రాహుల్ సైడ్.. ప్రియాంక ఇన్.. కాంగ్రెస్‌లో ఏం జ‌రుగుతోంది..?

కాంగ్రెస్ పార్టీ అంతర్గత వ్యూహాల్లో నిశ్శబ్దంగా ఒక భారీ మార్పు చోటుచేసుకుంటోంది. రాబోయే రాష్ట్రాల అసెంబ్లీ ఎన్నికల్లో గెలుపే లక్ష్యంగా పార్టీ అధిష్ఠానం ఒక సరికొత్త రోల్ డివిజన్ కు శ్రీకారం చుట్టింది. పార్లమెంట్‌లో ప్రతిపక్ష నేతగా జాతీయ స్థాయిలో కేంద్ర ప్రభుత్వాన్ని నిలదీసే బాధ్యతలను రాహుల్ గాంధీ చూసుకుంటుంటే.. క్షేత్రస్థాయిలో రాష్ట్రాల పోరును తన భుజస్కంధాలపై వేసుకునేందుకు ప్రియాంక గాంధీ వాద్రా సిద్ధమవుతున్నారు.

ఈ కొత్త రాజకీయ సమీకరణం వెనుక ఒక పక్కా వ్యూహం దాగి ఉంది. సాధారణంగా రాష్ట్రాల అసెంబ్లీ ఎన్నికలను కూడా 'మోదీ వర్సెస్ రాహుల్' పోరుగా మలచి జాతీయ అంశాల చుట్టూ తిప్పడం బీజేపీకి అలవాటైన శైలి. ఈ తంత్రానికి చెక్ పెట్టడానికే ప్రియాంకను ముందు వరుసలో నిలుపుతున్నారు. జాతీయ వివాదాల జోలికి వెళ్లకుండా.. ధరల పెరుగుదల, నిరుద్యోగం, మహిళా సంక్షేమం వంటి ప్రత్యక్ష ప్రజా సమస్యలనే ప్రధాన ఆయుధాలుగా మార్చుకోవడంలో ప్రియాంక సిద్ధహస్తురాలు. దీనివల్ల అసెంబ్లీ ఎన్నికల అజెండా స్థానిక అంశాల చుట్టూనే తిరిగేలా చేయడంలో కాంగ్రెస్ సఫలమవుతోంది.

గతంలో హిమాచల్ ప్రదేశ్, కర్ణాటక ఎన్నికల సమయంలో రాహుల్ గాంధీ భారత్ జోడో యాత్రలో నిమగ్నమైన వేళ.. ప్రియాంక నడిపిన దూకుడు ప్రచారమే పార్టీకి అద్భుత విజయాలను అందించింది. నాయనమ్మ ఇందిరా గాంధీని గుర్తుచేసే హావభావాలు, సాధారణ ప్రజలతో, ముఖ్యంగా మహిళా ఓటర్లతో సులభంగా మమేకమయ్యే నైజం ఉత్తర, మధ్య భారతంలో ఆమెకు ప్రత్యేక ఇమేజ్‌ను తెచ్చిపెట్టాయి. దీనికితోడు స్థానిక నాయకుల మధ్య ఉండే గ్రూపు తగాదాలను సమర్థవంతంగా చక్కదిద్దడంలోనూ ఆమె అనుసరించే శైలి మంచి ఫలితాలనిస్తోంది.

అయితే, కేవలం వ్యక్తుల గ్లామర్ మాత్రమే ఎన్నికలను గెలిపించలేదనేది గత అనుభవాలు చెబుతున్న పాఠం. బూత్ స్థాయి మేనేజ్‌మెంట్, బలమైన సంస్థాగత నిర్మాణం లేకపోతే ఎంతటి నాయకత్వ చరిష్మా అయినా ఒంటరిగా విజయాన్ని అందించలేదని గత ఉత్తరప్రదేశ్ అసెంబ్లీ ఫలితాలు నిరూపించాయి. అందుకే ఈసారి ప్రియాంక క్రేజ్‌ను వాడుకోవడంతో పాటు క్షేత్రస్థాయి యంత్రాంగాన్ని పటిష్టం చేసుకోవడం కాంగ్రెస్‌కు ప్రధాన సవాలుగా మారనుంది.

పార్టీ సంక్షోభంలో ఉన్న ప్రతిసారీ ఒక 'ట్రబుల్ షూటర్'లా కనిపించే ప్రియాంక ఫ్యాక్టర్‌ను ఈసారి పూర్తిస్థాయి మాస్ లీడర్‌గా ప్రయోగించాలని అధిష్ఠానం నిర్ణయించింది. జాతీయ స్థాయిలో రాహుల్ గాంధీ పోరాటం, రాష్ట్రాల స్థాయిలో ప్రియాంక వ్యూహాత్మక ప్రచారం.. ఈ 'డబుల్ ఇంజన్' వ్యూహం రాబోయే ఎన్నికల సమరాల్లో కాంగ్రెస్‌కు ఏ మేరకు పునరుజ్జీవాన్ని ఇస్తుందో కాలమే నిర్ణయించాలి.