రాఘవ్ చడ్ఢాకు గంటల్లోనే 10 లక్షల మంది గుడ్ బై! కారణం ఇదేనా..?

రాజకీయ నాయకుల క్రేజ్‌ గురించి చెప్పాలంటే కొలమానం సోషల్ మీడియా ఫాలోయింగే. రాఘవ్ చడ్ఢా ఆమ్ ఆద్మీ పార్టీని వీడి బీజేపీలో చేరడం అనేది సిద్ధాంతపరంగా ఆయన అభిమానులకు షాక్ ఇచ్చిందని గణాంకాలు చెబుతున్నాయి. 24 గంటల వ్యవధిలోనే 10 లక్షల మంది అన్‌ఫాలో చేయడం అంటే అది సామాన్యమైన విషయం కాదు.

రాజకీయాల్లో నాయకుల అడుగులు కేవలం ఓట్ల రూపంలోనే కాదు.. నేడు సోషల్ మీడియా ఫాలోవర్ల రూపంలో లెక్కించబడుతున్నాయి. ఆమ్ ఆద్మీ పార్టీ యువ కిశోరంగా, విద్యావంతుడైన నాయకుడిగా రాఘవ్ చడ్ఢాకు యువతలో మంచి ఫాలోయింగ్ ఉండేది. ఇన్‌స్టాలో 14.6 మిలియన్ల మంది ఫాలోవర్లు ఉండేవారు. అయితే, ఎప్పుడైతే ఆయన బీజేపీలో చేరారో.. అప్పటి నుంచి ఆయన గ్రాఫ్ పడిపోవడం మొదలైంది. ఒక్క రోజులోనే 13.7 మిలియన్లకు ఆ సంఖ్య పడిపోవడం, ఆయన నిర్ణయంపై యువతలో ఉన్న అసంతృప్తికి నిదర్శనంగా కనిపిస్తోంది.

ఎందుకీ అన్‌ఫాలో..?

రాఘవ్ చడ్ఢాను ఒక సాధారణ రాజకీయ నాయకుడి కంటే ఒక ‘ఐకాన్’ లాగా చూసిన వారే ఎక్కువ. ఆప్ సిద్ధాంతాలను, కేజ్రీవాల్ వ్యూహాలను బలంగా వినిపించిన చడ్ఢా, అవే సిద్ధాంతాలకు వ్యతిరేకమైన బీజేపీలోకి వెళ్లడం మింగుడుపడడం లేదు. ‘నీతులు చెప్పేవారు కూడా పదవుల కోసం ఇలాగే మారిపోతారా?’ అనే ప్రశ్న నెటిజన్ల నుంచి వ్యక్తం అవుతోంది. రాఘవ్ చడ్ఢాలో ఒక కొత్త తరహా రాజకీయాన్ని చూసిన యువత, ఆయన కూడా పాతకాలపు 'ఫిరాయింపు' రాజకీయాల బాట పట్టడం జీర్ణించుకోలేకపోవడం కావచ్చు. ఒకప్పుడు నేతల దిష్టిబొమ్మలు తగలేసి నిరసన తెలిపేవారు, ఇప్పుడు ఆ నిరసన ‘అన్‌ఫాలో’ బటన్ ద్వారా వ్యక్తం అవుతోంది.

రాజకీయాలకూ సోషల్ మీడియాకూ సంబంధం

ఒక నాయకుడి బలం కేవలం అసెంబ్లీలోనో, పార్లమెంటులోనో ఉండడం కాదు, ప్రజల హృదయాల్లో ఉండాలి. రాఘవ్ చడ్ఢా కేవలం పంజాబ్ లేదా ఢిల్లీ నాయకుడు మాత్రమే కాదు.. ఆయనకు దేశవ్యాప్తంగా గుర్తింపు ఉంది. ఆయన గ్లామరస్ లుక్, మాట్లాడే తీరు యువతను ఆకట్టుకునేవి. ఇప్పుడు ఆ ‘క్లీన్ ఇమేజ్’పై పార్టీ మార్పు అనే మచ్చ పడిందని విమర్శకులు అంటున్నారు. అన్‌ఫాలో చేసిన వారు కేవలం ఆప్ కార్యకర్తలే కాదని, స్వతంత్రంగా ఆలోచించే తటస్థ ఓటర్లు కూడా ఉన్నారని అర్థమవుతోంది. ‘అందరిలాంటి వారే’ అనే ముద్ర పడటం యువ నేతకు భవిష్యత్తులో రాజకీయంగా పెద్ద సవాలే.

బీజేపీలో చడ్ఢా ప్రయాణం ఎలా ఉండబోతోంది?

ఒకవైపు ఫాలోవర్లు తగ్గుతున్నా, మరోవైపు బీజేపీ కేడర్ నుంచి ఆయనకు మరింత ఎక్కువ మద్దతు లభిస్తోంది. ఆప్ అభిమానులు దూరమవుతుంటే, బీజేపీ మద్దతుదారులు ఆయనను ఫాలో అవ్వడం మొదలుపెట్టవచ్చు. ఇప్పుడు చడ్ఢా తన నిర్ణయం సరైనదేనని నిరూపించుకోవాలంటే, బీజేపీలో ఉండి ప్రజల కోసం గతంలో కంటే మిన్నగా పనిచేయాల్సి ఉంటుంది.