సముద్ర గర్భంలో ఏం జరుగుతోంది? డిజిటల్ ఇండియాకు ప్రమాదం పొంచి ఉందా..?

మనం స్మార్ట్‌ఫోన్లలో వాడే ఇంటర్నెట్ అంతా సాటిలైట్ల ద్వారా వస్తుందని చాలా మంది అనుకుంటారు. కానీ అసలు నిజం ఏమిటంటే, ప్రపంచవ్యాప్త ఇంటర్నెట్ ట్రాఫిక్‌లో 95 శాతానికి పైగా సముద్రగర్భంలో వేల కిలోమీటర్ల మేర పరచి ఉన్న సబ్‌సీ కేబుళ్ల ద్వారానే వస్తుంది. ఇప్పుడు పశ్చిమాసియాలో ముదురుతున్న యుద్ధ మేఘాలు ఈ కేబుళ్లకు ముప్పుగా మారడం అంటే.. అది నేరుగా మన డిజిటల్ జీవననాడిని తెంచడమే. ఇరాన్ లేదా హూతీ రెబల్స్ ఈ కేబుళ్లను టార్గెట్ చేస్తే, కేవలం సోషల్ మీడియా మాత్రమే కాదు, బ్యాంకింగ్ నుంచి ఏఐ సర్వీసుల వరకు అన్నీ స్తంభించిపోయే ప్రమాదం ఉంది. అందుకే కేంద్ర ప్రభుత్వం ఈ విషయంలో అప్రమత్తమై టెలికాం సంస్థలకు కొన్ని ఆదేశాలు జారీ చేసింది.

డిజిటల్ హైవేలకు ముప్పు

ప్రపంచ ఇంటర్నెట్ వ్యవస్థకు పశ్చిమాసియాలోని జలసంధులు అత్యంత కీలకమైన కూడళ్లు.

ఇరాన్ ప్రభావం ఉన్న హర్మూజ్ జలసంధి, హూతీలు తిష్టవేసిన ఎర్ర సముద్రంలోని బాబ్ అల్ మందేబ్ జలసంధి గుండానే మెజారిటీ కేబుళ్లు వెళ్తున్నాయి. భారత్ నుంచి అమెరికా, యూరప్‌కు వెళ్లే డేటా ట్రాఫిక్‌లో మూడింట ఒక వంతు ఈ మార్గం నుంచే సాగుతుంది. ఒకవేళ ఇక్కడ కేబుళ్లు తెగిపోతే, మన దేశంలోని ఐటీ కంపెనీలు, ఈ-కామర్స్, అంతర్జాతీయ బ్యాంకింగ్ లావాదేవీలపై ప్రభావం పడుతుంది.

సవాలుతో కూడిన వ్యవహారం!

కేంద్ర ప్రభుత్వం ఇప్పటికే డిపార్ట్‌మెంట్ ఆఫ్ టెలికమ్యూనికేషన్స్ (DoT) ద్వారా టెలికాం కంపెనీలతో సమావేశం నిర్వహించింది. ఒకవేళ పశ్చిమాసియా మార్గం మూసుకుపోతే డేటాను మళ్లించడానికి ఉన్న మార్గాలపై చర్చించారు. డేటాను సింగపూర్ మీదుగా మళ్లించవచ్చు కానీ, అక్కడ ఉన్న మౌలిక సదుపాయాల సామర్థ్యం పరిమితం. ఇది సుదీర్ఘమైన మార్గం కావడం వల్ల డేటా ప్రాసెసింగ్ వేగం నెమ్మదిస్తుంది. అంటే వీడియో కాల్స్‌లో జాప్యం, గేమింగ్‌లో సమస్యలు తలెత్తుతాయి. ప్రత్యామ్నాయ మార్గాల ద్వారా డేటా పంపడం టెలికాం కంపెనీలకు భారీ ఆర్థిక భారంతో కూడుకున్న పని.

ప్రభావితమవుతున్న నెట్‌వర్క్‌లు

సముద్రంలో యుద్ధ వాతావరణం నెలకొనడంతో కేబుల్స్ దెబ్బతింటే వాటిని బాగుచేసే 'రిపేర్ షిప్స్' తమ విధులను నిలిపివేశాయి. ఇప్పటికే టాటా కమ్యూనికేషన్స్ (TGN-గల్ఫ్), ఎయిర్‌టెల్, జెడ్డా సమీపంలోని ఫాల్కన్ కేబుల్స్ ప్రభావితమైనట్లు వార్తలు వస్తున్నాయి. మరోవైపు రిలయన్స్ జియో, గ్లోబల్ టెక్ సంస్థలు నిర్మిస్తున్న కొత్త కేబుళ్లు కూడా ఇదే ప్రమాదకర కారిడార్ వెంబడి ఉండడం భవిష్యత్తు ప్రాజెక్టులపై నీలి నీడలు కమ్ముకునేలా చేస్తోంది.

ఇరాన్‌తో చర్చలే శరణ్యం!

ఈ కేబుళ్లు పూర్తిగా ధ్వంసమయ్యే అవకాశం తక్కువని టెక్ నిపుణులు చెబుతున్నప్పటికీ, భద్రత విషయంలో రాజీ పడలేం. సముద్రగర్భ మౌలిక సదుపాయాల భద్రత కోసం ఇరాన్ వంటి దేశాలతో భారత్ దౌత్యపరమైన చర్చలు జరపాలని టెలికాం ఆపరేటర్లు కోరుతున్నారు. కేబుళ్లు భౌతికంగా తెగిపోతే కేవలం ఇంటర్నెట్ వేగం తగ్గడమే కాదు, గ్లోబల్ పేమెంట్స్ నిలిచిపోయి దేశ ఆర్థిక వ్యవస్థకు పెను నష్టం వాటిల్లుతుందని అధికారులు హెచ్చరిస్తున్నారు.

మనం పూర్తిగా డిజిటల్ లావాదేవీలపై ఆధారపడుతున్న ఈ సమయంలో, సబ్‌సీ కేబుళ్ల భద్రత అనేది దేశ భద్రతతో సమానం. యుద్ధం కారణంగా ఒకవేళ ఇంటర్నెట్ సేవలు మందగిస్తే, దానిని తట్టుకోవడానికి మన వద్ద ఉన్న ప్రత్యామ్నాయ ప్రణాళికలే మనల్ని కాపాడతాయి. ప్రభుత్వం, టెలికాం కంపెనీలు సమన్వయంతో పనిచేసి డేటా ట్రాఫిక్‌ను సురక్షిత మార్గాల్లోకి మళ్లించగలిగితేనే ఈ గండం నుండి గట్టెక్కగలం.