గాంధీజీపై వరుస వీడియోల్లో నటుడు శ్రీకాంత్ భరత్ కామెంట్స్.. దుమారం
కొంతమంది సోషల్ మీడియా వినియోగదారులు శ్రీకాంత్ భరత్పై దేశంలో శాంతిభద్రతలకు విఘాతం కలిగించేలా మాట్లాడినందుకు.. మహాత్మా గాంధీ వంటి మహనీయుడిని కించపరిచినందుకు తక్షణమే లీగల్ యాక్షన్ తీసుకోవాలని డిమాండ్ చేస్తున్నారు.
By: A.N.Kumar | 7 Oct 2025 11:20 AM IST
అక్టోబర్ 2, గాంధీ జయంతి సందర్భంగా టాలీవుడ్ నటుడు శ్రీకాంత్ భరత్ చేసిన వ్యాఖ్యలు ప్రస్తుతం దేశవ్యాప్తంగా తీవ్ర చర్చనీయాంశంగా మారాయి. జాతిపిత మహాత్మా గాంధీపై ఆయన సోషల్ మీడియాలో చేసిన వివాదాస్పద కామెంట్లు, ఆ తర్వాత విమర్శలకు కౌంటర్గా విడుదల చేసిన వీడియోలో మరింత రెచ్చిపోయి మాట్లాడటంపై ప్రజలు, నెటిజన్లు, పెద్ద ఎత్తున ఆగ్రహం వ్యక్తం చేస్తున్నారు.
గాంధీజీ జయంతి రోజున ఆయనను విమర్శిస్తూ సోషల్ మీడియాలో పోస్ట్ పెట్టిన శ్రీకాంత్ భరత్పై మొదట విమర్శలు వెల్లువెత్తాయి. దీనికి స్పందిస్తూ ఆయన మరో వీడియోను విడుదల చేశారు. ఆ వీడియోలో విమర్శలను పట్టించుకోనని చెబుతూనే, గాంధీజీ వ్యక్తిగత జీవితం, దేశ స్వాతంత్ర్యం విషయంలో ఆయన పాత్రపై మరింత తీవ్రమైన వ్యాఖ్యలు చేశారు.
* శ్రీకాంత్ భరత్ చేసిన కీలక వ్యాఖ్యలు:
"అమ్మాయి పక్కన ఉన్నా నిగ్రహంగా ఉన్నాడని చెబుతారు... చరిత్ర చదవండి, నిజాలు తెలుసుకోండి" అంటూ తీవ్ర విమర్శనాత్మక కామెంట్స్ చేశారు. "స్వాతంత్ర్యం గాంధీజీ తెచ్చినది కాదు... సుభాష్ చంద్రబోస్, భగత్ సింగ్ లాంటి లక్షల మంది తెచ్చారు. వాళ్లు పరమాత్ములు" అని గాంధీజీ పాత్రను తక్కువ చేసి మాట్లాడారు. అత్యంత వివాదాస్పదమైన వ్యాఖ్యలలో ఆయన గాంధీజీని "ప్యారాసైట్ (పరాన్నజీవి)" తో పోల్చారు. "నాథురాం గాడ్సే నేషనల్ ఫస్ట్ యాంటీ బయాటిక్... గాంధీజీని చంపడంలో తప్పులేదు" అని ఆయన చేసిన వ్యాఖ్యలు హింసను సమర్థించేలా ఉండటంపై తీవ్ర విమర్శలు వ్యక్తమవుతున్నాయి. గాంధీజీని జాతిపితగా అంగీకరించబోమని, "మనం భారతమాత బిడ్డలం" అంటూ ఆయన ఆరోపణలు చేశారు.
* సోషల్ మీడియాలో ఆగ్రహావేశాలు:
శ్రీకాంత్ భరత్ వ్యాఖ్యలు సోషల్ మీడియాలో తీవ్ర ఆగ్రహ జ్వాలలను రగిలించాయి. ఆయన పోస్టుల కింద నెటిజన్లు, అభిమానులు పెద్ద ఎత్తున కామెంట్లలో తిట్టిపోయడం, విమర్శలు చేయడం గమనార్హం. పలువురు నెటిజన్లు, ప్రముఖులు ఈ వ్యాఖ్యలను ఏకగ్రీవంగా ఖండించారు. జాతిపితపై ఇలాంటి అవమానకర వ్యాఖ్యలు చేయడం, ముఖ్యంగా గాంధీ జయంతి రోజున చేయడం తగదని అభిప్రాయపడ్డారు.
చట్టపరమైన చర్యల డిమాండ్
కొంతమంది సోషల్ మీడియా వినియోగదారులు శ్రీకాంత్ భరత్పై దేశంలో శాంతిభద్రతలకు విఘాతం కలిగించేలా మాట్లాడినందుకు.. మహాత్మా గాంధీ వంటి మహనీయుడిని కించపరిచినందుకు తక్షణమే లీగల్ యాక్షన్ తీసుకోవాలని డిమాండ్ చేస్తున్నారు.
పరిశ్రమలో చర్చ
సినీ పరిశ్రమలో కూడా ఈ వ్యాఖ్యలు చర్చనీయాంశమయ్యాయి. బాధ్యతాయుతమైన స్థాయిలో ఉన్న నటుడు ఇలాంటి అసత్య ప్రచారాలు చేయడం.. విద్వేషపూరిత భావాలను పెంపొందించేలా మాట్లాడటం సమాజానికి హానికరం అనే అభిప్రాయాలు వ్యక్తమవుతున్నాయి.
శ్రీకాంత్ భరత్ వ్యాఖ్యల పట్ల పెద్ద ఎత్తున వ్యతిరేకత వస్తున్న నేపథ్యంలో ఈ వివాదం ఎంతవరకు దారి తీస్తుందో చూడాలి.