ఐరాసలో పాకిస్తాన్ పరువు పాయే
షరీఫ్ ప్రసంగం అనంతరం, భారత శాశ్వత మిషన్లో ప్రథమ కార్యదర్శి అయిన పెటల్ గహ్లోత్, 'రైట్ ఆఫ్ రిప్లై' వినియోగించుకుని పాకిస్తాన్కి ధీటుగా సమాధానం ఇచ్చారు.
By: A.N.Kumar | 27 Sept 2025 5:27 PM IST
ఐక్యరాజ్యసమితి సర్వసభ్య సమావేశంలో ఈసారి భారత్, పాకిస్తాన్ల మధ్య వాదోపవాదాలు మరింత కఠినంగా, ఘాటుగా సాగాయి. పాకిస్తాన్ ప్రధాని షెహ్బాజ్ షరీఫ్ తన ప్రసంగంలో భారత్పై తీవ్ర ఆరోపణలు చేయగా, భారత ప్రతినిధి పెటల్ గహ్లోత్ గట్టిగా స్పష్టంగా తిప్పికొట్టారు.
షెహ్బాజ్ షరీఫ్ ఆరోపణలు, విజయం యొక్క వింత కథనం
షెహ్బాజ్ షరీఫ్ 'ఆపరేషన్ సింధూర్' సందర్భాన్ని ప్రస్తావిస్తూ, భారత్ తమ పౌరులను లక్ష్యంగా చేసుకుని దాడి చేసిందని ఆరోపించారు. పాకిస్తాన్ వైమానిక దళం గట్టిగా ప్రతిస్పందించి, ఏడు భారతీయ జెట్లను కూల్చివేసిందని, శత్రువును అవమానంతో వెనక్కి పంపించిందని, అది తమ విజయమని పేర్కొన్నారు. ఈ ఘర్షణ విరమణకు అమెరికా అధ్యక్షుడు డోనాల్డ్ ట్రంప్ మధ్యవర్తిత్వం వహించారని కూడా ఆయన ప్రశంసించారు. ఉగ్రవాదాన్ని ఖండించాలని పిలుపునిస్తూనే, కాశ్మీర్ అంశాన్ని లేవనెత్తి, భారత్ 'ఉగ్రవాద శిబిరాలను' నిర్వహిస్తోందని ఆరోపించారు.
భారత్ తరపున పెటల్ గహ్లోత్ చురకలు
షరీఫ్ ప్రసంగం అనంతరం, భారత శాశ్వత మిషన్లో ప్రథమ కార్యదర్శి అయిన పెటల్ గహ్లోత్, 'రైట్ ఆఫ్ రిప్లై' వినియోగించుకుని పాకిస్తాన్కి ధీటుగా సమాధానం ఇచ్చారు. షరీఫ్ వ్యాఖ్యలను 'అసంబద్ధమైన నాటకం'గా అభివర్ణించారు.
"ఈ సభలో పాకిస్తాన్ ప్రధానమంత్రి నుండి ఉదయమే అసంబద్ధమైన నాటకాన్ని చూశాం. ఉగ్రవాదం వారి విదేశాంగ విధానంలో ప్రధానాంశం, దాన్ని మరోసారి కీర్తించారు" అని గహ్లోత్ పేర్కొన్నారు. అల్ ఖైదా నాయకుడు ఒసామా బిన్ లాడెన్కి ఒక దశాబ్దం పాటు ఆశ్రయం కల్పించిన చరిత్ర పాకిస్తాన్దని గుర్తుచేశారు.
'ఆపరేషన్ సింధూర్'పై షరీఫ్ చేసిన 'విజయం' వాదనను ఆమె తీవ్రంగా ఖండించారు. "మే 9 వరకు పాకిస్తాన్ మరిన్ని దాడులకు బెదిరించింది. కానీ మే 10న, తమ వైమానిక స్థావరాలకు తీవ్ర నష్టం వాటిల్లిన తర్వాత, పాక్ సైన్యం మాకు నేరుగా విరామం కోసం అభ్యర్థించింది. ధ్వంసమైన రన్వేలు , కాలిపోయిన హ్యాంగర్లు విజయంగా కనిపిస్తే, ఆ విజయాన్ని పాకిస్తాన్ అనుభవించవచ్చు" అని వ్యంగ్యంగా వ్యాఖ్యానించారు.
భారత్-పాక్ మధ్య ఎలాంటి సమస్యలైనా కేవలం ఇరు దేశాల మధ్యే పరిష్కరించబడాలని, ట్రంప్ మధ్యవర్తిత్వ వాదనను భారత్ ఖండిస్తోందని, 'మూడో పక్షానికి ఇందులో చోటు లేదు' అని స్పష్టం చేశారు.
షరీఫ్ శాంతిని కోరినట్లయితే, మార్గం స్పష్టంగా ఉందని, "పాకిస్తాన్ వెంటనే అన్ని ఉగ్రవాద శిబిరాలను మూసివేసి, భారత్లో కావాల్సిన ఉగ్రవాదులను అప్పగించాలి" అని డిమాండ్ చేశారు.
పాకిస్తాన్ ఉగ్రవాద శిబిరాలకు నిధులు సమకూర్చడం, గతంలో ఉగ్రవాద సంస్థలకు రక్షణ కల్పించడాన్ని గహ్లోత్ ప్రస్తావించారు. మొత్తం మీద, ఐరాస వేదికపై పాకిస్తాన్కు ఘోరమైన పరాభవం ఎదురైందనే వ్యాఖ్యలు వినబడుతున్నాయి. అంతర్జాతీయ వేదికలు రాజకీయ సంకేతాల మార్పిడికి ఉపయోగపడినా, వాస్తవ సమస్యల పరిష్కారానికి ఉగ్రవాదంపై చర్యలు తప్పవని భారత్ గట్టిగా ప్రపంచానికి చాటిచెప్పింది.