రూ.46 లక్షల ప్యాకేజీని కాదనుకుని ఆర్మీలోకి.. అమేజాన్ ఉద్యోగి స్ఫూర్తిదాయక కథనం!

నేటి డిజిటల్ యుగంలో అత్యధిక శాతం యువత లక్ష్యం ఏంటి? ప్రతిష్టాత్మక ఐటీ సంస్థ, విదేశీ ప్రయాణాలు, లక్షల రూపాయల జీతం, సుఖవంతమైన కార్పొరేట్ లైఫ్‌స్టైల్. కానీ ఇవన్నీ చేతికి అందివచ్చినా సరే... "నా దేశం కోసం, నా మాతృభూమి సేవ కోసం" అంటూ తన డ్రీమ్ కెరీర్‌ను సైతం నవ్వుతూ వదులుకున్నారు లక్నోకు చెందిన 27 ఏళ్ల శార్దెందు తివారీ. ఏడాదికి రూ. 46 లక్షల భారీ ప్యాకేజీని పక్కనపెట్టి భారత సైన్యంలో చేరి దేశ సేవకే తన జీవితాన్ని అంకితం చేయాలని ఆయన తీసుకున్న నిర్ణయం ఇప్పుడు దేశ వ్యాప్తంగా ఎంతోమంది యువతకు స్ఫూర్తిగా నిలుస్తోంది.

కార్పొరేట్ వైభవం వర్సెస్ దేశ సేవ

శార్దెందు తివారీ విద్యార్హతలు, ప్రతిభ అత్యున్నతమైనవి. హర్యానాలోని చండీమందిర్ కేంద్రీయ విద్యాలయంలో పాఠశాల విద్యను పూర్తి చేసిన ఆయన ఇన్ఫర్మేషన్ టెక్నాలజీలో బీఈ పూర్తి చేశారు. ఆ తర్వాత చండీగఢ్‌లోని ప్రసిద్ధ 'పంజాబ్ ఇంజినీరింగ్ కాలేజీ' నుంచి కంప్యూటర్ సైన్స్ అండ్ ఇన్ఫర్మేషన్ సెక్యూరిటీలో ఎంటెక్ పట్టా పొందారు.

చదువు పూర్తయిన వెంటనే ప్రపంచ ప్రసిద్ధి చెందిన టెక్ దిగ్గజం 'అమేజాన్'లో క్లౌడ్ ఇంజినీర్‌గా బాధ్యతలు చేపట్టారు. అక్కడ ఆయనకు లభించిన వార్షిక వేతనం అక్షరాలా రూ. 46 లక్షలు.. అంతేకాకుండా గ్లోబల్ ఏరోస్పేస్ దిగ్గజం 'ఎయిర్‌బస్' సంస్థ నుంచి కూడా ఆయనకు అత్యున్నత ఉద్యోగ ఆఫర్ వచ్చింది. అయితే కార్పొరేట్ రంగానికి చెందిన ఈ ఆకర్షణీయమైన జీతాలు, విలాసవంతమైన జీవితం ఆయనను కట్టిపడేయలేకపోయాయి.

రక్తంలోనే సైనిక నిబద్ధత

శార్దెందు తీసుకున్న ఈ చారిత్రాత్మక నిర్ణయం వెనుక ఆయన కుటుంబ నేపథ్యం ప్రధాన కారణం. ఆయన తండ్రి రాజ్ కుమార్ తివారీ భారత సైన్యంలోని ఆర్మీ సర్వీస్ కార్ప్స్‌లో హానరరీ కెప్టెన్‌గా 36 ఏళ్ల పాటు వీరోచిత సేవలు అందించి పదవీ విరమణ చేశారు. చిన్నప్పటి నుంచే తండ్రి యూనిఫాం, ఆయనలోని క్రమశిక్షణ, దేశం పట్ల ఆయనకున్న భక్తిని చూస్తూ పెరిగిన శార్దెందు మనస్సులో సైన్యంలో చేరాలనే కోరిక బలంగా నాటుకుపోయింది.

ఓటములను జయించి.. 9వ ప్రయత్నంలో విజయం

మనం చూసే మెరుపుల వెనుక ఎంతో కృషి, ఆవేదన ఉంటాయి. శార్దెందు ప్రయాణం కూడా అంత సులభంగా ఏమీ సాగలేదు. ఆర్మీ సెలక్షన్ ప్రక్రియలో ఆయన వరుసగా 8 సార్లు విఫలమయ్యారు. సాధారణంగా ఎవరైనా సరే 2 లేదా 3 సార్లు విఫలమైతే నిరాశతో వెనకడుగు వేస్తారు.. పైగా రూ. 46 లక్షల ఉద్యోగం చేతిలో ఉన్నప్పుడు ప్రత్యామ్నాయం వైపే మొగ్గు చూపుతారు. కానీ శార్దెందు పట్టు వదల్లేదు. తన లోపాలను సరిదిద్దుకుంటూ 9వ సారి 'టెక్నికల్ ఎంట్రీ' ద్వారా ఆర్మీకి ఎంపికయ్యారు. ఈ మార్గం ద్వారా తన సాంకేతిక పరిజ్ఞానాన్ని ఆర్మీ రక్షణ వ్యవస్థకు ఉపయోగిస్తూనే దేశసేవ చేసే గొప్ప అవకాశం ఆయనకు దక్కింది.

అకాడమీలోనూ అగ్రస్థానం

గయాలోని ఆఫీసర్స్ ట్రైనింగ్ అకాడమీ (ఓటీఏ)లో శిక్షణ సమయంలో శార్దెందు తన ప్రతిభను, నాయకత్వ లక్షణాలను నిరూపించుకున్నారు. కెడెట్లకు లభించే అత్యున్నత నియామకాలలో ఒకటైన 'సీనియర్ అండర్ ఆఫీసర్' (ఎస్.యూఓ)గా ఆయన బాధ్యతలు స్వీకరించారు.

ఆర్మీలోని సాహసాలు, ఫీల్డ్ సర్వీస్, దేశ రక్షణ బాధ్యతలే తనను అత్యధికంగా ఆకర్షించాయని శార్దెందు స్పష్టం చేశారు. ప్రస్తుతం ఆయన సైన్యంలో అధికారిగా కమిషన్ పొందేందుకు సిద్ధమయ్యారు. డబ్బు, విలాసాల కంటే ఆశయమే గొప్పదని నిరూపించిన శార్దెందు తివారీ ప్రయాణం.. దేశంలోని కోట్లాది మంది యువతకు నిత్య స్ఫూర్తిదాయకం.