42 యుద్ధ‌విమానాలు షాట్ డౌన్: ఇరాన్ దెబ్బ‌కు అమెరికా బెంబేలు!

మేం తోపులం అని చెప్పుకునే చాలామంది పెద్ద‌న్న‌లు ఐపు లేకుండా పోయారు! ప్ర‌పంచాన్ని న‌డిపించేది మేమే అని విర్ర‌వీగే అమెరికాకు కూడా అదే గ‌తి పట్టింది. శ‌త్రువుపై దాడిలో ల‌క్ష‌ల కోట్లు న‌ష్ట‌పోవ‌డంతో ఇప్పుడు ట్రంప్ ప్ర‌భుత్వం తీవ్ర‌మైన ఇబ్బందుల్ని, శాప‌నార్థాల్ని ఎదుర్కొంటోంది. యుద్ధ దాహం ఫ‌లితం ఇప్పుడు ట్రంప్ మెడ‌కు చుట్టుకుంటోంద‌ని అమెరికా మీడియా కోడై కూస్తోంది.

ఇరాన్‌పై అమెరికా సైనిక చర్యల నేపథ్యంలో చేపట్టిన `ఆపరేషన్ ఎపిక్ ఫ్యూరీ` ఆశించిన ఫలితాలను ఇవ్వకపోగా అమెరికాకు మునుపెన్నడూ లేని విధంగా భారీ ఆస్తి, సైనిక నష్టాన్ని మిగిల్చింది. అమెరికా కాంగ్రెస్‌కు సమర్పించిన ఒక తాజా రిపోర్ట్ ప్రకారం.. ఈ సైనిక చర్యల వల్ల వాషింగ్టన్‌లో యుద్ధ వ్యూహాల సమర్థతపై.. అలాగే ఈ పోరాటానికి అయిన ఖర్చుపై తీవ్రమైన చర్చలు సాగాయి. ఈ చ‌ర్చ‌ల్లో ఎన్నో ప్రశ్నలు తలెత్తుతున్నాయి. అమెరికా అధ్యక్షుడు డొనాల్డ్ ట్రంప్ ఇరాన్‌పై ప్రదర్శించిన యుద్ధ దాహం..దుందుడుకు వైఖరి కారణంగానే అమెరికా ఇంతటి భారీ సంపదను, సైనిక సామగ్రిని కోల్పోవాల్సి వచ్చిందనే విమర్శలు ఇంటర్నేషనల్ మీడియాలో వెల్లువెత్తుతున్నాయి.

గల్ఫ్ న్యూస్ కథనం ప్రకారం.. ఫిబ్రవరి నుండి ఏప్రిల్ వరకు జరిగిన ఈ ఉమ్మడి సైనిక ఆపరేషన్‌లో అమెరికా తన అత్యంత అధునాతన యుద్ధ విమానాలను, డ్రోన్లను కోల్పోయింది. అమెరికా కాంగ్రెస్ రీసెర్చ్ సర్వీస్ (సీఆర్ఎస్‌) రిపోర్ట్ ప్రకారం.. ఈ ఘర్షణల్లో కనీసం 42 అమెరికన్ మిలిటరీ యుద్ధ విమానాలు పూర్తిగా ధ్వంసమవడమో లేదా తీవ్రంగా దెబ్బతినడమో జరిగింది. ఈ భారీ నష్టాల్లో అమెరికా గర్వంగా చెప్పుకునే అత్యాధునిక ఎఫ్-35 (ఎఫ్‌-35) స్టెల్త్ ఫైటర్లు, ఎఫ్-15ఈ స్ట్రైక్ ఈగిల్స్ (ఎఫ్‌-15ఇ స్ట్రైక్ ఈగిల్స్), ఎంక్యూ-9 రీపర్ డ్రోన్లు (ఎంక్యూ-9 రీప‌ర్ డ్రోన్స్).. ఆకాశంలోనే ఇంధనాన్ని నింపే కేసీ-135 ఏరియల్ రీఫ్యూయలింగ్ ట్యాంకర్లు (కేసీ-135 ట్యాంక‌ర్స్‌) ఉన్నాయి.

ఈ యుద్ధం కారణంగా అమెరికా నష్టపోయిన మొత్తం సంపద విలువ ఊహకందని స్థాయిలో ఉంది. ధ్వంసమైన - పాక్షికంగా దెబ్బతిన్న ఈ 42 యుద్ధ విమానాల వల్ల వాటి విలువే విడిగా దాదాపు 29 బిలియన్ డాలర్ల (సుమారు రూ.2,40,000 కోట్లకు పైగా) మార్కును దాటిపోవచ్చని సీఆర్ఎస్ అంచనా వేసింది. ఒక్కొక్క విమానం సాంకేతికత, దాని తయారీ వ్యయం పరంగా అత్యంత ఖరీదైనవి కావడం వల్ల ఈ నష్టం అమెరికా రక్షణ బడ్జెట్‌పై తీవ్ర ప్రభావం చూపనుంది. కేవలం మూడు నెలల వ్యవధిలోనే ఇంతటి భారీ ఆర్థిక, సైనిక సంపదను కోల్పోవడం అమెరికా రక్షణ చరిత్రలోనే ఒక పెద్ద వైఫల్యంగా విశ్లేషకులు అభివర్ణిస్తున్నారు.

మరోవైపు ఇరాన్‌పై జరిగిన ఈ `ఆపరేషన్ ఎపిక్ ఫ్యూరీ`ని అమెరికా ఒంటరిగా చేయలేదు. ఇజ్రాయేల్‌తో కలిసి ఉమ్మడిగా ఈ సైనిక దాడులను నిర్వహించింది. అయితే ఈ యుద్ధంలో కేవలం అమెరికా మాత్రమే కాకుండా.. అమెరికా అండతో రెచ్చిపోయిన ఇజ్రాయేల్ కూడా భారీగానే నష్టపోయింది. యుద్ధ వ్యూహాల వైఫల్యం, ఇరాన్ ఎదురుదాడి కారణంగా ఇజ్రాయేల్ కోల్పోయిన సంపద, డాలర్ల నష్టంపై స్పష్టమైన తుది అంకెలు ఇంకా అధికారికంగా వెల్లడికావలసి ఉన్నా కానీ.. ఇజ్రాయేల్ సైన్యం కూడా రక్షణ కవచాల నిర్వహణ, క్షిపణి ప్రయోగాలు, అంతర్గత రక్షణ కోసం బిలియన్ల కొద్దీ నిధులను తగలేయాల్సి వచ్చింది. ఈ ఉమ్మడి దాడుల వల్ల ఇరు దేశాల రక్షణ వ్యవస్థలకు కోలుకోలేని దెబ్బ తగిలింది.

ఇరాన్‌తో పెట్టుకున్న ఈ వైరం కారణంగా అమెరికాకు, దాని మిత్రదేశమైన ఇజ్రాయేల్‌కు భారీగా ధన, వస్తు నష్టం సంభవించింది. కేవలం గాల్లో క్షిపణులు, యుద్ధ విమానాలతో ఇరాన్‌ను లొంగదీసుకోవచ్చనే ట్రంప్ నాటి అనాలోచిత వ్యూహాలు వికటించాయని ఈ కాంగ్రెస్ రిపోర్ట్ పరోక్షంగా స్పష్టం చేస్తోంది. భవిష్యత్తులో గల్ఫ్ ప్రాంతంలో అమెరికా తన సైనిక ఆధిపత్యాన్ని ప్రదర్శించే ముందు.. ఈ 29 బిలియన్ డాలర్ల నష్టాన్ని.. 42 యుద్ధ విమానాల విధ్వంసాన్ని కచ్చితంగా పునరాలోచించుకోవాల్సిన పరిస్థితి ఏర్పడింది.