అమెరికా.. కక్కలేక.. మింగలేక.. నిండా మునిగింది..

పశ్చిమాసియాలో యుద్ధ మేఘాలు ప్రస్తుతానికి వీడినట్లు కనిపిస్తున్నా.. తెర వెనుక మాత్రం ఉద్రిక్తతలు ఇంకా నివురు గప్పిన నిప్పులాగే ఉన్నాయి. ఇటీవల ప్రకటించిన కాల్పుల విరమణ కేవలం ఒక విరామం మాత్రమేనని.. అమెరికా , ఇరాన్ మధ్య అసలు సిసలైన ఘర్షణ ఇప్పుడే మొదలైందని అంతర్జాతీయ విశ్లేషకులు అభిప్రాయపడుతున్నారు. యుద్ధరంగంలో తుపాకుల మోత ఆగిపోయినప్పటికీ, దౌత్యపరమైన, ఆర్థిక పరమైన యుద్ధం తీవ్ర రూపం దాల్చుతోంది.

వ్యూహాత్మక దాడులు.. అంచనాకు చిక్కని నష్టం

ఫిబ్రవరి 28న అమెరికా, ఇజ్రాయెల్ సంయుక్తంగా ఇరాన్‌పై దాడులు ప్రారంభించడంతో ఈ వివాదం పతాక స్థాయికి చేరింది. దీనికి ప్రతిగా టెహ్రాన్ తన సైనిక సామర్థ్యాన్ని ప్రదర్శిస్తూ గల్ఫ్ ప్రాంతంలోని అమెరికా సైనిక స్థావరాలపై విరుచుకుపడింది. అమెరికాకు చెందిన కమాండ్ సెంటర్లు, ఆయుధ నిల్వ కేంద్రాలు, రాడార్ వ్యవస్థలు, విమానాశ్రయ రన్‌వేలే లక్ష్యంగా ఇరాన్ ప్రతీకార దాడులు చేసింది.

అత్యాధునిక రక్షణ వ్యవస్థలు కలిగిన అమెరికాను ఢీకొనేందుకు ఇరాన్ తన పాత తరహా ఎఫ్-5 యుద్ధవిమానాలను రంగంలోకి దించడం రక్షణ నిపుణులను విస్మయానికి గురిచేసింది. ఈ పాత విమానాల ద్వారా జరిగిన దాడులను అమెరికా రక్షణ కవచాలు పూర్తిగా అడ్డుకోలేకపోయాయనే వార్తలు అమెరికా సైనిక పటిష్టతపై ప్రశ్నలు లేవనెత్తుతున్నాయి.

ట్రంప్ యంత్రాంగం మౌనం.. పెరుగుతున్న అసంతృప్తి

యుద్ధంలో అమెరికాకు జరిగిన ప్రాణ, ఆస్తి నష్టంపై డొనాల్డ్ ట్రంప్ నేతృత్వంలోని ప్రభుత్వం మౌనం వహించడం ఇప్పుడు పెద్ద చర్చకు దారితీసింది. పారదర్శకత లేకపోవడంపై కేవలం ప్రతిపక్షాలే కాకుండా రిపబ్లికన్ పార్టీలోని కీలక నేతలు కూడా అసంతృప్తి వ్యక్తం చేస్తున్నారు. అసలు ఎంతమంది సైనికులు గాయపడ్డారు? ఎంత మేర మౌలిక సదుపాయాలు ధ్వంసమయ్యాయి? అనే విషయాలను గోప్యంగా ఉంచడం వెనుక రాజకీయ కారణాలు ఉండొచ్చని భావిస్తున్నారు.

ఆర్థిక భారంతో కుదేలవుతున్న బడ్జెట్

ఈ యుద్ధం కేవలం సైనిక పరంగానే కాకుండా అమెరికా ఆర్థిక వ్యవస్థపై కూడా పెను ప్రభావాన్ని చూపుతోంది. ఘర్షణ మొదలైన మొదటి వారంలోనే అమెరికా దాదాపు 11 బిలియన్ డాలర్లను కోల్పోయిందని అంచనా. యుద్ధ పరిస్థితులను తట్టుకోవడానికి.. దెబ్బతిన్న సైనిక వ్యవస్థలను పునరుద్ధరించడానికి పెంటగాన్ అదనంగా 200 బిలియన్ డాలర్లను పార్లమెంటును కోరినట్లు సమాచారం. ఇప్పటికే ట్రంప్ ప్రతిపాదించిన 1.5 ట్రిలియన్ డాలర్ల భారీ రక్షణ బడ్జెట్ ఆమోదం పొందే క్రమంలో ఉండగా ఈ అదనపు భారం అమెరికా పౌరులపై పన్నుల రూపంలో పడే అవకాశం ఉంది.

భవిష్యత్తు పరిణామాలు..శాంతి సాధ్యమేనా?

ప్రస్తుతానికి కాల్పుల విరమణ అమల్లో ఉన్నా, ఇరు దేశాల మధ్య విశ్వాసం పూర్తిగా దెబ్బతింది. అంతర్జాతీయ ఇంధన మార్కెట్లు ఈ ఉద్రిక్తతల వల్ల అస్థిరంగా మారాయి. ముడి చమురు ధరలు పెరిగే అవకాశం ఉండటంతో ప్రపంచ దేశాలు ఆందోళన చెందుతున్నాయి.

అమెరికా తన ఆధిపత్యాన్ని నిలుపుకోవడానికి ప్రయత్నిస్తుండగా ఇరాన్ తన ఉనికిని చాటుకునేందుకు ఏ స్థాయికైనా వెళ్లేందుకు సిద్ధమని సంకేతాలిస్తోంది. చర్చల ద్వారా పరిష్కారం లభించకపోతే ఈ తాత్కాలిక శాంతి మళ్ళీ ఒక భారీ యుద్ధానికి నాంది కావచ్చు. ప్రపంచ శాంతి.. అంతర్జాతీయ రాజకీయ సమతుల్యత ఇప్పుడు ఈ రెండు దేశాల తదుపరి అడుగులపైనే ఆధారపడి ఉన్నాయి.