ఒక్కసారిగా 17 మంది ఖైదీలు మాయం.. తేని జైల్లో అసలేం జరిగింది?

సినిమా స్క్రిప్ట్‌ను తలపించేలా పక్కా స్కెచ్ వేసి జైలు సిబ్బందికే షాక్ ఇచ్చారు రిమాండ్ ఖైదీలు. తమిళనాడులోని తేని జిల్లా ఆండిపట్టి సమీపంలో ఉన్న తేక్కంపట్టి సబ్‌జైలు నుంచి 17 మంది ఖైదీలు పరారవడం సంచలనంగా మారింది. ఓ ఖైదీ మూర్ఛ వచ్చినట్లు నటించడంతో, అతడికి సాయం చేసేందుకు వచ్చిన సిబ్బందిపై మిగతా ఖైదీలు దాడి చేశారు. ఆ తర్వాత వారి దగ్గర నుంచి తాళాలు లాక్కొని అక్కడి నుంచి పారిపోయారు.. అసలు ఈ ఘటన ఎలా జరిగిందో చూద్దాం.

నాటకమాడి బోల్తా కొట్టించిన ఖైదీలు:

అక్టోబర్ 26 సోమవారం అర్ధరాత్రి వేళ తేని సబ్‌జైలులో అంతా నిద్రపోతున్న సమయంలో ఒక సెల్‌లోని ఖైదీకి అకస్మాత్తుగా తీవ్ర అస్వస్థత గురైనట్లు, మూర్ఛ (ఫిట్స్) వచ్చినట్లు నటిస్తూ గిలగిలా కొట్టుకోవడం ప్రారంభించాడు. అతడితో ఉన్న మిగతా ఖైదీలు కూడా తోటి ఖైదీ ప్రాణాపాయంలో ఉన్నాడని, కాపాడాలంటూ పెద్దగా కేకలు వేశారు. ఖైదీ పరిస్థితి నిజంగానే విషమించిందని భావించిన జైలు వార్డర్లు, సెక్యూరిటీ సిబ్బంది హడావుడిగా తాళాలు తీసి సెల్‌లోకి వెళ్లారు.

సిబ్బందిపై దాడి.. జైలు గోడలు దూకి పరార్:

వార్డర్లు లోపలికి రావడమే ఆలస్యం.. అప్పటివరకు అస్వస్థతతో ఉన్నట్లు నటించిన ఖైదీతో సహా మిగిలిన వారంతా ఒక్కసారిగా జైలు సిబ్బందిపై విరుచుకుపడ్డారు. సిబ్బంది తేరుకునేలోపే వారిని తీవ్రంగా కొట్టి బంధించారు. ఖైదీలు సిబ్బంది తాళాలు లాక్కుని ప్రధాన ద్వారం వైపు పరుగెత్తారు. ఆ తర్వాత గోడలు దూకి పారిపోయారు. ఈ దాడిలో గాయపడిన సిబ్బందిని చికిత్స కోసం సమీపంలోని ప్రభుత్వ ఆస్పత్రికి తరలించారు.

16 చెక్‌పోస్టులు.. తేని నుంచి దిండిగల్ వరకు హైఅలర్ట్:

పకడ్బందీ భద్రత మధ్య ఉండాల్సిన జైలు నుంచి ఏకంగా 17 మంది పారిపోవడంతో పోలీసు శాఖ తీవ్ర దిగ్భ్రాంతికి గురైంది. ఖైదీలు జైలు వెనుక ఉన్న దట్టమైన అడవిలోకి పారిపోయి ఉంటారని పోలీసులు అనుమానిస్తున్నారు. దీంతో తేని నుంచి దిండిగల్ సరిహద్దుల వరకు పోలీసులు హైఅలర్ట్ ప్రకటించారు. ప్రత్యేక చెక్‌పోస్టులు ఏర్పాటు చేసి, అటవీ ప్రాంతంలో ప్రత్యేక బలగాల తో ఖైదీల కోసం గాలిస్తున్నారు.

ఒకడు దొరికాడు.. మిగిలిన వారి కోసం జల్లెడ:

పోలీసులు చేపట్టిన గాలింపులో పరారైన 17 మంది ఖైదీల్లో ఒకరిని మంగళవారం ఉదయం పట్టుకున్నారు. మిగిలిన వారి కోసం గాలింపు ముమ్మరం చేశారు. మరోవైపు, జైలులో భద్రతా లోపాలపై ఉన్నతాధికారులు దర్యాప్తునకు ఆదేశించారు.

మొత్తానికి, తేని సబ్‌జైలు నుంచి 17 మంది ఖైదీలు తప్పించుకోవడం తమిళనాడుతో పాటు పొరుగు రాష్ట్రాల్లోనూ చర్చనీయాంశంగా మారింది. ఒక ఖైదీ పట్టుబడగా, మిగిలిన వారిని కోసం పోలీసులు గాలిస్తున్నారు. ఈ ఘటనతో జైళ్లలో భద్రతను మరింత కట్టుదిట్టం చేయాల్సిన అవసరం మరోసారి స్పష్టమైంది.