యుద్ధం ముగిసిందో లేదో ఖతార్ లో భారీ పేలుడు.. 12 మంది భారతీయులు మృతి.. ఇంధన మార్కెట్‌లో ఆందోళన!

ఖతర్‌లోని ప్రపంచ ప్రఖ్యాత రస్ లఫాన్ గ్యాస్ పారిశ్రామిక నగరంలో సంభవించిన భారీ పేలుడు తీవ్ర విషాదాన్ని మిగిల్చింది. ఈ ఘోర ప్రమాదంలో మొత్తం 13 మంది ప్రాణాలు కోల్పోగా.. వారిలో 12 మంది భారతీయ కార్మికులే ఉండటం దేశవ్యాప్తంగా తీవ్ర ఆవేదన కలిగిస్తోంది. మరో 66 మంది కార్మికులు తీవ్రంగా గాయపడ్డారు. గాయపడిన వారిని స్థానిక ఆసుపత్రులకు తరలించి చికిత్స అందిస్తున్నారు. వీరిలో పలువురి పరిస్థితి విషమంగా ఉన్నట్లు సమాచారం. ఈ ఘటనతో విదేశాల్లో పనిచేస్తున్న భారతీయ వలస కార్మికుల భద్రతపై మరోసారి తీవ్ర చర్చ మొదలైంది.

ప్రమాదం ఎలా జరిగింది?

ప్రాథమిక సమాచారం ప్రకారం.. రస్ లఫాన్ పారిశ్రామిక నగరంలోని బర్జాన్ గ్యాస్ ప్రాసెసింగ్ ప్లాంట్‌లో నైట్ షిఫ్ట్ పనులు జరుగుతుండగా ఈ ప్రమాదం చోటుచేసుకుంది. అర్ధరాత్రి సమయంలో ఒక్కసారిగా ప్లాంట్‌లో భారీ పేలుడు సంభవించింది. పేలుడు తీవ్రత ఎంత ఎక్కువగా ఉందంటే.. క్షణాల వ్యవధిలోనే ప్లాంట్ అంతటా దట్టమైన మంటలు, పొగ వ్యాపించాయి. దీంతో అక్కడ పనిచేస్తున్న కార్మికులు ప్రాణాలు కాపాడుకోవడానికి బయటకు వచ్చే అవకాశం కూడా లేకపోయింది. గ్యాస్ లీకేజీ లేదా సాంకేతిక లోపమే ఈ ప్రమాదానికి ప్రధాన కారణమై ఉండొచ్చని ప్రాథమికంగా భావిస్తున్నారు. ఈ ఘోర ఉదంతంపై ఖతర్ ప్రభుత్వం స్పందిస్తూ ఉన్నతస్థాయి దర్యాప్తునకు ఆదేశాలు జారీ చేసింది.

ప్రపంచ గ్యాస్ సరఫరాపై పడనున్న ప్రభావం

ఈ ప్రమాదం కేవలం ప్రాణనష్టానికే పరిమితం కాలేదు. అంతర్జాతీయంగా పెద్ద ఎత్తున ప్రభావం చూపేలా ఉంది. ప్రపంచంలోనే అతిపెద్ద ఎల్.ఎన్.జీ ఎగుమతి కేంద్రాల్లో రస్ లఫాన్ అత్యంత కీలకమైనది. ఇక్కడి నుంచే భారతదేశంతో పాటు ప్రపంచవ్యాప్తంగా దాదాపు 30కి పైగా దేశాలకు నిరంతరం గ్యాస్ సరఫరా జరుగుతుంటుంది. ఇటీవలి కాలంలో ప్రాంతీయ ఉద్రిక్తతలు తగ్గడంతో ప్లాంట్‌లో కార్యకలాపాలను పూర్తిగా పునరుద్ధరించే క్రమంలో ఈ ప్రమాదం జరగడం అంతర్జాతీయ ఇంధన మార్కెట్‌ను ఆందోళనలోకి నెట్టింది. ఈ ప్లాంట్‌లో ఉత్పత్తి తాత్కాలికంగా నిలిచిపోతే, ప్రపంచవ్యాప్తంగా గ్యాస్ కొరత ఏర్పడే ప్రమాదం ఉంది. దీనివల్ల అంతర్జాతీయ మార్కెట్‌లో గ్యాస్ ధరలు ఒక్కసారిగా ఆకాశాన్నంటే అవకాశాలు ఉన్నాయని ఇంధన రంగ నిపుణులు అభిప్రాయపడుతున్నారు.

అప్రమత్తమైన భారత రాయబార కార్యాలయం

ప్రమాద వార్త తెలిసిన వెంటనే దోహాలోని భారత రాయబార కార్యాలయం వేగంగా స్పందించింది. స్థానిక ఖతర్ అధికారులతో కలిసి సహాయక చర్యల్లో పాలుపంచుకుంది. మరణించిన భారతీయ కార్మికుల వివరాలను సేకరించి, స్వదేశంలోని వారి కుటుంబ సభ్యులకు సమాచారం అందించే ప్రక్రియ ప్రారంభమైంది. గాయపడిన భారతీయులకు అత్యుత్తమ వైద్యం అందేలా రాయబార కార్యాలయ అధికారులు పర్యవేక్షిస్తున్నారు. మృతుల కుటుంబాలకు అన్ని విధాలా అండగా ఉంటామని, మృతదేహాలను త్వరగతిన స్వదేశానికి పంపించడానికి ఏర్పాట్లు చేస్తున్నామని రాయబార కార్యాలయం ప్రకటించింది.

భద్రతా ప్రమాణాలపై ప్రశ్నలు

సుదీర్ఘ ఉద్రిక్తతల తర్వాత సాధారణ పరిస్థితులు నెలకొంటున్న తరుణంలో జరిగిన ఈ ప్రమాదం, ఖతర్‌లోని పారిశ్రామిక భద్రతా ప్రమాణాలపై పలు ప్రశ్నలను లేవనెత్తుతోంది. ఉపాధి కోసం గల్ఫ్ దేశాలకు వెళ్లే లక్షలాది మంది భారతీయ కార్మికుల భద్రత, అత్యవసర సమయాల్లో వారికి లభించే రక్షణపై అంతర్జాతీయ సమాజం మరింత దృష్టి పెట్టాల్సిన అవసరం ఉందని ఈ ఘటన స్పష్టం చేస్తోంది.