ప్రధాని అత్యాచారం చేశాడు.. ఆమె ఆత్మకథ ఇప్పుడు ప్రపంచవ్యాప్తంగా సంచలనం

ప్రపంచాన్ని కుదిపేసిన జేఫ్రీ ఎప్‌స్టీన్ లైంగిక దౌర్జన్య నెట్వర్క్‌ కేసు మరోసారి తీవ్ర చర్చనీయాంశమైంది. ఈ నెట్వర్క్‌లో ప్రధాన బాధితురాలైన అమెరికన్ యువతి వర్జీనియా గిఫ్రే రాసిన ఆత్మకథ - “Nobody’s Girl: A Memoir of Surviving Abuse and Fighting for Justice” ప్రపంచవ్యాప్తంగా పెను సంచలనాన్ని సృష్టిస్తోంది. ఆమె మరణానంతరం అక్టోబర్ 21న విడుదలైన ఈ పుస్తకం, శక్తివంతుల వెనుక దాగి ఉన్న క్రూరమైన నిజాలను మరోసారి సమాజం ముందుంచింది.

శక్తివంతుల మధ్య బందీ జీవితం

వర్జీనియా గిఫ్రే తన చిన్ననాటి నుంచే ఎప్‌స్టీన్ నెట్‌వర్క్‌లో చిక్కుకున్న దయనీయ పరిస్థితులను, తాను ఎదుర్కొన్న దారుణమైన లైంగిక వేధింపులు.. మానసిక హింసను ఈ ఆత్మకథలో హృదయ విదారకంగా వివరించింది. ఎప్‌స్టీన్ , అతని సహచరురాలు గిస్లేన్ మ్యాక్స్‌వెల్ తనను అగ్రశ్రేణి రాజకీయ నాయకులు, వ్యాపారవేత్తలు, రాజ కుటుంబ సభ్యుల ముందుకు ‘సమర్పించారని’ ఆమె రాసింది. వారి మధ్య బందీగా గడిపిన కాలం ఆమె జీవితంలో అత్యంత భయంకరమైన ఘట్టంగా పేర్కొంది.

“2002లో ఒక ప్రధానమంత్రి నన్ను అత్యాచారం చేశాడు”

ఈ పుస్తకంలో అత్యంత సంచలనాత్మక అంశం 2002లో ఎప్‌స్టీన్‌కి చెందిన ప్రైవేట్ ద్వీపంలో ఒక “పేరున్న ప్రధానమంత్రి” తనపై అత్యాచారం చేశాడని ఆమె వర్ణించడం. ఆ దారుణ ఘటనలో తాను తీవ్రమైన శారీరక, మానసిక హింసకు గురయ్యానని గిఫ్రే పేర్కొంది. “నేను ప్రాణాల కోసం వేడుకుంటుంటే, అతను నవ్వుతూ సంతోషించేవాడు,” అని ఆమె ఆనాటి భయానక అనుభవాన్ని అక్షరాల్లో నిక్షిప్తం చేసింది.

ఆ వ్యక్తి పేరును ఆమె పుస్తకంలో స్పష్టంగా రాయకపోయినా, ఈ ఆరోపణలకు సంబంధించిన న్యాయపరమైన వాదనలలో ఆమె ఇజ్రాయెల్ మాజీ ప్రధాని ఎహుద్ బరాక్ పేరును ప్రస్తావించినట్లు పత్రికా కథనాలు వెల్లడించాయి. అయితే బరాక్ ఈ ఆరోపణలను పూర్తిగా ఖండించారు. ఎప్‌స్టీన్‌తో పరిచయం ఉన్నదని మాత్రమే ఆయన అంగీకరించారు.

భయం నీడలో... పేర్లు చెప్పలేని నిస్సహాయత

తనపై దాడి చేసిన ఇతర శక్తివంతుల పేర్లను బయటపెట్టలేకపోవడానికి గల కారణాలను కూడా గిఫ్రే స్పష్టం చేసింది. వారి అపారమైన శక్తి, బెదిరింపులు, చట్టపరమైన ఒత్తిడి తనను అడ్డుకున్నాయని ఆమె వివరించింది. “వారు న్యాయస్థానాల ద్వారా నన్ను నాశనం చేసేవారు” అని, కొందరు దావాలు వేసి, ఆర్థికంగా తనను బలహీనపరచాలని చూశారని ఆమె ఆవేదన వ్యక్తం చేసింది.

బ్రిటన్‌ రాజకుటుంబంతో వివాదం: ప్రిన్స్ ఆండ్రూ

ఈ ఆత్మకథలో బ్రిటన్‌ రాజ కుటుంబ సభ్యుడు ప్రిన్స్ ఆండ్రూ పేరు కూడా ఉంది. తాను చిన్న వయసులో ఉన్నప్పుడు ప్రిన్స్ ఆండ్రూ తనపై లైంగిక దాడి చేశారని గిఫ్రే పేర్కొంది. ఈ కేసు అంతర్జాతీయస్థాయిలో పెను సంచలనం సృష్టించిన విషయం తెలిసిందే. ఆండ్రూ మాత్రం ఈ ఆరోపణలన్నింటినీ ఖండించారు.

న్యాయం కోసం గిఫ్రే పోరాటం

400 పేజీల ఈ పుస్తకం కేవలం బాధల కథ మాత్రమే కాదు. ఇది గిఫ్రే చూపిన అసాధారణమైన ధైర్యానికి, న్యాయం కోసం ఆమె చేసిన సుదీర్ఘ పోరాటానికి ప్రతీకగా నిలుస్తుంది. “నేను నన్ను కోల్పోలేదు… నా కథను చెప్పడం ద్వారా ఇంకొక అమ్మాయి రక్షించబడుతుందనే ఆశతో ఈ పుస్తకం రాశాను,” అని ఆమె పేర్కొంది.

వర్జీనియా గిఫ్రే ఆత్మకథ ప్రపంచానికి మరోసారి శక్తివంతుల వెనుక దాగి ఉన్న లైంగిక దౌర్జన్యాల క్రూర నిజాన్ని గుర్తు చేసింది. ఆమె చెప్పిన ఈ ధైర్యవంతమైన కథ - బాధితుల గొంతుకగా మారి, న్యాయం కోసం సమాజం ఆలోచించేలా చేస్తోంది.