సునామీ వేళ రోడ్డు గేటు ఓపెన్ చేసిన టాప్ యాంకర్... ట్రెండింగ్ ఇష్యూ!

బుధవారం ఉదయం రష్యాను భారీ భూకంపం కుదిపేసిన సంగతి తెలిసిందే. దీంతో రష్యాతో పాటు జపాన్, అమెరికా, మొదలైన పలు దేశాల్లో సునామీ మొదలైంది! సముద్రపు అలలు భారీ ఎత్తున ఎగసిపడుతుండటంతో తీర ప్రాంత ప్రజలు ఎత్తైన ప్రాంతాలకు వెళ్తున్నారు. ఈ సమయంలో ప్రముఖ టీవీ హోస్ట్ 70 ఏళ్ల ఓప్రా విన్‌ ఫ్రే వ్యవహారం ట్రెండింగ్ గా మారింది.

అవును... రష్యాలోని సముద్ర గర్భంలో సంభవించిన కారణంగా జపాన్ తో పాటు అమెరికాలోని పలు రాష్ట్రాల్లో సునామీ హెచ్చరికలు జారీ అయ్యాయి. ఈ సమయంలో తీర ప్రాంతాంలోనూ.. ప్రధానంగా అమెరికాలోని ద్వీప రాష్ట్రం హవాయిలోనూ ఉన్న పర్యాటకులు, స్థానికులు సురక్షిత ప్రంతాలకు (ఎత్తైన ప్రాంతాలకు) తరలి వెళ్తున్నారు. ఈ సమయంలో ఓప్రా విన్ ఫ్రే అందుకు దారి ఇవ్వలేదు!

వివరాళ్లోకి వెళ్తే... హవాయ్ ప్రాంతానికి సునామీ అలర్ట్ జారీ కావడంతో ప్రజలు సురక్షిత ప్రాంతాలకు బయలుదేరారు. ప్రధానంగా... మావ్ ప్రాంతానికి ఈ ముప్పు ఎక్కువగా ఉండటంతో ఎత్తయిన ప్రాంతాలకు చేరుకుంటున్నారు. ఈ క్రమంలో.. వైలీ నుంచి కులా ప్రాంతానికి వెళ్లాలంటే చుట్టు అవుతుంది.. ఫలితంగా చాలా సమయం వృథా అవుతుంది.

అయితే దీనికి ఓ షార్ట్ కట్ మార్గం ఉంది. కాకపోతే.. అది ఓప్రా విన్‌ ఫ్రేకు సంబంధించిన ఆస్తుల గుండా వెళ్లే ప్రైవేటు రోడ్డు. ఈ క్రమంలో... విన్ ఫ్రే కనుక ఇక్కడ గేట్ ఓపెన్ చేస్తే చాలా తక్కువ సమయంలోనే ఈ మార్గం గుండా వెళ్లి ప్రజలు సురక్షిత ప్రాంతాలకు చేరుకోగలరు. అయితే విన్‌ ఫ్రే మాత్రం ఆ గేట్‌ ను ఓపెన్ చేసేందుకు ససేమిరా అంటున్నారంటూ సోషల్ మీడియాలో వీడియోలు వైరల్ గా మారాయి.

ఈ సందర్భంగా.. మేము ఇరుక్కుపోయాము, సునామీ రాబోతోంది, ఓప్రా కాస్త ఈ రోడ్డు ఓపెన్ చేయించండి, పోలీసులు ప్రయత్నిస్తున్నారు అంటూ సోషల్ మీడియాలో సెల్ఫీ వీడియోలు పెడుతూ నెటిజన్లు, ఆమె అభిమానులు రిక్వస్టులు పెట్టారు. ఈ వీడియోలు విపరీతంగా హల్ చల్ చేశాయి. ఈ సమయంలో ఆ రోడ్డు ముందు భారీగా ట్రాఫిక్ జామ్ ఏర్పడింది.

ఆఖరికి కరుణించిన ఓప్రా!:

ఈ సమయంలో తీవ్ర ఆందోళనలు నెలకొన్న వేళ ఓప్రా మనసు కరిగిందని చెబుతున్నారు. ఈ సమయంలో.. చాలాసేపటి తర్వాత, తీవ్రమైన ప్రజా ఒత్తిడి తర్వాత, సునామీ నుండి తప్పించుకోవాలని వెళ్తున్న వారికి ఓప్రా ప్రైవేట్ రోడ్డు తెరవబడింది. వాస్తవానికి ఈ పని కొన్ని గంటల క్రితమే చేసి ఉండాలి అని అంటూ... ఈ రోడ్డు తెరవబడిందని మిగిలిన వారికి సూచిస్తూ నెటిజన్లు సోషల్ మీడియాలో అప్ డేట్స్ ఇస్తున్నారు.

1000 ఎకరాల ఆస్తులు!:

హవాయ్ ద్వీపంలో ఓప్రా ఆస్తులు చూస్తే మైండ్ బ్లాక్ అవుతుందని అంటున్నారు నెటిజన్లు. ఇందులో భాగంగా... మావ్ ద్వీపంలో ఆమె సుమారు 1000 ఎకరాల భూమిని కొనుగోలు చేసిందని ప్రముఖ బిజినెస్ పోర్టల్ రియల్టర్ డాట్ కామ్ పేర్కొంది. 2002 - 03 ప్రాంతంలో 163 ఎకరాలను కులా ప్రాంతంలో కొనుగోలు చేసి, అక్కడే అత్యాధునిక వసతులతో కూడిన ఫామ్‌ హౌజ్ నిర్మించుకున్నారు. ఈ క్రమంలోనే ఆమె ఓ ప్రైవేటు రోడ్డును నిర్మించుకున్నారు.