యూరప్ గుండా నో ఫ్లై.. ఇజ్రాయెల్ ప్రధాని ఎందుకు భయపడ్డాడు?

ఇజ్రాయెల్ ప్రధానమంత్రి బెంజమిన్ నెతన్యాహు అమెరికా పర్యటన సందర్భంగా యూరప్‌ గగనతలాన్ని పూర్తిగా తప్పించుకుని ప్రయాణించడం, అంతర్జాతీయ రాజకీయాలు, న్యాయ వ్యవస్థలో ఒక కీలకమైన పరిణామం. ఇది కేవలం భద్రతాపరమైన చర్య మాత్రమే కాదు, అంతర్జాతీయ క్రిమినల్ కోర్ట్ (ICC) అధికార పరిధి, యూరప్-ఇజ్రాయెల్ సంబంధాల క్షీణత.. నెతన్యాహు అంతర్జాతీయ ఒంటరితనాన్ని సూచించే దౌత్య సంకేతంగా చెప్పొచ్చు.

అంతర్జాతీయ క్రిమినల్ కోర్టు (ICC) అరెస్ట్ వారెంట్ భయం

నెతన్యాహు తన ప్రయాణ మార్గాన్ని మార్చుకోవడానికి ప్రధాన కారణం అంతర్జాతీయ క్రిమినల్ కోర్టు (ICC) 2024 నవంబరులో గాజా యుద్ధం నేపథ్యంలో ఆయనపై జారీ చేసిన అరెస్ట్ వారెంట్ నే... యూరప్‌లోని చాలా దేశాలు ICCలో సభ్యులుగా ఉన్నాయి. ICC సభ్యదేశాల గగనతలం గుండా ప్రయాణిస్తే లేదా భూభాగంలోకి అడుగుపెడితే, ఆయా దేశాలకు చట్టపరంగా ఆ వ్యక్తిని అరెస్ట్ చేసి అదుపులోకి తీసుకోవాల్సిన బాధ్యత ఉంటుంది.

ఐర్లాండ్ వంటి దేశాలు తమ భూభాగంలోకి వస్తే అరెస్ట్ చేస్తామని స్పష్టం చేయగా, ఫ్రాన్స్ వంటివి అరెస్ట్ చేయబోమని ప్రకటించాయి. ఈ భిన్న వైఖరితో, నెతన్యాహు తన పర్యటనలో ఎలాంటి చట్టపరమైన అవాంతరాలు ఎదురవ్వకుండా ఉండేందుకు రిస్క్ తీసుకోవడం మానుకున్నారు.

అందుకే ఆయన విమానం (వింగ్స్ ఆఫ్ జియాన్) మధ్యధరా సముద్రం, జిబ్రాల్టర్ జలసంధి మీదుగా యూరప్‌ను దాటకుండా ప్రత్యామ్నాయ మార్గాన్ని ఎంచుకుంది.

అంతర్జాతీయ ఒంటరితనం.. దౌత్య ప్రభావం

నెతన్యాహు ఈ విధంగా ప్రయాణించడం అంతర్జాతీయ వేదికపై ఆయన ఒంటరితనాన్ని స్పష్టంగా సూచిస్తుంది. ఈ చర్య అమెరికా తప్ప మిగిలిన పాశ్చాత్య మిత్రదేశాలలో కూడా నెతన్యాహుపై పెరుగుతున్న వ్యతిరేకతను బయటపెట్టింది. ముఖ్యంగా గాజా యుద్ధం కారణంగా యూరప్‌లో ఇజ్రాయెల్‌కు వ్యతిరేకంగా తీవ్ర నిరసనలు, విమర్శలు ఉన్నాయి. ఒక దేశాధినేత తన భద్రత కోసం ప్రయాణ మార్గాన్ని మార్చుకోవాల్సిన స్థితి ఎదురవడం, ICC అరెస్ట్ వారెంట్ యొక్క ప్రాధాన్యత, ముప్పు పెరిగిందని తెలియజేస్తుంది. అంతర్జాతీయ న్యాయ వ్యవస్థ తమపై చర్యలు తీసుకోగలదనే భయాన్ని ఇది ధృవీకరించింది.

యూరప్‌లోని కీలక దేశాల పట్ల అనుమానాలు, అవిశ్వాసం పెరగడం యూరప్-ఇజ్రాయెల్ దౌత్య సంబంధాలను మరింత కఠినతరం చేయవచ్చు. ఇజ్రాయెల్ మరింతగా అంతర్జాతీయంగా ఒంటరిపడే ప్రమాదం ఉంది.

* అమెరికా పర్యటన ఉద్దేశం

యూరప్‌ను దాటకుండా అమెరికా వెళ్లడంలో నెతన్యాహు ఉద్దేశం తన చట్టపరమైన భద్రతను నిర్ధారించుకోవడమే కాకుండా తన రాజకీయ అజెండాను ముందుకు తీసుకెళ్లడం. ఐరాసలో ప్రసంగించడం.. డొనాల్డ్ ట్రంప్‌తో భేటీ కావడం ద్వారా అమెరికా మద్దతును మరింత బలపరచుకోవడమే ఆయన ప్రధాన లక్ష్యం. గాజా యుద్ధంపై వస్తున్న అంతర్జాతీయ విమర్శలకు సమాధానం చెప్పడం.. ఇజ్రాయెల్‌పై పెరుగుతున్న ఒత్తిడిని తగ్గించే ప్రయత్నం చేయడం ఈ పర్యటనలోని ముఖ్య అంశాలుగా కనిపిస్తున్నాయి.

నెతన్యాహు చేపట్టిన ఈ ' విమాన మార్గమార్పు' అనేది రాజకీయ, చట్టపరమైన అనిశ్చితికి అద్దం పడుతోంది. అంతర్జాతీయ న్యాయవ్యవస్థ ప్రభావం, ఇజ్రాయెల్ పట్ల యూరప్ దేశాల భిన్నాభిప్రాయాలు.. నెతన్యాహు రాజకీయ భవిష్యత్తుపై నెలకొన్న సవాళ్లు ఈ చర్య ద్వారా బహిర్గతమయ్యాయి. అమెరికాలో తాత్కాలిక మద్దతు లభించినప్పటికీ, ప్రపంచ వేదికపై నెతన్యాహు.. ఇజ్రాయెల్ మరింత తీవ్రమైన సవాళ్లను ఎదుర్కోక తప్పదని స్పష్టమవుతోంది.