అమెరికా షట్‌డౌన్‌: ప్రజాస్వామ్య వ్యవస్థకు హెచ్చరిక

ప్రపంచంలోనే అగ్రశక్తిగా భావించబడే అమెరికా మరోసారి ప్రభుత్వ షట్‌డౌన్‌కు చేరడం ఆ దేశ ప్రజాస్వామ్య వ్యవస్థలోని లోపాలను బహిర్గతం చేస్తోంది. 2026 బడ్జెట్‌పై రాజకీయ ఏకాభిప్రాయం కుదరకపోవడం వల్ల ప్రభుత్వ కార్యకలాపాలు పాక్షికంగా నిలిచిపోవడం కేవలం ఆర్థిక సమస్య మాత్రమే కాదు. ఇది రాజకీయ అస్థిరతకు, విధానపరమైన మొండితనానికి అద్దం పడుతోంది.

బడ్జెట్ ఆమోదం ఆలస్యం కావడం అమెరికాకు కొత్తేమీ కాదు. అయితే ప్రతి షట్‌డౌన్ వెనుక దాగి ఉన్న కారణాలు మరింత ఆందోళన కలిగిస్తున్నాయి. ఈసారి ఇమిగ్రేషన్, కస్టమ్స్ ఎన్‌ఫోర్స్‌మెంట్‌ (ఐసీఈ) అధికారుల చర్యలపై డెమోక్రాట్ల ఆగ్రహం రాజకీయ పోరాటాన్ని మరింత ముదిర్చింది. చట్ట అమలు అవసరమే అయినా పౌరుల ప్రాణాలు ప్రమాదంలో పడితే సంస్కరణలు తప్పనిసరి అనే వాదనలో తార్కికత ఉంది. కానీ ఆ అంశాన్ని బడ్జెట్‌ బిల్లుతో ముడిపెట్టి ప్రభుత్వ వ్యవస్థనే నిలిపివేయడం ఎంతవరకు సమంజసం అనే ప్రశ్నలు తలెత్తుతున్నాయి.

ప్రభుత్వ షట్‌డౌన్‌ల ప్రభావం ప్రత్యక్షంగా సామాన్యులపై పడుతుంది. ప్రభుత్వ ఉద్యోగులు జీతాల కోసం ఎదురుచూడాల్సి వస్తుంది. కీలక సేవలు పరిమితమవుతాయి. అంతర్జాతీయంగా అమెరికా ప్రతిష్ఠ దెబ్బతింటుంది. ప్రపంచానికి దిశానిర్దేశం చేసే దేశం తన అంతర్గత రాజకీయ విభేదాలను పరిష్కరించుకోలేకపోవడం అంతర్జాతీయ వేదికలపై సందేహాలను రేకెత్తిస్తోంది.

ఇది మొదటిసారి కాదు. గతంలోనూ అనేకసార్లు అమెరికా ఇలాంటి పరిస్థితిని ఎదుర్కొంది. 2018–19 మధ్యకాలంలో అప్పుడు కూడా అధ్యక్షుడు డొనాల్డ్ ట్రంప్ హయాంలోనే 35 రోజులపాటు కొనసాగిన షట్‌డౌన్ చరిత్రలోనే ఒక చేదు అధ్యాయంగా నిలిచింది. రాజకీయ లాభనష్టాల కోసం ప్రజా పరిపాలనను బందీగా మార్చడం ప్రజాస్వామ్యానికి ప్రమాదకర సంకేతమే.

ప్రస్తుతం ఇది పాక్షిక షట్‌డౌన్ అని.. త్వరలోనే పరిష్కారం దొరుకుతుందనే ఆశాభావం వ్యక్తమవుతోంది. కానీ సమస్య మూలాన్ని తాకకుండా తాత్కాలిక పరిష్కారాలు వెతకడం వల్ల ఇలాంటి సంక్షోభాలు పునరావృతమవుతూనే ఉంటాయి. రాజకీయ పార్టీలు తమ అజెండాలకంటే ప్రజా ప్రయోజనాలను ముందుంచినప్పుడే ప్రజాస్వామ్యానికి అర్థం ఉంటుంది.

అమెరికా షట్‌డౌన్‌ ఒక దేశానికే పరిమితమైన ఘటన కాదు. ఇది ప్రపంచానికి ఒక పాఠం.. ప్రజాస్వామ్యంలో రాజకీయ విభేదాలు సహజమే కానీ, వాటి భారం ప్రజలపై మోపితే వ్యవస్థపై విశ్వాసం సడలిపోతుంది. శక్తివంతమైన దేశమైనా, బాధ్యతాయుతమైన పాలన లేకపోతే అస్థిరత తప్పదనే సత్యాన్ని ఈ షట్‌డౌన్ మరోసారి గుర్తుచేస్తోంది.