అద్దెకు బాయ్‌ఫ్రెండ్ ?

ఈ రోజుల్లో ఆన్‌లైన్‌లో ఫుడ్, బట్టలు మాత్రమే కాదు.. ఆఖరికి 'తోడు'ను కూడా అద్దెకు తీసుకోవచ్చు..అవును వినడానికి వింతగా ఉన్నా, భారతదేశంలోని మెట్రో నగరాల్లో ఇప్పుడు "రెంట్ ఎ బాయ్‌ఫ్రెండ్" అనే కొత్త వైరల్ ట్రెండ్ నడుస్తోంది. ఒంటరితనాన్ని దూరం చేసుకోవడానికి, మనసు విప్పి మాట్లాడటానికి యువత ఇలాంటి సేవలను ఆశ్రయిస్తున్నారు. అసలు ఏంటి ఈ వింత ధోరణి? ఆర్థిక నిపుణులు దీనిని ఎలా చూస్తున్నారు? ఈ వైరల్ టాపిక్ గురించి తెలుసుకుందాం.

నిరుద్యోగమా? గిగ్ ఎకానమీనా?:

ఈ అద్దె బాయ్‌ఫ్రెండ్ కాన్సెప్ట్‌ను చాలా మంది నెటిజన్లు నిరుద్యోగ సమస్యకు నిదర్శనంగా చూస్తున్నారు. ఉద్యోగాలు లేక యువత ఇలాంటి పనులు చేస్తున్నారని కొందరి అభిప్రాయం. కానీ, ఆర్థిక నిపుణులు మాత్రం దీనిని 'గిగ్ ఎకానమీ'లో వస్తున్న సరికొత్త మార్పుగా చెప్తున్నారు. ఇక ఖాళీ సమయంలో పార్ట్-టైమ్‌గా డబ్బు సంపాదించుకోవాలనుకునే యువతకు ఇదొక కొత్త ఆదాయ మార్గంగా మారుతోంది.

ఒంటరితనం పోగొట్టుకోవడానికి:

ఇప్పుడున్న బిజీ లైఫ్‌లో చాలా మంది మానసిక ఒంటరితనం తో బాధపడుతున్నారు. కేవలం సరదా కోసమే కాకుండా, తమ మనసులోని బాధలను పంచుకోవడానికి, ఎవరితోనైనా ప్రశాంతంగా మాట్లాడటానికి యువత ఇలాంటి తోడును కోరుకుంటున్నారు. ఇక కొందరికి డిప్రెషన్ నుండి బయటపడటానికి కూడా ఇది కొంతవరకు సహాయపడుతోందని విశ్లేషణలు చెబుతున్నాయి.

రూల్స్ చాలా స్ట్రిక్ట్ గురూ:

అద్దెకు బాయ్‌ఫ్రెండ్ అనగానే ఏదేదో ఊహించుకుంటే పొరపాటే. దీనికంటూ ఒక 'ప్రొఫెషనల్ కోడ్ ఆఫ్ కండక్ట్' ఉంది. ఈ వెబ్‌సైట్ల ద్వారా వచ్చే వారు కేవలం స్నేహితుడిగా, తోడుగా మాత్రమే ఉంటారు. వారి మధ్య ఎలాంటి భౌతిక సంబంధాలకు అస్సలు తావు ఉండదు. ఇక కేవలం నిర్ణీత సమయం వరకు మాత్రమే స్నేహపూర్వక మద్దతు అందిస్తారని సంస్థ నిబంధనలు స్పష్టం చేస్తున్నాయి.

సేఫ్టీ ఫస్ట్.. అంతా వెరిఫైడ్:

ఇలా గుర్తుతెలియని వ్యక్తులతో బయటకు వెళ్లడం సురక్షితమేనా? అనే అనుమానం రావడం సహజం. అందుకే ఈ ప్లాట్‌ఫారమ్స్ భద్రతకు ఫస్ట్ ప్రయారిటీ ఇస్తున్నాయి. ఇక అద్దెకు వచ్చే ప్రతి ఒక్కరి కేవైసీ మరియు బ్యాక్‌గ్రౌండ్ వెరిఫికేషన్ పూర్తిగా చెక్ చేస్తారు. ఇక అన్ని రకాలుగా సేఫ్ అని కన్ఫర్మ్ చేసుకున్న తర్వాతే వారిని విధుల్లోకి తీసుకుంటారు.

జపాన్ టు ఇండియా.. మారుతున్న మైండ్‌సెట్:

ఒకప్పుడు కేవలం జపాన్, చైనా వంటి విదేశాలకే పరిమితమైన ఈ పోకడలు ఇప్పుడు మన దేశంలోని ముంబై, బెంగళూరు లాంటి మెట్రో నగరాలకు పాకాయి. దీన్ని బట్టి భారతదేశంలో కూడా 'ప్రైవసీ' మరియు 'వ్యక్తిగత అవసరాల' పట్ల సామాజిక దృక్పథం మారుతోందని అర్థమవుతోంది. ఇక పక్కవారు ఏమనుకుంటారో అనే పట్టింపులు మెల్లగా తగ్గుతున్నాయి.

మీ అవసరానికి తగ్గట్టు ప్యాకేజీలు:

ఈ ప్లాట్‌ఫారమ్స్ కస్టమర్ల కోసం కస్టమైజ్డ్ సర్వీసెస్ ఆఫర్ చేస్తున్నాయి. కేవలం షాపింగ్‌కు వెళ్లడానికో, క్లబ్బింగ్‌ కోసమే కాదు.. ఏదైనా పెళ్లికి ఒంటరిగా వెళ్ళడం ఇష్టం లేనప్పుడు తోడుగా వెళ్ళడానికి, జిమ్ పార్టనర్‌గా ఉండటానికి, లేదా కేవలం కాఫీ తాగుతూ కబుర్లు చెప్పుకోవడానికి కూడా వేర్వేరు ప్యాకేజీలను అందిస్తున్నాయి.

కాలంతో పాటు మనుషుల అవసరాలు, సంపాదన మార్గాలు కూడా మారిపోతున్నాయి. 'అద్దెకు తోడు' అనేది వినడానికి కాస్త వింతగా అనిపించినప్పటికీ, ప్రస్తుత బిజీ లైఫ్ లో ఒంటరితనంతో బాధపడేవారికి ఇది ఒక తాత్కాలిక పరిష్కారంగా మారుతోంది. అయితే, ఇరువైపులా నిబంధనలు పాటిస్తూ, సురక్షితంగా ఉన్నంత వరకు ఈ గిగ్ ఎకానమీ ట్రెండ్ మరింత ముందుకు సాగేలా కనిపిస్తోంది.