపుణుల సలహా

అమెరికాలో శాశ్వత నివాసం కోరుకునేవారు I-485 ఫారం నింపేటప్పుడు ప్రతీ ప్రశ్నకు సమాధానం ఇవ్వడం, అవసరమైన పత్రాలు పూర్తి స్థాయిలో సమర్పించడం, రాబోయే కొత్త టెస్టింగ్ విధానానికి సన్నద్ధం కావడం ద్వారా మాత్రమే తమ దరఖాస్తు తిరస్కరణకు గురికాకుండా చూసుకోగలరు. ప్రతి అడుగులోనూ అప్రమత్తంగా ఉండటం చాలా ముఖ్యం.