ఘోరం: రన్నింగ్ ట్రైన్ పై పడిన క్రేన్.. షాకింగ్ గా మృతుల సంఖ్య!

రన్నింగ్ ట్రైన్ కు పట్టాలపై చిన్న స్క్రూ లూజ్ అయినా, చిన్న ఇనుప ముక్క పట్టాలపై అడ్డంగా ఉన్న అది పెను ప్రమాదానికి దారి తీస్తుందని అంటారు. అలాంటిది రన్నింగ్ లో ఉన్న ట్రైన్ పై హఠాత్తుగా ఓ క్రేన్ జారిపడితే ఆ ఘోరం ఏ స్థాయిలో ఉంటుంది..? తాజాగా థాయిలాండ్ లో ఈ ఘోరమే చోటు చేసుకుంది. ఇందులో భాగంగా.. కదులుతున్న రైలుపై ఓ క్రేజ్ జారి పడటంతో బోగీలు పట్టాలు తప్పాయి. ఈ దుర్ఘటనలో 22 మంది మృతి చెందినట్లు స్థానిక పోలీసులు తెలిపారు.

అవును... థాయిలాండ్ లోని బ్యాంకాక్ నుండి ఈశాన్య ప్రావిన్స్ కు వెళ్తున్న రైలుపై నిర్మాణ క్రేన్ ఒక్కసారిగా పడిపోయింది. దీంతో పెను ప్రమాదం చోటు చేసుకుంది. ఈ ఘటనలో కనీసం 22 మంది మృతి చెందగా, 30 మంది వరకూ గాయపడ్డారని పోలీసులు తెలిపారు. బ్యాంకాక్ కు ఈశాన్యంగా 230 కి.మీ దూరంలో ఉన్న నఖోన్ రాట్చసిమా ప్రావిన్స్ లోని సిఖియో జిల్లాలో బుధవారం ఉదయం ఈ ప్రమాదం జరిగింది.

ఈ సందర్భంగా.. సోషల్ మీడియాలో ప్రసారం అవుతున్న ఈ ఘటనకు సంబంధించిన వీడియోల్లో.. రైలుకు తీవ్ర నష్టం వాటిల్లినట్లు కనిపిస్తుంది. ఈ సమయంలో.. పట్టాలు తప్పిన బోగీలలో చిక్కుకున్న ప్రయాణికులను సురక్షితంగా కాపాడటానికి రెస్క్యూ సిబ్బంది తీవ్రంగా ప్రయత్నించారు. అగ్నిమాపక సిబ్బంది, వైద్య బృందాలు సహా విపత్తు ప్రతిస్పందన విభాగాలు సంఘటనా స్థలానికి చేరుకుని సహాయ మరియు సహాయ చర్యలను చేపట్టారు. గాయపడినవారిని ఆస్పత్రికి తరలించారు.

ఈ సందర్భంగా స్పందించిన థాయిలాండ్ రవాణా మంత్రి ఫిఫాట్ రట్చకిత్ప్రాకర్న్... ప్రమాదం జరిగిన రైలులో సుమారు 195 మంది ప్రయాణికులు ఉన్నారని తెలిపారు. ఈ సమయంలో సమాచారం అందుకున్న వెంటనే బాధితులను గుర్తించడానికి, గాయపడిన వారికి వైద్య సహాయం అందించడానికి అధికారులు కృషి చేస్తున్నరని.. గాయపడినవారిలో చాలా మంది పరిస్థితి విషమంగా ఉన్నట్లు సమాచారం ఉందని అన్నారు! ఈ రైలుపై కూలిపోయిన క్రేన్.. $5.4 బిలియన్ల విలువైన హైస్పీడ్ రైలు ప్రాజెక్టులో భాగంగా చెబుతున్నారు!

ఈ సందర్భంగా స్పందించిన నఖోన్ రట్చసిమా ప్రావిన్స్ లోని స్థానిక పోలీసు చీఫ్ థాచపోన్ చిన్నవాంగ్... ఆ రైలు థాయిలాండ్ లోని ఉబోన్ రాట్చథాని ప్రావిన్స్ కు వెళ్తుందని.. ఈ సమయంలో హై-స్పీడ్ రైలు ప్రాజెక్టుపై పని చేస్తున్న ఓ క్రేన్ దానిపై కూలిపోయిందని తెలిపారు. ఈ ఘటనలో 22 మంది మరణించగా.. 30 మందికి పైగా గాయపడ్డారని తెలిపారు.