బుద్ధి మార్చుకుని ప్రజ్వల్ రేవణ్ణ.. జైలులోనూ అదే పాడు పని!

అత్యాచారం కేసులో జీవిత ఖైదు అనుభవిస్తున్న జేడీఎస్ మాజీ ఎంపీ ప్రజ్వల్ రేవణ్ణ తీరులో ఏ మాత్రం మార్పు లేదని విమర్శలు వినిపిస్తున్నాయి. పనిమనిషిపై అత్యాచారం, మహిళలపై లైంగిక వేధింపుల కేసులో నేరం నిరూపితం కావడంతో బెంగళూరు జైలులో శిక్ష అనుభవిస్తున్న ప్రజ్వల్ రేవణ్ణ తాజాగా జైలులో అశ్లీల వీడియోలు చూస్తున్నట్లు ఆరోపణలు ఎదుర్కొంటున్నారు. ఆయన ఉంటున్న గదిలో ఇటీవల పోలీసులు తనిఖీ చేయగా, ఒక సెల్ ఫోన్, పెన్ డ్రైవ్ లభించినట్లు చెబుతున్నారు. కర్ణాటక అసెంబ్లీ సమావేశాలు జరుగుతున్న సమయంలో వెలుగుచూసిన ఈ ఘటన తీవ్ర సంచలనం సృష్టిస్తోంది.

జైలులో ఖైదీల కదలికలపై నిఘా ఉంచే క్రమంలో, జైలు అధికారులు చేపట్టిన ఆకస్మిక తనిఖీలో ప్రజ్వల్ రేవణ్ణ గదిలో ఫోను, అశ్లీల వీడియోల పెన్ డ్రైవ్ లభ్యమైనట్లు చెబుతున్నారు. ప్రజ్వల్ రేవణ్ణ ఉంటున్న బ్యారక్‌లో సోదాలు నిర్వహించినప్పుడు, ఆయన వద్ద రహస్యంగా దాచిన మొబైల్ ఫోన్ కనిపించిందని, జైలు నిబంధనల ప్రకారం ఖైదీలకు ఎలక్ట్రానిక్ పరికరాలు, ముఖ్యంగా కమ్యూనికేషన్ సాధనాలు కలిగి ఉండటం తీవ్రమైన నేరంగా చెబుతున్నారు. ఈ ఫోన్‌ను స్వాధీనం చేసుకున్న అధికారులు, అందులో ఎవరితోనైనా సంప్రదింపులు జరిపారా లేదా దర్యాప్తును ప్రభావితం చేసే డేటా ఏమైనా ఉందా అనే కోణంలో ఫోరెన్సిక్ విశ్లేషణకు పంపినట్లు సమాచారం.

భద్రతా వైఫల్యాలపై ప్రశ్నలు

ఈ ఘటన జైలు పాలనలోని భద్రతా లోపాలను బట్టబయలు చేసిందని చెబుతున్నారు. అత్యంత కీలకమైన కేసులో నిందితుడి జైలు గదిలోకి ఫోన్ ఎలా చేరిందనేది ఇప్పుడు పెద్ద ప్రశ్నగా మారింది. దీని వెనుక జైలు సిబ్బంది ఎవరైనా సహకరించారా, లేక భద్రతా వలయాన్ని దాటుకుని బయటి నుండి ఎవరైనా సరఫరా చేశారా అనే కోణంలో ఉన్నతాధికారులు విచారణ చేపట్టారు. ఈ వ్యవహారం జైలు అధికారుల పనితీరుపై తీవ్ర విమర్శలు వస్తున్నాయని అంటున్నారు.

కేసుపై ప్రభావం

ప్రజ్వల్ రేవణ్ణపై ఉన్న లైంగిక వేధింపుల కేసును స్పెషల్ ఇన్వెస్టిగేషన్ టీమ్ (సిట్) అత్యంత ప్రతిష్టాత్మకంగా తీసుకుంది. కీలకమైన దర్యాప్తు దశలో ఉన్న సమయంలో, నిందితుడు బయటి ప్రపంచంతో ఫోన్ ద్వారా సంబంధాలు కొనసాగిస్తున్నారనే ఆరోపణలు కేసు దర్యాప్తును పక్కదారి పట్టించే ప్రమాదం ఉందని న్యాయ నిపుణులు అభిప్రాయపడుతున్నారు. సాక్ష్యాలను తారుమారు చేయడానికి లేదా బాధితులను బెదిరించడానికి ఈ ఫోన్‌ను వినియోగించారా అనే కోణంలో పోలీసులు ఆరా తీస్తున్నారు.

కాగా, ఈ ఘటనపై రాజకీయ వర్గాల్లో తీవ్ర దుమారం రేగుతోంది. ప్రతిపక్షాలు ఈ ఉదంతాన్ని ప్రభుత్వ వైఫల్యంగా పేర్కొంటుండగా, కఠిన చర్యలు తీసుకుంటామని జైలు శాఖ ప్రకటించింది. నిబంధనలను ఉల్లంఘించినందుకు గాను, ప్రజ్వల్ రేవణ్ణపై అదనపు క్రమశిక్షణ చర్యలు తీసుకునే అవకాశం ఉందని న్యాయవాద వర్గాలు చెబుతున్నాయి. రాబోయే రోజుల్లో ఈ ఘటన విచారణలో ఎలాంటి మలుపులు తిరుగుతుందో, పోలీసుల నివేదికలో ఏ విషయాలు వెలుగులోకి వస్తాయో వేచి చూడాల్సి ఉందని అంటున్నారు.