ఇరాన్ తో యుద్ధంలో అమెరికా రోజుకో యుద్ధ విమానం కోల్పోయిందా.. గణాంకాలు చెప్పేది ఇదే..!

అగ్రరాజ్యం అమెరికాకు ఇరాన్ గడ్డపై ఎదురైన ఈ అనుభవం ‘ఆపరేషన్ ఎపిక్ ఫ్యూరీ’ చరిత్రలోనే ఒక మాయని మచ్చగా మిగిలిపోయేలా ఉంది. అత్యాధునిక సాంకేతికత, స్టెల్త్ విమానాలు ఉన్నప్పటికీ.. ఇరాన్ క్షిపణి వ్యవస్థ, డ్రోన్ దాడులు అమెరికా వాయుసేనను ఉక్కిరిబిక్కిరి చేశాయని ఈ గణాంకాలు చెబుతున్నాయి.

39 రోజుల్లో.. 39 విమానాలు..

అమెరికా సైనిక చరిత్రలో ఇది ఒక ఊహించని కుదుపు. 39 రోజుల్లో 39 యుద్ధ విమానాలను కోల్పోవడం అగ్రరాజ్య రక్షణ వ్యవస్థలోని లోపాలను ఎత్తి చూపుతోంది. ఫిబ్రవరి 28న మొదలైన ఈ ఉద్రిక్తతలు పశ్చిమాసియాను రణక్షేత్రంగా మార్చాయి. ఇరాన్ వైమానిక దాడులను తట్టుకోలేక, ప్రపంచంలోనే అత్యంత ఖరీదైన, అత్యాధునికమైన యుద్ధ విమానాలు నేలకొరగడం ఇప్పుడు ప్రపంచ వ్యాప్తంగా రక్షణ నిపుణులను ఆశ్చర్యానికి గురిచేస్తోంది.

ఎఫ్‌-35 స్టెల్త్ విమానానికే తప్పని దెబ్బ!

ఈ యుద్ధంలో అత్యంత కీలకమైన అంశం ఏంటంటే.. అమెరికా గర్వంగా చెప్పుకునే ఎఫ్‌-35 స్టెల్త్ యుద్ధ విమానం ఇరాన్ దాడిలో దెబ్బతినడం. రాడార్లకు చిక్కకుండా గగనతలాన్ని శాసించే ఈ ఐదో తరం విమానం, చరిత్రలోనే మొదటిసారి ఒక పోరాటంలో దెబ్బతింది. ఇది అమెరికా ఆయుధ సంపత్తి, ఇరాన్ వైమానిక రక్షణ వ్యవస్థపై సరికొత్త చర్చకు దారితీసింది.

సౌదీ, కువైట్ స్థావరాలపై..

అమెరికా విమానాలు కేవలం గాలిలోనే కాదు, నేలపై ఉండగా కూడా ధ్వంసమయ్యాయి. సౌదీ అరేబియాలో ఉన్న అమెరికా వైమానిక స్థావరంపై ఇరాన్ జరిపిన క్షిపణి దాడుల్లో ఐదు కేసీ-135 రీఫ్యూయలింగ్ విమానాలు, ఒక ‘బోయింగ్ ఈ-3 సెంట్రీ’ నిఘా విమానం తీవ్రంగా దెబ్బతిన్నాయి. కువైట్‌లోని స్థావరంపై జరిగిన డ్రోన్ దాడిలో ఒక చినూక్ హెలీకాప్టర్ ధ్వంసం కాగా, 'ఫ్రెండ్లీ ఫైర్' వల్ల మూడు ఎఫ్‌-15ఈ ఫైటర్ జెట్లు కూలిపోవడం అమెరికాకు అతిపెద్ద అవమానంగా మారింది.

డ్రోన్ విభాగానికి భారీ నష్టం

యుద్ధ క్షేత్రంలో నిఘా, దాడులకు పేరుగాంచిన MQ-9ఏ రీపర్ డ్రోన్లకు కూడా ఇరాన్ చుక్కలు చూపించింది. ఏకంగా 24 రీపర్ డ్రోన్లు ఈ 39 రోజుల్లో నేలకొరిగాయి. వీటితో పాటు ఏ-10 థండర్‌బోల్ట్, ఎఫ్‌-15 స్ట్రైక్ ఈగిల్ వంటి శక్తివంతమైన విమానాలు ఇరాన్ ప్రతీకార దాడులకు బలయ్యాయి.

అగ్రరాజ్యం అమెరికాకు ఇరాన్ విసిరిన ఈ సవాలు రక్షణ రంగాన్ని కలవరపెడుతోంది. సంప్రదాయ యుద్ధ విమానాల కంటే ఇరాన్ వాడుతున్న డ్రోన్ టెక్నాలజీ, క్షిపణి వ్యవస్థలు ఎక్కువ ప్రభావం చూపుతున్నట్లు కనిపిస్తోంది. ‘ఆపరేషన్ ఎపిక్ ఫ్యూరీ’ అమెరికాకు కేవలం సైనిక నష్టమే కాదు.. ఆర్థికంగా, వ్యూహాత్మకంగా కూడా కోలుకోలేని దెబ్బ తీసింది. ఇరాన్ ఊహించిన దానికంటే బలమైన దేశమని ఈ 39 రోజుల గణాంకాలు నిరూపిస్తున్నాయి.