విజ‌య్ (X) ఉద‌య‌నిధి: తంబీ పాలిటిక్స్‌లో కాక‌లు.. ఒక స్త్రీపై కామెంట్ చేస్తే శంక‌ర‌మాన్యాలే సుమీ!

తమిళనాడు రాజకీయం మునుపటి కంటే భిన్నంగా ఉంటుందని భావించిన వారికి మళ్లీ పాత దృశ్యాలే పునరావృతమవుతున్నాయి. `పాత సీసాలో కొత్త సారా` చందంగా అక్కడి రాజకీయ వాతావరణం మారింది. ముఖ్యమంత్రి విజయ్ నేతృత్వంలోని `తమిళగ వెట్రి కళగం` (టీవీకే) ప్రభుత్వం .. ప్రతిపక్ష డీఎంకే మధ్య తొలి రోజే తీవ్ర రాజకీయ శత్రుత్వం బహిర్గతమైంది. తమిళ సీనియర్ నటితో ముఖ్యమంత్రి విజయ్‌కి ఉన్న అనుబంధాన్ని ఉద్దేశించి అసభ్యకర రీతిలో వ్యాఖ్యలు చేశారనే ఆరోపణలతో ప్రతిపక్ష నేత ఉదయనిధి స్టాలిన్‌ను పోలీసులు అరెస్ట్ చేసి కొన్ని గంటల పాటు విచారించిన అనంతరం స్టేషన్ బెయిల్‌పై విడుదల చేశారు.

ఈ అరెస్టు తదనంతర పరిణామాలు తమిళనాట తీవ్ర రాజకీయ దుమారాన్ని రేపాయి. సెంగిపట్టి పోలీస్ స్టేషన్ నుంచి ఉదయనిధి బయటకు రాగానే వందలాది మంది డిఎంకె గుంపులు ఆయనకు ఘనస్వాగతం పలికాయి. ఈ సందర్భంగా ఉదయనిధి మాట్లాడుగూ.. ప్రభుత్వ వైఫల్యాల నుంచి ప్రజల దృష్టి మళ్లించడానికే ఈ డైవర్షన్ పాలిటిక్స్ చేస్తున్నారు. నేనేమీ తప్పుగా మాట్లాడలేదు... కావేరీ జలాల గురించే మాట్లాడాను. ఇటువంటి అక్రమ కేసులకు.. ఈ `సర్కస్ క్యాంప్` ప్రభుత్వానికి భయపడేదే లేదు! అని టీవీకే ప్రభుత్వంపై తీవ్ర స్థాయిలో విరుచుకుపడ్డారు.

మరోవైపు ఈ అరెస్టుపై రాజకీయ పోరు తీవ్రరూపం దాల్చింది. మాజీ సీఎం ఎకే స్టాలిన్ తన కుమారుడి అరెస్టును తీవ్రంగా ఖండించగా.... ఏఐఏడిఎంకే నేత పళనిస్వామి సైతం అరెస్టైయిన తీరును తప్పుపట్టారు. దీనిపై స్పందించిన విద్యుత్ శాఖ మంత్రి నిర్మల్ కుమార్.. పళనిస్వామి అవకాశవాద రాజకీయాలు చేస్తున్నారని మండిపడ్డారు. గతంలో జయలలిత లేదా ఎంజీఆర్ తమపై లేదా పార్టీపై అసభ్యకర వ్యాఖ్యలు వస్తే ఎలా స్పందించేవారో.... సీఎం విజయ్ కూడా చట్టప్రకారమే అలాగే కఠినంగా వ్యవహరించారని... మహిళలను కించపరిచేలా మాట్లాడితే సహించేది లేదని మంత్రి సగర్వంగా సమర్థించుకున్నారు.

అయితే తమిళనాడు చరిత్ర తిరగేస్తే... అధికారంలో ఉన్నవారు ప్రతిపక్ష నేతలను అరెస్ట్ చేయడం కొత్తేమీ కాదు. 1996లో కరుణానిధి సీఎంగా ఉన్నప్పుడు అవినీతి కేసులో జయలలిత అరెస్టయ్యారు. ఆ తర్వాత 2001లో జయలలిత అధికారంలోకి రాగానే అర్ధరాత్రి వేళ 78 ఏళ్ల కరుణానిధిని ఫ్లైఓవర్ స్కామ్ కేసులో ఈడ్చుకెళ్లి మరీ అరెస్ట్ చేయించారు. ఆ తర్వాత 2011లో ఎంకే స్టాలిన్‌ను కూడా జయలలిత ప్రభుత్వం అరెస్ట్ చేయించింది. ఇప్పుడు సీఎం మారినా... కొత్త పార్టీ అధికారంలోకి వచ్చినా ఆ కక్షసాధింపు రాజకీయాల సంస్కృతి మాత్రం మారలేదు.

మొత్తానికి... ఉదయనిధి వ్యాఖ్యల వివాదం టీవీకే, డీఎంకే మధ్య ఒక పెద్ద యుద్ధానికే దారితీసింది. రాజకీయాల్లో కొత్త మార్పు తీసుకు వస్తామని ప్రకటించి అధికారంలోకి వచ్చిన సీఎం విజయ్ ప్రభుత్వం కూడా.. పాత ప్రభుత్వాల తరహాలోనే పోలీసు బలగాన్ని ఉపయోగించి ప్రతిపక్షం నోళ్లు మూయించే ప్రయత్నం చేస్తోందనే విమర్శలు వెల్లువెత్తుతున్నాయి. ఈ అరెస్టు రాజకీయంగా ఉదయనిధికే మైలేజ్ ఇస్తుందా లేక టీవీకే తన పట్టును నిలుపుకుంటుందో కాలమే నిర్ణయించాలి. ఇక ఇదే వివాదంలో స్త్రీలు లేదా మ‌హిళ‌ల‌పై ఏదైనా త‌ప్పుడు కామెంట్ చేస్తే స్త్రీల ప‌వ‌ర్ ఎలా ఉంటుందో నిరూప‌ణ అవుతోందంటూ నెటిజ‌నుల్లో చ‌ర్చ ఆస‌క్తిని రేకెత్తిస్తోంది. కొంద‌రు నెటిజ‌నులు స్త్రీల వైపు చ‌ట్టాలు ఎలా ఒదిగి ఉంటాయో కూడా ఆ సంద‌ర్భానికి ఆపాదించి విశ్లేషిస్తున్నారు.