8 వారాల్లోనే బ‌ట్ట‌త‌ల‌పై వెంట్రుక‌లు.. శాస్త్ర‌వేత్త‌ల స‌రికొత్త ఆవిష్క‌ర‌ణ‌

జుట్టు రాలడం అనేది నేడు చాలా మందిని వేధిస్తున్న ప్రధాన సమస్య. దీనికి పరిష్కారంగా తైపీకి చెందిన శాస్త్రవేత్తల బృందం ఒక అద్భుతమైన ప్లాంట్-బేస్డ్ (మొక్కల ఆధారిత) హెయిర్ సీరమ్‌ను అభివృద్ధి చేసింది. కేవలం 56 రోజుల్లోనే అంటే సుమారు ఎనిమిది వారాల్లోనే జుట్టు సాంద్రతను, మందాన్ని గణనీయంగా పెంచడంలో ఈ సీరమ్ అద్భుతంగా పనిచేస్తుందని క్లినికల్ ట్రయల్స్ ద్వారా నిరూపితమైంది. ఈ పరిశోధన వివరాలు ఇప్పుడు ప్రపంచవ్యాప్తంగా జుట్టు రాలడం, బట్టతల సమస్యతో బాధపడుతున్న వారి దృష్టిని ఆకర్షిస్తున్నాయి.

ఈ పరిశోధనలో భాగంగా 60 మంది వయోజనులపై `రాండమైజ్డ్ డబుల్ బ్లైండ్` పరీక్షలు నిర్వహించారు. వీరు ప్రతిరోజూ రాత్రిపూట కేవలం ఒక మిల్లీలీటర్ సీరమ్‌ను తమ మాడుపై ఎనిమిది వారాల పాటు అప్లై చేశారు. ఈ పరీక్షా కాలం ముగిసేసరికి ప్లేసిబో (ఏ మందు లేని సాధారణ ద్రవం) వాడిన వారితో పోలిస్తే... ఈ కొత్త సీరమ్ వాడిన వారిలో జుట్టు మందం 25 శాతం పెరిగినట్లు శాస్త్రవేత్తలు గుర్తించారు. సాధారణంగా జుట్టు పెరుగుదలకు సంబంధించిన చికిత్సలు ఫలితాన్ని చూపడానికి నెలల సమయం తీసుకుంటాయి.. కానీ ఈ సీరమ్ అతి తక్కువ సమయంలోనే సానుకూల సంకేతాలను చూపడం విశేషం.

ఈ సీరమ్‌లోని పదార్థాల ఎంపిక చాలా శాస్త్రీయంగా జరిగింది. ఇందులో సాధారణంగా షాంపూలలో ఉండే కెఫీన్ - పాంథెనాల్‌తో పాటు `సెంటెల్లా ఆసియాటికా` అనే ఉష్ణమండల మొక్క నుండి సేకరించిన ఎక్స్‌ట్రా సెల్యులార్ వెసికిల్స్ ను కలిపారు. వీటితో పాటు జుట్టును ఉత్పత్తి చేసే చర్మ కణాలకు మద్దతు ఇచ్చే `ఫైబ్రోబ్లాస్ట్ గ్రోత్ ఫ్యాక్టర్ 7` (FGF-7), వెంట్రుకల కుదుళ్ల పెరుగుదలను ప్రోత్సహించే `ఇన్సులిన్ లాంటి గ్రోత్ ఫ్యాక్టర్ 1` (IGF-1) వంటి ప్రొటీన్లను కూడా జోడించారు. ఈ మిశ్రమం జుట్టు పెరుగుదల దశను పొడిగించడంలో కీలక పాత్ర పోషిస్తుంది.

అయితే ఈ అధ్యయనం ప్రాథమిక దశలో ఉందని శాస్త్రవేత్తలు గుర్తు చేస్తున్నారు. ఈ పరీక్ష కేవలం ఎనిమిది వారాల పాటు మాత్రమే జరగడం వల్ల.. దీని ఫలితాలు ఎంత కాలం పాటు స్థిరంగా ఉంటాయనేది ఇంకా తెలియాల్సి ఉంది. అలాగే ప్రస్తుతం మార్కెట్లో అందుబాటులో ఉన్న మినోక్సిడిల్ లేదా ఫినాస్టరైడ్ వంటి మందులతో పోల్చినప్పుడు ఇది ఎంతవరకు సమర్థవంతంగా పనిచేస్తుందనే దానిపై మరిన్ని పరిశోధనలు జరగాలి. పెద్ద ఎత్తున క్లినికల్ ట్రయల్స్ నిర్వహించి.. జుట్టు రాలడం ఎక్కువగా ఉన్న వారిపై ఇది ఎలా పనిచేస్తుందో పరిశీలించాల్సి ఉంది.

ప్రస్తుతానికి ఈ `సెంటెల్లా ఆసియాటికా` సీరమ్ ఫలితాలు ఆశాజనకంగా ఉన్నా.. జుట్టు సమస్యలతో బాధపడేవారు వైద్యుల సలహా మేరకు ప్రస్తుతం అందుబాటులో ఉన్న ప్రామాణిక చికిత్సలను అనుసరించడం శ్రేయస్కరం. జుట్టు పెరుగుదల అనేది ఒక నెమ్మదైన ప్రక్రియ అని.. దానికి స్థిరమైన సంరక్షణ అవసరమని గుర్తుంచుకోవాలి. భవిష్యత్తులో జ‌రిగే మరిన్ని పరీక్షలు ఈ కొత్త ప్లాంట్-బేస్డ్ సీరమ్‌ను సురక్షితమైన .. వేగవంతమైన ప్రత్యామ్నాయంగా మార్చే అవకాశం ఉంది.