అమెరికాకు వచ్చినా.. వెళ్లినా.. 'కిసిక్' కంపల్సరీ

అమెరికా సంయుక్త రాష్ట్రాలకు వచ్చే లేదా అమెరికా నుండి వెళ్లే ప్రతి ఒక్క అమెరికన్-కాని పౌరుడి (నాన్ సిటిజన్ విదేశీయుడి) ఫొటోలు, బయోమెట్రిక్ వివరాలను ఇకపై తప్పనిసరిగా సేకరించనున్నారు. ఈ మేరకు దేశీయ భద్రతా విభాగానికి (DHS) చెందిన కస్టమ్స్ అండ్ బోర్డర్ ప్రొటెక్షన్ (CBP) ఒక కొత్త నియమాన్ని ప్రకటించింది.

కొత్త నిబంధన అమలు ఎప్పుడంటే?

ఈ నిబంధన ఫెడరల్ రిజిస్టర్‌లో ప్రచురించబడింది. 2025 డిసెంబర్ 26 నుండి ఇది అమలులోకి రానుంది.

ప్రధాన మార్పు ఏమిటి?

ఇప్పటివరకు, ప్రవేశం.. నిర్గమనం సమయంలో బయోమెట్రిక్ సంప్రదింపులు (ముఖ ఫొటోలు, వేలిముద్రలు) కొన్ని రకాల ప్రయాణికులకు మాత్రమే పరిమితం చేయబడ్డాయి. అయితే కొత్త నిబంధనతో ఈ సేకరణ అమెరికా కాని పౌరులందరికీ వర్తిస్తుంది.

గ్రీన్ కార్డ్ హోల్డర్లు (శాశ్వత నివాసితులు): వీరు కూడా ఈ నిబంధన కిందకు వస్తారు.వీసా కలిగినవారు: విద్యార్థులు (F-1), ఉద్యోగులు (H-1B), టూరిస్టులు (B-1/B-2) అందరూ ఈ నిబంధన కిందకు వస్తారు.పరిమితి ఉన్న యాత్రికులు (పర్మనెంట్ కాదు): తాత్కాలికంగా వచ్చి వెళ్లేవారు.అవసరమైతే, ఫొటోలతో పాటు వేలిముద్రలు లేదా ఇతర బయోమెట్రిక్ డేటాను కూడా ఇవ్వవలసి ఉంటుంది.

*ప్రభుత్వం చెప్పే కారణాలు ఏంటి?

యునైటెడ్ స్టేట్స్ కస్టమ్స్ అండ్ బోర్డర్ ప్రొటెక్షన్ (CBP) ఈ విస్తరణ వెనుక గల ప్రధాన లక్ష్యాలను స్పష్టం చేసింది.

నకిలీ ప్రయాణ పత్రాలు, గుర్తింపు మోసాలు , వీసా దుర్వినియోగాన్ని మరింత సమర్థవంతంగా గుర్తించడం ముఖ్యం. దేశంలో వీసా గడువు ముగిసిన తర్వాత కూడా అక్రమంగా ఉంటున్న వ్యక్తులను గుర్తించి, వారిపై కఠిన చర్యలు తీసుకుంటారు. 2021లో ప్రతిపాదించబడిన పథకాన్ని ఇప్పుడు పూర్తి రూపంలో తీసుకువచ్చినట్లు ప్రభుత్వం తెలిపింది.

*ఎక్కడెక్కడ అమలు చేస్తారు?

దేశంలోని అన్ని ప్రవేశ, నిర్గమన (వెళ్లే) కేంద్రాల వద్ద ఈ వ్యవస్థ వర్తిస్తుంది. అందులో విమానాశ్రయాలు ,సముద్ర పోర్టులు, భూ సరిహద్దులు ఉంటాయి.

*గోప్యతా సమస్యలు

ఈ నిబంధనపై గోప్యతా హక్కుల పరిరక్షణ గురించి ఆందోళనలు వ్యక్తమయ్యాయి. ముఖ గుర్తింపు సాంకేతికతలో లోపాలు, మైనారిటీలపై పక్షపాతం, డేటా నిల్వ విధానం, ఎంతకాలం నిల్వ చేస్తారనే ప్రశ్నలపై ప్రజా సంస్థలు అభ్యంతరాలు వ్యక్తం చేశాయి.

ప్రభుత్వం హామీ

తాము అన్ని చట్టపరమైన పరిమితులను.. గోప్యతా చట్టాలను పాటిస్తామని ప్రభుత్వం స్పష్టం చేసింది. ముఖ్యంగా అమెరికా పౌరుల ఫొటోలు ప్రత్యేకంగా నిల్వ చేయబడవని, పరిశీలన తర్వాత వాటిని తొలగిస్తామని పేర్కొంది.

ఎవరిపై ప్రభావం?

ఈ కొత్త నిబంధన భారతీయ పౌరులు, ముఖ్యంగా విద్యార్థులు, H-1B వీసాదారులు, అలాగే గ్రీన్ కార్డ్ హోల్డర్లపై ప్రభావం చూపుతుంది. వీరంతా అమెరికాకు ప్రవేశించినప్పుడు.. వెళ్లేటప్పుడు తప్పనిసరిగా బయోమెట్రిక్ ప్రక్రియను పూర్తి చేయవలసి ఉంటుంది. దీని కారణంగా విమానయాన ప్రక్రియలో కొంత ఆలస్యం లేదా మార్పులు ఉండవచ్చు.

ప్రయాణికులు దీనిని దృష్టిలో ఉంచుకుని, వారి ప్రయాణ పద్ధతులను మార్చుకోవాలని, విమానయాన సంస్థల మార్గదర్శకాలను ముందుగానే తెలుసుకోవాలని నిపుణులు సూచిస్తున్నారు.

ఈ కొత్త నియమావళి, అమెరికా వలస.. సరిహద్దు భద్రతా విధానంలో మరో ముఖ్యమైన అడుగుగా భావిస్తున్నారు. మరింత సమాచారం.. పూర్తి వివరాలు ఫెడరల్ రిజిస్టర్ ప్రకటనలో అందుబాటులో ఉన్నాయి.