స్టార్‌లింక్‌పై మస్క్ క్లారిటీ.. స్టార్‌షీల్డ్‌తో అసలు తేడా ఇదే!

ప్రపంచ ప్రసిద్ధ కుబేరుడు ఎలాన్ మస్క్‌కు చెందిన 'స్పేస్X' సంస్థ అందిస్తున్న 'స్టార్‌లింక్' శాటిలైట్ ఇంటర్నెట్ సేవలు ప్రపంచవ్యాప్తంగా సంచలనం సృష్టిస్తున్నాయి. సాధారణ ఫైబర్ ఇంటర్నెట్, మొబైల్ టవర్ల పరిమితులతో సంబంధం లేకుండా నేరుగా అంతరిక్షంలోని ఉపగ్రహాల ద్వారా హైస్పీడ్ ఇంటర్నెట్ అందించడం దీని ప్రత్యేకత. ఇటీవల ఉక్రెయిన్ వివాదం నేపథ్యంలో స్టార్‌లింక్, స్టార్‌షీల్డ్ నెట్‌వర్క్‌ల వాడకంపై ఎలాన్ మస్క్ కీలక క్లారిటీ ఇచ్చారు. ఈ రెండింటి మధ్య ఉన్న ప్రధాన తేడాలు, ఆ వివరాలు ఇప్పుడు చూద్దాం..

సాధారణ ఇంటర్నెట్‌కు, స్టార్‌లింక్‌కు తేడా ఏంటి?:

మనం సాధారణంగా వాడే ఫైబర్ ఇంటర్నెట్ కేబుళ్ల ద్వారా మాత్రమే పని చేస్తుంది. కేబుళ్లు వేసిన ప్రాంతాలకే ఇది పరిమితం. అలాగే మొబైల్ డేటా కూడా సెల్ టవర్ సిగ్నల్స్ ఉన్న చోట మాత్రమే వస్తుంది. కానీ స్టార్‌లింక్ అలా కాదు. మనం ఇళ్లపై డీటీహెచ్ డిష్ ఆంటెన్నా ఎలా పెట్టుకుంటామో, అలాగే ఒక చిన్న హార్డ్‌వేర్ కిట్ ద్వారా నేరుగా అంతరిక్షంలో ఉండే ఉపగ్రహాల నుంచి సిగ్నల్స్ పొంది ఇంటర్నెట్ వాడుకోవచ్చు. ఇక సముద్రాల మధ్యలో కూడా హైస్పీడ్ ఇంటర్నెట్ అందించడం దీని ప్రత్యేకత.

165కిపైగా దేశాల్లో సేవలు.. భారత్‌లో ఎందుకు లేదు?;

ప్రస్తుతం ప్రపంచవ్యాప్తంగా 165కిపైగా దేశాల్లో స్టార్‌లింక్ సేవలు అందుబాటులో ఉన్నాయి. ధర కాస్త ఎక్కువైనప్పటికీ మారుమూల ప్రాంతాల్లో కూడా సూపర్‌ఫాస్ట్ ఇంటర్నెట్ వస్తుండటంతో వినియోగదారులు ఆసక్తి చూపుతున్నారు. అయితే జాతీయ భద్రతా కారణాల దృష్ట్యా రష్యా, చైనా వంటి దేశాలు స్టార్‌లింక్ సేవలను అనుమతించడం లేదు. భారతదేశం కూడా సెక్యూరిటీ పరమైన అంశాలను పరిశీలిస్తున్నందున ఇంకా స్టార్‌లింక్‌కు అధికారిక లైసెన్స్ మంజూరు చేయలేదు.

స్టార్‌లింక్ వర్సెస్ స్టార్‌షీల్డ్.. అసలు తేడా ఇదే:

ఇక 'స్టార్‌లింక్', 'స్టార్‌షీల్డ్' రెండూ స్పేస్X అభివృద్ధి చేసిన శాటిలైట్ నెట్‌వర్క్ వ్యవస్థలే అయినప్పటికీ, రెండింటి బాధ్యతలు వేరు. స్టార్‌లింక్ అనేది సాధారణ ప్రజలు, ప్రైవేట్ కంపెనీల కోసం రూపొందించిన ఇంటర్నెట్ నెట్‌వర్క్. ఇది పూర్తిగా స్పేస్X కంపెనీ కంట్రోల్‌లో ఉంటుంది. కానీ స్టార్‌షీల్డ్ అలా కాదు. ఇది డిఫెన్స్, నేషనల్ సెక్యూరిటీ, సైనిక అవసరాల కోసం ప్రత్యేకంగా డిజైన్ చేసిన నెట్‌వర్క్. ఇక ఇది అమెరికా ప్రభుత్వం మరియు మిలిటరీ నియంత్రణలో నడుస్తుంది.

దాడుల కోసం వాడొద్దు.. మస్క్ స్పష్టత:

యుద్ధం, సైనిక చర్యల్లో ఈ నెట్‌వర్క్ వాడకంపై ఉక్రెయిన్ చేసిన ట్వీట్‌పై ఎలాన్ మస్క్ స్పందిస్తూ కీలక ప్రకటన చేశారు. "స్టార్‌షీల్డ్ సిస్టమ్స్ పూర్తిగా అమెరికా ప్రభుత్వం కంట్రోల్‌లో ఉంటాయి, వాటిపై ఆంక్షలను ప్రెసిడెంటే నిర్ణయిస్తారు. అయితే స్పేస్X అందిస్తున్న స్టార్‌లింక్ సేవలను కేవలం పౌర అవసరాలు, ఆత్మరక్షణ కోసం మాత్రమే వాడాలి తప్ప, ఇతరులపై దాడులు చేయడానికి వాడకూడదు" అని స్పష్టం చేశారు.

ఇక మొత్తానికి చూస్తే, సాంకేతిక రంగంలో శాటిలైట్ ఇంటర్నెట్ ఒక విప్లవాత్మక మార్పు తెచ్చిందనడంలో ఎలాంటి సందేహం లేదు. పౌర అవసరాలకు ‘స్టార్‌లింక్’, రక్షణ రంగానికి ‘స్టార్‌షీల్డ్’ అంటూ విభజించిన మస్క్.. ఈ టెక్నాలజీని యుద్ధ దాడులకు వాడుకోవద్దని తేల్చి చెప్పారు. ఇక భద్రతా నిబంధనలు పూర్తయి త్వరలోనే భారతీయ వినియోగదారులకు కూడా ఈ శాటిలైట్ ఇంటర్నెట్ అందుబాటులోకి రావాలని ఆశిద్దాం.