సోషల్ క్యాంపెయిన్కు స్టార్ సపోర్ట్.. నటులందరికీ మంత్రి పిలుపు!
రాష్ట్రంలో మాదకద్రవ్యాల వినియోగం, రవాణాపై ప్రభుత్వం చాలా సీరియస్గా ఉందని మంత్రి పొన్నం ప్రభాకర్ చెప్పారు.
By: Madhu Reddy | 26 Jun 2026 9:23 PM IST
తెలంగాణను డ్రగ్స్ రహిత రాష్ట్రంగా మార్చడమే తమ ప్రభుత్వ లక్ష్యమని రాష్ట్ర రవాణా, బీసీ సంక్షేమ శాఖల మంత్రి పొన్నం ప్రభాకర్ స్పష్టం చేశారు. ఈ మహమ్మారిని నిర్మూలించేందుకు, ముఖ్యంగా యువతలో మార్పు తెచ్చేందుకు టాలీవుడ్ హీరోలు, సినీ ప్రముఖులు ముందుకు రావాలని ఆయన పిలుపునిచ్చారు. సమాజంపై స్టార్స్కు ఉండే ఇమేజ్, ప్రభావం చాలా పెద్దవని.. అందుకే సామాజిక బాధ్యతగా ఈ సోషల్ క్యాంపెయిన్లో భాగస్వాములు కావాలని మంత్రి కోరారు.
డ్రగ్స్ రహిత తెలంగాణే ధ్యేయం:
రాష్ట్రంలో మాదకద్రవ్యాల వినియోగం, రవాణాపై ప్రభుత్వం చాలా సీరియస్గా ఉందని మంత్రి పొన్నం ప్రభాకర్ చెప్పారు. ఇక డ్రగ్స్ నెట్వర్క్ను పూర్తిగా తుడిచిపెట్టేందుకు కఠినమైన చర్యలు తీసుకుంటున్నట్లు ప్రకటించారు. బంగారు భవిష్యత్తు ఉన్న యువత ఇలాంటి చెడు అలవాట్లకు బానిసలై తమ జీవితాలను నాశనం చేసుకోవద్దని ఆయన ఆవేదన వ్యక్తం చేశారు.
సినీ పరిశ్రమకు ప్రత్యేక పిలుపు:
సమాజంలో ఏ మార్పు రావాలన్నా సినిమా స్టార్ల మాటలకు, ప్రచారానికి పవర్ ఎక్కువ. అందుకే, డ్రగ్స్ మహమ్మారికి వ్యతిరేకంగా జరిగే పోరాటంలో టాలీవుడ్ హీరోలు, సెలబ్రిటీలు,క్రికెటర్స్ యాక్టివ్గా పాల్గొనాలని మంత్రి కోరారు. ఇక స్టార్స్ అంతా సామాజిక బాధ్యతగా అవగాహన కార్యక్రమాల్లో పాల్గొని యువతకు సరైన దిశానిర్దేశం చేయాల్సిన అవసరం ఎంతైనా ఉందని ఆయన పేర్కొన్నారు.
ప్రభుత్వానికి తోడుగా యాంటీ నార్కోటిక్ బ్యూరో:
తెలంగాణలో మాదకద్రవ్యాల నివారణ కోసం 'తెలంగాణ యాంటీ నార్కోటిక్ బ్యూరో' ద్వారా ప్రభుత్వం పెద్ద ఎత్తున అవేర్నెస్ ప్రోగ్రామ్స్ నిర్వహిస్తోంది. ఇక అంతర్జాతీయ మాదకద్రవ్యాల వ్యతిరేక దినోత్సవం సందర్భంగా నిర్వహించిన స్పెషల్ ఈవెంట్లలో ఇప్పటికే పలువురు టాలీవుడ్ ప్రముఖులు కూడా పాలుపంచుకున్నారు. ఈ ప్రచారాన్ని మరింత ముమ్మరం చేయాలని ప్రభుత్వం భావిస్తోంది.
ఆ ఒక్క నెంబర్తో సమాచారం ఇవ్వండి:
డ్రగ్స్ రవాణా లేదా వాడుతున్న వారి సమాచారం తెలిస్తే సాధారణ ప్రజలు కూడా ప్రభుత్వానికి సహాయం చేయవచ్చు. ఇక ఇందుకోసం ప్రభుత్వం ఒక ప్రత్యేక టోల్ ఫ్రీ నెంబర్ను అందుబాటులోకి తెచ్చింది. ఎవరికైనా డ్రగ్స్ గురించిన వివరాలు తెలిస్తే వెంటనే 1908 నెంబర్కు కాల్ చేసి సమాచారం అందించాలని, సమాచారం ఇచ్చిన వారి వివరాలు పూర్తిగా రహస్యంగా ఉంచుతామని మంత్రి తెలిపారు.
డ్రగ్స్ మహమ్మారిని అంతం చేయడం అనేది కేవలం పోలీస్ శాఖ లేదా ప్రభుత్వం వల్లే సాధ్యం కాదు. సమాజంలో ప్రతి ఒక్కరూ, ముఖ్యంగా యువత ఎక్కువగా ఫాలో అయ్యే మన సినీ నటులు కూడా ఈ ప్రచారంలో భాగస్వాములైనప్పుడే మంచి ఫలితాలు వస్తాయి. మరి మంత్రి పొన్నం ప్రభాకర్ ఇచ్చిన పిలుపునకు మన టాలీవుడ్ స్టార్స్ ఏ విధంగా స్పందిస్తారో, ఎలాంటి క్యాంపెయిన్స్తో ముందుకు వస్తారో చూడాలి..