స్వతంత్రులే కింగ్ మేయర్లు.. హంగ్ మున్సిపాలిటీల్లో అధికారం ఎవరిది?

మున్సిపల్ ఎన్నికల ఫలితాలు రాష్ట్ర రాజకీయాల్లో ఆసక్తికర సమీకరణాలకు తెరలేపాయి. దాదాపు 30కి పైగా మున్సిపాలిటీల్లో ఏ పార్టీకి స్పష్టమైన మెజారిటీ రాకపోవడంతో హంగ్ పరిస్థితులు నెలకొన్నాయి. అయితే ఈ అనిశ్చితిని అవకాశంగా మార్చుకుని అధికార కాంగ్రెస్ పార్టీ పట్టణ పాలనపై పట్టు సాధించే దిశగా వ్యూహాత్మకంగా ముందుకు సాగుతోంది. ఫలితాల్లో తేడా ఉన్నా, రాజకీయ లెక్కల్లో ముందంజలో నిలిచే ప్రయత్నం చేస్తోంది.

అధికార పార్టీ వైపే ఇండిపెండెంట్లు

హంగ్ మున్సిపాలిటీల్లో స్వతంత్ర అభ్యర్థులే కీలక పాత్ర పోషిస్తున్నారు. ఆసక్తికర విషయం ఏమిటంటే గెలిచిన ఇండిపెండెంట్లలో చాలామంది కాంగ్రెస్ రెబల్స్ కావడం. టికెట్ రాకపోవడంతో బరిలోకి దిగి గెలిచిన వీరు ఇప్పుడు తిరిగి కాంగ్రెస్ గూటికి చేరేందుకు ఆసక్తి చూపుతున్నారు. దీంతో హంగ్‌గా ఉన్న అనేక మున్సిపాలిటీల్లో కాంగ్రెస్‌కు స్పష్టమైన ఆధిక్యం ఏర్పడే అవకాశాలు కనిపిస్తున్నాయి.

ఎక్స్ అఫీషియో ఓట్లు గేమ్ చేంజర్

మెజారిటీకి తక్కువ దూరంలో నిలిచిన చోట్ల ఎక్స్-అఫీషియో ఓట్లు కీలకంగా మారనున్నాయి. ఎమ్మెల్యేలు, ఎమ్మెల్సీలు, ఎంపీలకు ఉన్న ఈ ఓటు హక్కు ఛైర్మన్ ఎన్నికల్లో తుది ఫలితాన్ని ప్రభావితం చేస్తుంది. అధికారంలో ఉన్న కాంగ్రెస్‌కు ఎక్కువ నియోజకవర్గాల్లో ప్రజాప్రతినిధులు ఉండటం వల్ల ఈ అంశం పెద్ద ప్లస్‌గా మారుతోంది. ఇప్పటికే గెలిచిన సీట్లతో పాటు ఇండిపెండెంట్ల మద్దతు, ఎక్స్-అఫీషియో ఓట్లతో రాష్ట్రవ్యాప్తంగా 100కు పైగా మున్సిపాలిటీల్లో కాంగ్రెస్ పట్టు సాధించేలా వ్యూహాలు సిద్ధం చేస్తోంది.

ఫిరాయింపుల సూచనలు

రాజకీయ భవిష్యత్తు దృష్ట్యా స్వతంత్రులు అధికార పార్టీ వైపు మొగ్గు చూపడం సహజమేనని విశ్లేషకులు భావిస్తున్నారు. ప్రతిపక్షంలో ఉంటే అభివృద్ధి పనులకు నిధులు రాకపోవచ్చన్న భయం వారిలో ఉంది. అధికారంతో ఉంటేనే వార్డుల అభివృద్ధి సాధ్యమనే భావనతో ప్రభుత్వానికి మద్దతు ఇవ్వడానికి సిద్ధమవుతున్నారు. ఈ క్రమంలో కొన్ని ఫిరాయింపులు జరిగే అవకాశాన్ని కూడా కొట్టిపారేయలేం.

ప్రమాణ స్వీకారం తర్వాత అసలు పోరు

ఫిబ్రవరి 16న కొత్తగా ఎన్నికైన కౌన్సిలర్ల ప్రమాణ స్వీకారం అనంతరం మేయర్లు, చైర్మన్ల ఎన్నికలు జరగనున్నాయి. అప్పటి వరకు గెలిచిన సభ్యులను కాపాడుకోవడం, ఇండిపెండెంట్లను తమవైపు తిప్పుకోవడం ప్రధాన పార్టీలకు సవాలుగా మారింది. ఫలితాల్లో హంగ్ ఉన్నా తుది ఫలితాల్లో అధికార బలం ప్రభావం చూపే అవకాశాలు ఎక్కువగా కనిపిస్తున్నాయి.

హంగ్ మున్సిపాలిటీల్లో కీలక సమీకరణాలు

రాష్ట్రంలోని అనేక పట్టణాల్లో కింగ్‌మేకర్‌గా ఇండిపెండెంట్లు, కొన్ని చోట్ల భాజపా, మరికొన్ని చోట్ల ఎక్స్-అఫీషియో సభ్యులు నిర్ణయాత్మక పాత్ర పోషిస్తున్నారు.

జనగామ : బీఆర్ఎస్ 13, కాంగ్రెస్ 12, ఇండిపెండెంట్లు 5.. ఇక్కడ ఇండిపెండెంట్లే కీలకం

జగిత్యాల : కాంగ్రెస్ 23, ఇతరులు అధిక సంఖ్యలో ఉన్నారు. ఇక్కడ కాంగ్రెస్‌కు స్పష్టమైన ఆధిక్యం

రాయికల్ : బీజేపీ 5తో ముందంజలో ఉన్నా ఇక్కడ స్వతంత్రులు, ఇతరుల మద్దతు అవసరం

మెట్‌పల్లి : బీజేపీ ముందంజలో ఉన్నా ఇండిపెండెంట్ల మద్దతు కీలకం

గద్వాల : కాంగ్రెస్ 16తో ముందంజ.. కానీ పూర్తి మెజారిటీ లేదు

అలంపూర్ : కాంగ్రెస్-బీఆర్ఎస్ సమంగా వచ్చాయి. ఎక్స్ అఫీషియో ఓట్లు నిర్ణయాత్మకం

కామారెడ్డి : త్రికోణ పోటీ నెలకొంది. ఇక్కడ పార్టీల పొత్తులు కీలకం

వేములవాడ : కాంగ్రెస్‌కు ఇండిపెండెంట్ల మద్దతు అవసరం పడింది.

జిన్నారం, జమ్మికుంట : హంగ్ ఏర్పడింది. ఇక్కడ మద్దతులపై ఆధారపడి ఫలితం ఉంది.

ఆసిఫాబాద్, కాగజ్‌నగర్, బెల్లంపల్లి : బీఆర్ఎస్-కాంగ్రెస్ మధ్య పోటీ.. ఇక్కడ ఇండిపెండెంట్లు కీలకంగా మారారు.

మహబూబాబాద్ : ఇండిపెండెంట్లు భారీ సంఖ్యలో ఉన్నారు. వీరే ఇక్కడ కింగ్‌మేకర్లుగా ఉన్నారు.

కేసముద్రం : కాంగ్రెస్-బీఆర్ఎస్ సమంగా నిలిచాయి. ఎక్స్ అఫీషియో ఓట్లు కీలకం

నారాయణపేట : బీజేపీ ముందంజలో ఉన్నా మెజారిటీ దూరంలో

బోధన్, మొయినాబాద్ : కాంగ్రెస్ ముందంజలో ఉంది.

ఇస్నాపూర్, ఇంద్రేశం : బీఆర్ఎస్ ఆధిక్యం.. కానీ మద్దతు అవసరం

వికారాబాద్, కోహిర్ : కాంగ్రెస్‌కు అవకాశం

పరిగి : ఇండిపెండెంట్లు నిర్ణయాత్మకం

అమరచింత : త్రికోణ సమీకరణంగా ఉంది.

మెదక్ : బీజేపీ కింగ్‌మేకర్

నర్సాపూర్ : బీజేపీ కీలక పాత్ర

ఆదిలాబాద్ : బీజేపీ ముందంజలో ఉన్నా మెజారిటీకి మద్దతు అవసరం

మొత్తంగా చూస్తే, హంగ్ మున్సిపాలిటీల్లో రాజకీయాలు చదరంగాన్ని తలపిస్తున్నాయి. సంఖ్యలు ఒక్కలా ఉన్నా, వ్యూహాలు మాత్రం తేడాగా ఉన్నాయి. ఇండిపెండెంట్ల మద్దతు, ఎక్స్-అఫీషియో ఓట్లు, రాజకీయ సమీకరణాలే తుది ఫలితాన్ని నిర్ణయించనున్నాయి.

ప్రస్తుతం పరిస్థితులను బట్టి చూస్తే అధికారంలో ఉన్న కాంగ్రెస్ పార్టీకి స్పష్టమైన అడ్వాంటేజ్ కనిపిస్తోంది. ఇండిపెండెంట్ల మద్దతు, అధికార బలం, వ్యూహాత్మక సమన్వయం.. ఇవన్నీ కలిసొచ్చే సూచనలు ఉన్నాయి. అయితే కొన్నిచోట్ల బీఆర్ఎస్, బీజేపీ కూడా కింగ్‌మేకర్ పాత్రలోకి రావడం వల్ల చివరి నిమిషం వరకు రాజకీయ ఉత్కంఠ కొనసాగడం ఖాయం.