112 అణు క్షిపణులు మరీ.. కొరియా కిమ్ కు ట్రంప్ భయపడుతున్నట్టేనా?

అమెరికా అధ్యక్షుడు డొనాల్డ్ ట్రంప్ మరోసారి ఉత్తర కొరియా అధినేత కిమ్ జోంగ్ ఉన్‌తో తనకున్న వ్యక్తిగత సంబంధాలపై ఆసక్తికర వ్యాఖ్యలు చేశారు. ఒహియోలో జరిగిన ఒక భారీ ప్రచార సభలో ప్రసంగించిన ఆయన.. అణ్వాయుధ దేశాలతో అమెరికా ఎలా వ్యవహరించాలనే అంశంపై తన విధానాన్ని గట్టిగా సమర్థించుకున్నారు. కిమ్‌తో తన సంబంధాలు ఇప్పటికీ “చాలా బాగున్నాయి” అని చెప్పడంతో పాటు.. ఉత్తర కొరియా వద్ద ఉన్న అణు సామర్థ్యాన్ని ప్రస్తావిస్తూ ఆయన చేసిన వ్యాఖ్యలు ఇప్పుడు అంతర్జాతీయ రాజకీయాల్లో తీవ్ర చర్చనీయాంశంగా మారాయి. 112 అణు క్షిపణులున్న ఉత్తరకొరియాతో ట్రంప్ చాలా జాగ్రత్తగా మాట్లాడుతున్నట్టు తేటతెల్లమైంది.

దౌత్య వ్యూహమా? వ్యక్తిగత సాన్నిహిత్యమా?

గతంలో తమ పాలనా కాలంలో ఉత్తర కొరియాతో ఉన్న తీవ్ర విభేదాలను పక్కనపెట్టి కిమ్‌తో నేరుగా శిఖరాగ్ర సమావేశాలు జరిపిన చరిత్ర ట్రంప్‌కు ఉంది. శత్రుత్వం, బెదిరింపుల కంటే ప్రత్యక్ష దౌత్యానికే తాను మొదటి ప్రాధాన్యం ఇస్తానని ఆయన మరోసారి స్పష్టం చేశారు. ప్రపంచవ్యాప్తంగా అణ్వాయుధాల సంఖ్య పెరుగుతున్న ప్రస్తుత తరుణంలో ఆయా దేశాల అగ్ర నేతలతో నిరంతరం సంభాషణలు కొనసాగించడమే అమెరికాకు సురక్షితమైన వ్యూహమని ట్రంప్ వాదించారు. ప్రత్యక్షంగా మాట్లాడటం వల్లే తమ హయాంలో తీవ్ర ఉద్రిక్తతలు తగ్గాయని ఆయన గుర్తుచేశారు.

"112 అణు క్షిపణులు" ప్రస్తావన కలకలం

ఈ ప్రసంగంలో అందరి దృష్టినీ ఆకర్షించిన ముఖ్యమైన అంశం ట్రంప్ ప్రస్తావించిన "112 అణు క్షిపణులు" అనే సంఖ్య. ఉత్తర కొరియా అణు సామర్థ్యం గురించి మాట్లాడుతున్న సమయంలో ఆయన ఈ ఖచ్చితమైన సంఖ్యను పేర్కొనడం పలు అనుమానాలకు, విశ్లేషణలకు తావిచ్చింది.

సాధారణంగా ఉత్తర కొరియా అణు అణ్వాయుధాలు, క్షిపణుల వివరాలను గోప్యంగా ఉంచుతుంది. అంతర్జాతీయ రక్షణ నిపుణులు, నిఘా వర్గాలు ఆ దేశపు అణు సామర్థ్యాన్ని అంచనా వేస్తారే తప్ప ఖచ్చితమైన సంఖ్యను అధికారికంగా నిర్ధారించడం చాలా కష్టం. ఈ నేపథ్యంలో ట్రంప్ చెప్పిన "112" అనే సంఖ్య వాస్తవ నిఘా సమాచారమా లేదా ఆ దేశం వల్ల ఉన్న ముప్పు తీవ్రతను సూచించడానికి చెప్పిన రాజకీయ వ్యాఖ్యానా అనేది స్పష్టత రావాల్సి ఉంది. నిపుణుల అభిప్రాయం ప్రకారం దీనిని కేవలం ఉత్తర కొరియా అణు ముప్పు ఎంత తీవ్రంగా ఉందో అమెరికన్ ప్రజలకు వివరించేందుకు ట్రంప్ వాడిన ఒక సంఖ్యగా మాత్రమే చూడాలి.

విమర్శలకు గట్టి సమాధానం

అణ్వాయుధ దేశాల నేతలతో ముఖ్యంగా నియంతృత్వ ధోరణి కలిగిన కిమ్ జోంగ్ ఉన్‌తో సన్నిహితంగా వ్యవహరించడంపై ట్రంప్‌పై గతంలో అమెరికా విదేశాంగ వర్గాల నుంచి తీవ్ర విమర్శలు వచ్చాయి. అయితే ఈ విమర్శలన్నింటినీ ట్రంప్ కొట్టిపారేస్తున్నారు. ప్రత్యక్ష చర్చల ద్వారా మాత్రమే పెద్ద ప్రమాదాలను నివారించవచ్చని కిమ్‌తో తనకున్న ఈ "మంచి సంబంధాలు" అమెరికా భద్రతకు ప్లస్ పాయింట్ అవుతాయని ఆయన విశ్వసిస్తున్నారు.

భవిష్యత్ సంబంధాల్లో కొత్త మలుపులు?

ఉత్తర కొరియా వరుస క్షిపణి ప్రయోగాలు చేస్తూ అమెరికాకు, దాని మిత్రదేశాలకు సవాలు విసురుతున్న నేపథ్యంలో ట్రంప్ చేసిన ఈ వ్యాఖ్యలు ప్రాధాన్యత సంతరించుకున్నాయి. భవిష్యత్తులో ట్రంప్ మళ్లీ అధికారంలోకి వస్తే అమెరికా-ఉత్తర కొరియా మధ్య మరొక విడత నేరుగా చర్చలు ప్రారంభమయ్యే అవకాశాలు ఉన్నాయని ఈ ప్రసంగం సూచిస్తోంది. ఏది ఏమైనప్పటికీ ఒహియో సభలో ట్రంప్ చేసిన ప్రసంగం కేవలం కిమ్‌తో తన స్నేహాన్ని చాటుకోవడానికే కాకుండా అంతర్జాతీయ అణు వ్యూహంపై కొత్త చర్చకు తెరలేపింది.