పిచ్చి పీక్స్.. బతికుండగానే నాణేలు వేసుకున్న ట్రంప్

అమెరికాలో సంచలనం సృష్టించిన ఒక వార్త ఇప్పుడు ప్రపంచ వ్యాప్తంగా చర్చనీయాంశమైంది. అమెరికా 250వ వార్షికోత్సవం (క్వార్టర్‌-మిలీనియం) సందర్భంగా విడుదల చేయబోయే ప్రత్యేక స్మారక $1 నాణెం డిజైన్ ఒకటి ప్రస్తుతం సోషల్ మీడియాలో అగ్గిరాజేస్తోంది. ఈ నాణెంపై ప్రస్తుత అధ్యక్షుడు డొనాల్డ్ ట్రంప్ బొమ్మ ఉండటమే ఈ వివాదానికి మూలం.

ట్రెజరర్‌ ధృవీకరణతో నిజమైన 'వివాదం'

సోషల్ మీడియా వేదిక X లో వేలల్లో షేర్ అవుతున్న ఈ డిజైన్ ఫేక్ న్యూస్ కాదని స్వయంగా అమెరికా ట్రెజరర్ బ్రాండన్ బీచ్ ధృవీకరించడంతో ఈ చర్చ మరింత రాజుకుంది. "ఇది ఫేక్ న్యూస్ కాదు. ఈ డిజైన్‌లు అమెరికా చరిత్రలోని కీలక ఘట్టాలను గుర్తు చేసే ప్రత్యేక ప్రయత్నాల్లో భాగం" అని ఆయన ప్రకటించారు. ట్రంప్‌ అభిమానులకు ఇది గర్వకారణంగా మారగా, చట్ట నిపుణులకు, ప్రతిపక్షాలకు మాత్రం ఇది అధ్యక్షుడి 'పిచ్చి పీక్స్'గా కనిపిస్తోంది.

*డిజైన్‌లో ఏముంది? – నిబంధనలకు విరుద్ధంగా!

ప్రస్తుతం వైరల్ అవుతున్న డిజైన్ వివరాలు ఇలా ఉన్నాయి. నాణెం ముందు భాగంలో ట్రంప్ యొక్క ప్రొఫైల్ చిత్రం ఉంది. దీని పైభాగంలో “Liberty” అని, దిగువన “In God We Trust” అని ముద్రించబడింది. మధ్యలో 1776 – 2026 సంవత్సరాలు సూచించబడ్డాయి. అత్యంత వివాదాస్పదమైనది ఈ వెనుక భాగంలో ఉన్న చిత్రం. ఇందులో 2014లో పెన్సిల్వేనియాలో జరిగిన హత్యాయత్నం అనంతరం ట్రంప్ తన ముష్టిని గట్టిగా ఎత్తి చూపుతున్న దృశ్యం పొందుపరిచారు. ఆ చిత్రానికి పైభాగంలో “Fight Fight Fight” అనే పదాన్ని ముద్రించడం గమనార్హం.

*చట్టం ఏం చెబుతోంది? - ట్రంప్‌కు ఎదురు దెబ్బ!

అమెరికన్ కాయిన్ చట్టం ప్రకారం, ఈ డిజైన్ పై చట్టపరమైన అభ్యంతరాలు వెల్లువెత్తుతున్నాయి. నిబంధనల ప్రకారం.. జీవించి ఉన్న వారి చిత్రం ఉండకూడదు. అమెరికా చట్టం ప్రకారం.. ప్రస్తుతం ఉన్న లేదా జీవించి ఉన్న అధ్యక్షుడి చిత్రం ఏ నాణెం లేదా నోటుపై కూడా ముద్రించకూడదు. వారు మరణించిన రెండేళ్ల తరువాత మాత్రమే అటువంటి చిత్రం ముద్రించడానికి అనుమతి ఉంది. ఒకే వ్యక్తి రెండు బొమ్మలు నిషిద్ధం. నాణెం రెండు వైపులా (ముందు, వెనుక) ఒకే వ్యక్తి యొక్క పూర్తి లేదా భుజాల వరకు ఉన్న చిత్రాన్ని ఉంచడాన్ని కూడా చట్టం స్పష్టంగా నిషేధిస్తోంది. ముందు భాగంలో ఉన్న ట్రంప్ ప్రొఫైల్ చిత్రం పరిమితంగా ఉండటంతో చట్టపరంగా తప్పించుకోవచ్చని కొందరు భావిస్తున్నప్పటికీ, వెనుక భాగంలో ఉన్న ముష్టి ఎత్తి చూపుతున్న పూర్తి చిత్రం చట్టాన్ని స్పష్టంగా ఉల్లంఘిస్తుందని నిపుణులు హెచ్చరిస్తున్నారు.

*ట్రెజరీ ఇంకా తుది నిర్ణయం తీసుకోలేదు!

ఈ డిజైన్‌లు వైరల్ అవుతున్నప్పటికీ.. ఒక ఉపశమనం కలిగించే విషయం ఏమిటంటే.. అమెరికా ట్రెజరీ ఇప్పటివరకు ఏ డిజైన్‌ను కూడా తుది నిర్ణయానికి రాలేదని స్పష్టం చేసింది. అయితే "Circulating Collectible Coin Redesign Act" ప్రకారం... 2026-2027 మధ్య అమెరికా చరిత్రను ప్రతిబింబించేలా ప్రత్యేక $1 నాణేలను ముద్రించే అధికారం ట్రెజరీకి ఉంది. ట్రంప్ స్పందన తెలియకపోయినా.. వైట్‌హౌస్ ప్రెస్ సెక్రటరీ ఎమిలీ లెవిట్ మాత్రం, ట్రంప్ ఈ డిజైన్‌లు చూస్తే "దానిని ఖచ్చితంగా ఇష్టపడతారని" అభిప్రాయపడ్డారు.

చరిత్రలో అరుదైన అవకాశం!

ఈ నాణెం డిజైన్ గనుక ఆమోదం పొందితే, అది అమెరికా చరిత్రలో ఒక అరుదైన సందర్భం అవుతుంది. గతంలో 1926లో అప్పటి అధ్యక్షుడు కెల్విన్ కూలిడ్జ్‌ను స్మారకార్థంగా నాణెంలో చూపిన తరువాత, జీవించి ఉన్న అధ్యక్షుడి చిత్రం నాణెంపై ముద్రించడం ఇది మొదటి ఉదాహరణగా చరిత్రలో నిలుస్తుంది.

అయితే, ప్రస్తుత చట్టపరమైన అడ్డంకులను ట్రంప్ పరిపాలన ఎలా అధిగమిస్తుందో, అసలు ఈ నాణెం డిజైన్ తుది రూపం పొందుతుందో లేదో వేచి చూడాలి. ఏదేమైనా, 'పిచ్చి పీక్స్' అంటూ ట్రంప్ విమర్శకులకు ఒక ఆయుధంగా, అభిమానులకు ఒక గర్వకారణంగా ఈ నాణెం డిజైన్ చరిత్రలో నిలిచిపోయే అవకాశం ఉంది.