దక్షిణాసియాలో మరో యుద్ధం : అప్ఘనిస్తాన్ పై పాకిస్తాన్ దాడి

ఇటీవలి కాలంలో దక్షిణాసియాలో రాజకీయ, భద్రతా పరిణామాలు వేగంగా మారిపోతున్నాయి. ముఖ్యంగా పాకిస్తాన్‌ - అప్ఘనిస్తాన్‌ మధ్య సంబంధాలు మరింత ఉద్రిక్తతకు దారితీశాయి. ఒకప్పుడు సన్నిహిత మిత్రదేశాలుగా ఉన్న ఈ రెండు ఇస్లామిక్‌ దేశాలు, ఇప్పుడు ప్రత్యక్ష యుద్ధ పరిస్థితుల్లోకి వెళ్లాయి.

* యుద్ధానికి దారితీసిన పరిణామాలు

పాకిస్తాన్‌ వైమానిక దళం ఇటీవల అప్ఘనిస్తాన్‌ రాజధాని కాబూల్‌ పరిసర ప్రాంతాల్లో వైమానిక దాడులు జరిపింది. ఈ దాడుల్లో తెహ్రీక్‌-ఇ-తాలిబాన్‌ పాకిస్తాన్‌ (టీటీపీ) ఉగ్రవాద శిబిరాలను లక్ష్యంగా చేసుకున్నట్లు పాక్‌ రక్షణ వర్గాలు పేర్కొన్నాయి. అయితే కాబూల్‌లోని తాలిబాన్‌ ప్రభుత్వం మాత్రం ఈ దాడులను తీవ్రంగా ఖండించింది. వీటి వల్ల పౌరుల ప్రాణాలకు ప్రమాదం ఏర్పడిందని, అంతర్జాతీయ చట్టాలకు విరుద్ధమని తాలిబాన్‌ ఆరోపించింది.

* పాక్‌ వాదన – భద్రతా చర్యలే!

ఇటీవల పాక్‌ భూభాగంలో టీటీపీ ఉగ్రవాదులు వరుస దాడులు జరపడంతో ఆ ముప్పును ఎదుర్కొనే భాగంగా ఈ వైమానిక దాడులు చేశామని పాక్‌ పేర్కొంది. తాలిబాన్‌ ప్రభుత్వం టీటీపీ మిలిటెంట్లకు ఆశ్రయం ఇస్తోందనే ఆరోపణలు కూడా చేసింది. పాక్‌ రక్షణ మంత్రి స్పష్టంగా పేర్కొన్నట్లుగా “అఫ్గాన్‌ భూభాగం పాక్‌ వ్యతిరేక కార్యకలాపాలకు వేదికగా మారుతోంది” అనే వాదనతో పాక్‌ చర్యలను న్యాయబద్ధం చేసుకోవడానికి ప్రయత్నిస్తోంది.

* అఫ్గాన్‌ స్పందన – పాక్‌ దాడులు అన్యాయం!

అఫ్గాన్‌ తాలిబాన్‌ వర్గాలు మాత్రం పాక్‌ ఆరోపణలను పూర్తిగా ఖండించాయి. తమ భూభాగంలో టీటీపీ కార్యకలాపాలు లేవని, ఇవన్నీ పాక్‌ రాజకీయ పన్నాగాలని తాలిబాన్‌ పేర్కొంది. “ఇలాంటి దాడులు కొనసాగితే, ప్రతిస్పందన తప్పదు” అంటూ హెచ్చరిక కూడా జారీ చేసింది. కాబూల్‌లో జరిగిన పేలుళ్లతో పౌరులు భయాందోళనకు గురవుతున్నారు.

* టీటీపీ చీఫ్‌ ఆరోగ్యం చుట్టూ గందరగోళం

వైమానిక దాడుల్లో టీటీపీ చీఫ్‌ ముఫ్రీ నూర్‌ మెహ్సూద్‌ మరణించాడని వార్తలు చక్కర్లు కొడుతుండగా ఆయనే స్వయంగా అవి తప్పుడు వార్తలని కొట్టిపారేశారు. తాను సురక్షితంగా ఉన్నానని, పాక్‌ సైన్యం తప్పుడు ప్రచారం చేస్తోందని ఆరోపించారు. ఇది తాలిబాన్‌ అనుబంధ వర్గాల్లో మరింత చర్చకు దారితీసింది.

* భారత్‌ దృష్టి – ప్రాంతీయ స్థిరత్వం సవాల్‌లో

పాక్‌-అఫ్గాన్‌ ఘర్షణలు దక్షిణాసియా భద్రతా సమీకరణాలపై నేరుగా ప్రభావం చూపే అవకాశం ఉంది. భారత్‌–అఫ్గాన్‌ మధ్య పెరుగుతున్న స్నేహ సంబంధాలు పాక్‌ను ఆందోళనకు గురిచేస్తున్నాయి. ఈ నేపథ్యంలో పాక్‌ చర్యలు కేవలం భద్రతా చర్యలు కాకుండా రాజకీయ సంకేతాలుగా కూడా భావించవచ్చు.

పాక్‌–అఫ్గాన్‌ సంబంధాలు ఇప్పటికే ఉద్రిక్తంగా మారాయి. ఈ దాడులు ఇరు దేశాల మధ్య ఉన్న విశ్వాసాన్ని పూర్తిగా దెబ్బతీశాయి. పరిస్థితి ఇలాగే కొనసాగితే, ప్రాంతీయ శాంతి, భద్రతపై తీవ్ర ప్రభావం చూపే అవకాశం ఉంది. దక్షిణాసియా భవిష్యత్‌ భద్రతా సమీకరణాలు ఇప్పుడు ఈ రెండు దేశాల మధ్య పెరుగుతున్న ఉద్రిక్తతలపైనే ఆధారపడి ఉన్నాయి.