ట్రంప్ కాల్స్‌ను మోదీ పట్టించుకోలేదా?

జర్మనీకి చెందిన ప్రముఖ మీడియా సంస్థ ఫ్రాంక్‌ఫుర్టర్ ఆల్గెమైన్ జైటుంగ్ (FAZ) ప్రచురించిన సంచలన కథనం ప్రకారం, అమెరికా అధ్యక్షుడు డొనాల్డ్ ట్రంప్ ఇటీవల కాలంలో భారత ప్రధాని నరేంద్ర మోదీకి సుంకాల విషయంలో ఒత్తిడి తీసుకురావడానికి అనేక సార్లు ఫోన్ కాల్స్ చేశారు. కానీ మోదీ ఆ కాల్స్‌కు స్పందించలేదని, సమాధానం ఇవ్వలేదని ఆ కథనం పేర్కొంది. ఈ వార్త ప్రపంచవ్యాప్తంగా రాజకీయ, ఆర్థిక వర్గాల్లో చర్చకు దారి తీసింది.

ట్రంప్ వ్యూహం, మోదీ ప్రతిఘటన

ట్రంప్ రెండోసారి అధ్యక్షుడు అయ్యాక 'అమెరికా ఫస్ట్' అనే విధానాన్ని అనుసరిస్తూ అనేక దేశాలపై భారీగా సుంకాలు విధించారు. ముఖ్యంగా వాణిజ్య లోటు ఉన్న దేశాలైన చైనా, యూరోపియన్ యూనియన్ (EU) వంటి వాటిని టారిఫ్స్ తో భయపెట్టారు. ఈ వ్యూహం ద్వారా అనేక దేశాలు ఆయన ఒత్తిళ్లకు లొంగి, వాణిజ్య ఒప్పందాలను సవరించుకోవాల్సి వచ్చింది. అయితే భారతదేశం విషయంలో ఆయన వ్యూహాలు ఫలించలేదని FAZ పత్రిక తన కథనంలో స్పష్టం చేసింది.

FAZ కథనం ప్రకారం.. ట్రంప్ భారతదేశంపై వాణిజ్య సుంకాలు విధించి, దెబ్బ తీయాలని ప్రయత్నించారు. అయితే మోదీ ప్రభుత్వం అమెరికా దిగుమతులపై ప్రతిస్పందనగా సుంకాలు పెంచింది. ఈ గట్టి వైఖరి అమెరికా ప్రభుత్వాన్ని ఆశ్చర్యపరిచిందని కథనం పేర్కొంది. ట్రంప్ తరచుగా మోదీకి ఫోన్ చేసి, టారిఫ్‌ల గురించి మాట్లాడాలని ప్రయత్నించారు. కానీ మోదీ వాటికి స్పందించకపోవడంతో ట్రంప్ ప్రయత్నాలు విఫలమయ్యాయి. "టారిఫ్స్ అనే ఆయుధాన్ని ఉపయోగించి ట్రంప్ అనేక దేశాలను వెనక్కి తగ్గించాడు. కానీ భారతదేశం విషయంలో ఆయన ప్రయత్నాలు విఫలమయ్యాయి" అని ఆ జర్మన్ పత్రిక స్పష్టంగా చెప్పింది.

- ప్రపంచవ్యాప్తంగా చర్చ.. భారత్ వైఖరిపై ఆసక్తి

ఈ వార్త ప్రపంచవ్యాప్తంగా మోదీ ధైర్యసాహసాలపై చర్చకు దారి తీసింది. అమెరికా వంటి ఒక సూపర్ పవర్ ఒత్తిడిని ఎదుర్కొని, భారతదేశం తన ఆర్థిక ప్రయోజనాలను కాపాడుకుందనే అభిప్రాయం అంతర్జాతీయ వర్గాల్లో బలంగా వినిపిస్తోంది. మోదీ నాయకత్వంలో భారతదేశం ఒక స్వతంత్రమైన, దృఢమైన విదేశాంగ విధానాన్ని అనుసరిస్తోందనడానికి ఇది ఒక గొప్ప ఉదాహరణగా నిలుస్తుందని విశ్లేషకులు అభిప్రాయపడుతున్నారు.

భారత ప్రభుత్వం అధికారిక స్పందన కోసం వేచి చూస్తున్నారు. అయితే ఈ కథనం ఇప్పటికే అంతర్జాతీయ రాజకీయాల్లో భారతదేశ ప్రతిష్టను పెంచిందని చెప్పవచ్చు. అనేక దేశాలు తమ స్వంత ప్రయోజనాల కోసం రాజీపడ్డ సమయంలో భారత్ మాత్రం తన ప్రయోజనాల కోసం దృఢంగా నిలబడింది. ఇది భారతదేశం యొక్క వాణిజ్య, ఆర్థిక విధానాల్లో స్వయంప్రతిపత్తిని సూచిస్తుంది.

- భారత అంతర్జాతీయ ఇమేజ్

ట్రంప్ పాలనలో అనేక దేశాలు వాణిజ్య ఒప్పందాల కోసం రాజీ పడగా.. భారత్ మాత్రం తలొగ్గలేదన్న జర్మన్ మీడియా కథనం మోదీ అంతర్జాతీయ ఇమేజ్‌ను మరింత బలపరుస్తుందనడంలో సందేహం లేదు. ఈ సంఘటన భారతదేశం యొక్క ఆర్థిక సార్వభౌమత్వానికి ఒక బలమైన సంకేతం. ఇది భవిష్యత్తులో ఇతర దేశాలతో వాణిజ్య చర్చలలో భారతదేశానికి మరింత బలం చేకూరుస్తుంది.