అమెరికాలోని భారతీయ విద్యార్థులపై ఓపీటీ పిడుగు

అమెరికాలో ఉన్నత విద్య కలలతో వెళ్లే భారతీయ విద్యార్థులకు మరోసారి ఆందోళన కలిగించే పరిణామం చోటుచేసుకుంది. అధ్యక్షుడు డొనాల్డ్ ట్రంప్ అధికారంలోకి వచ్చిన తరువాత నుంచి విదేశీ విద్యార్థుల ప్రవేశంపై పలు ఆంక్షలు విధిస్తూ వస్తున్నారు. ఇప్పుడు ఆ దిశగా మరో పెద్ద మార్పు సూచన వెలువడింది.

యూఎస్‌ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (డీహెచ్ఎస్) తాజాగా ఓ కీలక ప్రతిపాదనను ఫెడరల్ రెగ్యులేటరీ అజెండాలో చేర్చింది. దీనిలో భాగంగా అంతర్జాతీయ విద్యార్థులకు ఎంతో ముఖ్యమైన ఆప్షనల్ ప్రాక్టికల్ ట్రైనింగ్ (ఓపీటీ) ప్రోగ్రామ్‌పై కఠిన నిబంధనలు విధించేలా లేదా పూర్తిగా రద్దు చేసేలా ఆలోచనలు జరుగుతున్నాయి. ఈ మార్పు 2025 చివర్లో లేదా 2026 ప్రారంభంలో అమల్లోకి వచ్చే అవకాశం ఉందని తెలుస్తోంది.

* ఓపీటీ అంటే ఏమిటి?

ఓపీటీ అనేది అమెరికాలోని ఎఫ్-1 వీసాతో చదువుతున్న విద్యార్థులకు అందించే ప్రత్యేక అవకాశం. ఇందులో భాగంగా పీజీ లేదా యూజీ చదువు పూర్తిచేసిన తరువాత విద్యార్థులు తమ కోర్సుకు సంబంధించిన రంగంలో ఏడాది పాటు ఉద్యోగం చేయవచ్చు. ముఖ్యంగా స్టెమ్ (సైన్స్, టెక్నాలజీ, ఇంజినీరింగ్, మ్యాథమ్యాటిక్స్) విభాగాల్లో చదివినవారికి ఈ కాలాన్ని 3 సంవత్సరాలకు పొడిగించే అవకాశం ఉంటుంది. ఈ సమయంలోనే చాలామంది విద్యార్థులు తమ ఉద్యోగ అనుభవం ఆధారంగా హెచ్1 బీ వీసా కోసం దరఖాస్తు చేస్తారు.

*అభ్యంతరాలే సమస్యకు మూలం

అయితే కొన్ని అమెరికన్ సంస్థలు ఓపీటీ ప్రోగ్రామ్‌ దుర్వినియోగం అవుతోందని ఆరోపిస్తున్నాయి. ముఖ్యంగా విదేశీ విద్యార్థులు తక్కువ వేతనాలకు పనిచేస్తున్నారని, దాంతో స్థానిక అమెరికన్లకు ఉద్యోగాలు తగ్గుతున్నాయని వాదన వినిపిస్తోంది. ఈ కారణంగానే ట్రంప్ ప్రభుత్వం ఈ ప్రోగ్రామ్‌పై మరిన్ని నియంత్రణలు విధించే ప్రయత్నం చేస్తోందని విశ్లేషకులు చెబుతున్నారు.

భారతీయ విద్యార్థులపై తీవ్ర ప్రభావం

ఓపీటీ రద్దు లేదా పరిమితి విధానం అమల్లోకి వస్తే, దాని ప్రభావం భారతీయ విద్యార్థులపై తీవ్రంగా ఉంటుంది. ప్రతి సంవత్సరం అమెరికా విశ్వవిద్యాలయాలకు వెళ్తున్న భారతీయ విద్యార్థుల్లో సుమారు 80% మంది స్టెమ్ కోర్సులు చదువుతున్నారు. వీరికి ఓపీటీ ద్వారా లభించే ప్రాక్టికల్ అనుభవమే అమెరికాలో స్థిరపడే మార్గం అవుతుంది. అది నిలిచిపోయితే విదేశీ విద్యావ్యవస్థపై ఆకర్షణ తగ్గిపోతుంది. అమెరికా యూనివర్సిటీలకూ అంతర్జాతీయ విద్యార్థుల సంఖ్య తగ్గడం వల్ల భారీ ఆర్థిక నష్టం కలగవచ్చు.

ట్రంప్ మాటలు గందరగోళం సృష్టిస్తున్నాయి

ఇదిలాఉంటే, ఇటీవల ట్రంప్ ఇచ్చిన ఒక ప్రకటన మాత్రం విభిన్న సందేశాన్ని ఇస్తోంది. విదేశీ విద్యార్థులు అమెరికాలో చదవడం దేశానికి మేలేనని, వారు రావడం వ్యాపారాలను ప్రోత్సహిస్తుందని ఆయన పేర్కొన్నారు. విద్యార్థుల రాకతో ఉన్నత విద్యా వ్యవస్థకు కొత్త ఉత్సాహం వస్తుందని ఆయన అభిప్రాయపడ్డారు. కానీ ఈ ప్రకటనల మధ్యలోనే ఓపీటీ రద్దు వంటి ప్రతిపాదనలు రావడం గందరగోళాన్ని సృష్టిస్తోంది.

ఓపీటీ ప్రోగ్రామ్ అమెరికాలో చదువుతున్న విదేశీ విద్యార్థుల కలల సొపానం. దానిని రద్దు చేయడం లేదా పరిమితులు విధించడం భారతీయ విద్యార్థుల భవిష్యత్తుపై తీవ్ర ప్రభావం చూపే అవకాశం ఉంది. అమెరికా-భారత్ విద్యా సంబంధాలు, టెక్ రంగం భవిష్యత్తు కూడా దీనిపై ఆధారపడి ఉంటాయి. ఈ ప్రతిపాదన ఎటు దారితీస్తుందో, ప్రపంచ విద్యార్థులందరూ ఇప్పుడు ఆతృతగా ఎదురుచూస్తున్నారు.