ఆదాయం లేదు.. రాజకీయాల కంటే సినిమాలే బెటరా?

మలయాళ నటుడు, కేంద్ర సహాయమంత్రి సురేష్ గోపీ చేసిన తాజా వ్యాఖ్యలు ఇప్పుడు దేశవ్యాప్తంగా ముఖ్యంగా రాజకీయ, సినీ వర్గాల్లో తీవ్ర చర్చకు దారితీశాయి. "రాజకీయాల్లో సంపాదన లేదు, ఆదాయం కోసం మళ్లీ సినిమాల్లోకి పోతాను" అంటూ ఆయన చేసిన వ్యాఖ్యలు ఆసక్తికరంగా మారాయి. కేంద్ర మంత్రి పదవిని కూడా వదులుకోవడానికి సిద్ధపడటం.. ఈ మొత్తం వ్యవహారం వెనుక ఉన్న ఆర్థిక అంశాలను, అలాగే ప్రజా జీవితంలో ఉన్న సవాళ్లను వెలుగులోకి తెస్తోంది.

* ఆదాయం తగ్గింది: మంత్రి పదవి వద్దు!

పెట్రోలియం శాఖ సహాయమంత్రిగా ఉన్న సురేష్ గోపీ, ఇటీవల కేరళలోని బీజేపీ కార్యకర్తలతో మాట్లాడుతూ తన మనసులోని మాటను బయటపెట్టారు. "రాజకీయాల్లో ఉండటం వల్ల ఆదాయం తగ్గిపోయింది. నేను ఎప్పుడూ సినిమాలను పూర్తిగా వదిలిపెట్టాలని అనుకోలేదు. మళ్లీ నటనలో కొనసాగాలని ఉంది" అని ఆయన స్పష్టంగా చెప్పారు. అంతేకాకుండా తన పదవిని కేరళకే చెందిన సీనియర్ నేత సదానందన్ మాస్టర్‌కు ఇవ్వాలని కూడా సూచించారు.

ఈ వ్యాఖ్యలు సురేష్ గోపీ యొక్క వ్యక్తిగత ఆర్థిక స్థితిని మాత్రమే కాకుండా, రాజకీయాల్లోకి వచ్చిన తర్వాత ఒక నటుడు ఎదుర్కొనే ఆర్థిక ఒత్తిడిని కూడా సూచిస్తున్నాయి. సినిమా ఇండస్ట్రీలో భారీ పారితోషికాలు పొందే ఆయనకు, రాజకీయ పదవి ద్వారా వచ్చే ఆదాయం సరిపోకపోవడం లేదా ఆయన ఆర్థిక అవసరాలను తీర్చలేకపోవడం స్పష్టంగా కనిపిస్తోంది.

* రాజకీయాలు సర్వీస్ మాత్రమేనా?

సురేష్ గోపీ మాటలు ఒక పెద్ద ప్రశ్నను లేవనెత్తుతున్నాయి. "రాజకీయాల్లో సర్వీస్ మాత్రమేనా? లేక సర్వైవ్ అవ్వడం కూడా కష్టమా?" అన్నది నిర్ణయించుకోవాలి. ప్రజా సేవ చేయాలనే తపనతో రాజకీయాల్లోకి అడుగుపెట్టినా.. తమకు ప్రధాన ఆదాయ వనరుగా ఉన్న వృత్తి అయిన సినిమాలను పూర్తిగా వదిలేయాల్సి రావడం వల్ల ఆర్థికంగా భద్రత లేమి ఏర్పడుతుందని సురేష్ గోపీ పరోక్షంగా చెప్పినట్లు విశ్లేషకులు భావిస్తున్నారు. ఈ పరిస్థితిలో రాజకీయాల కంటే సినిమాలే స్థిరమైన ఆదాయం, ఆర్థిక భద్రత కలిగిన వృత్తిగా ఆయనకు అనిపించడం సహజం.

2024 లోక్‌సభ ఎన్నికల్లో త్రిశూర్ నియోజకవర్గం నుంచి గెలిచి కేంద్ర మంత్రివర్గంలో చోటు దక్కించుకున్న ఆయన, ఇప్పుడు ఆదాయం కోసమే మళ్లీ వెండితెర వైపు మొగ్గుచూపడం, ప్రజా జీవితంలోకి వచ్చేందుకు సిద్ధపడే ఇతర ప్రముఖులకు ఒక హెచ్చరికలా కనిపిస్తోంది.

* సినీ వర్గాల స్పందన

సురేష్ గోపీ నిర్ణయం పట్ల సినీ వర్గాలు కూడా సానుకూలంగానే స్పందిస్తున్నాయి. నటన ఆయనకు దగ్గరైన మాధ్యమం కావడం వలన మళ్లీ సినిమాల్లోకి రావాలనుకోవడం సహజమని, ప్రజా సేవతో పాటు వ్యక్తిగత జీవితాన్ని, ఆర్థిక అంశాలను కూడా బ్యాలెన్స్ చేసుకోవాల్సిన అవసరం ఉంటుందని వారు భావిస్తున్నారు.

మొత్తంగా సురేష్ గోపీ వ్యాఖ్యలు కేవలం వ్యక్తిగత ఇబ్బందులను మాత్రమే కాదు, రాజకీయాల్లోకి వచ్చే ప్రముఖులు ఎదుర్కొనే ఆర్థిక సవాళ్లను కూడా ఎత్తిచూపుతున్నాయి. ప్రజా సేవతో పాటు వ్యక్తిగత జీవితాన్ని, ఆర్థిక అవసరాలను ఎలా సమన్వయం చేసుకోవాలో అనేది ఈ సంఘటన ద్వారా మరోసారి చర్చనీయాంశమైంది.