నేపాల్ ఉద్యమానికి ఆద్యుడు.. ఇప్పుడు కొత్త ప్రధాని ఈ జెన్ జెడ్ హీరో

నేపాల్‌లో ఇటీవల చెలరేగిన యువత ఉద్యమం దేశ రాజకీయాలను కుదిపేసింది. సోషల్ మీడియా వేదికలపై నిషేధం, అవినీతి ఆరోపణలు, ప్రభుత్వ వైఫల్యాలపై ఆగ్రహం వ్యక్తం చేసిన జనరేషన్ జెడ్ యువత వీధుల్లోకి దిగింది. ఈ నిరసనలు హింసాత్మక మలుపు తిప్పడంతో 19 మంది ప్రాణాలు కోల్పోయారు. పరిస్థితిని అదుపు చేయలేక, ప్రధానమంత్రి కేపీ శర్మ ఓలి రాజీనామా చేయాల్సి వచ్చింది. ఈ నేపథ్యంలో కాఠ్మాండు మేయర్‌గా ఉన్న బాలేంద్ర షా (బాలెన్) తదుపరి ప్రధానమంత్రి అభ్యర్థిగా నిలిచే అవకాశం చర్చనీయాంశమైంది.

రాపర్‌ నుంచి నాయకుడిగా

1990లో కాఠ్మాండులో జన్మించిన బాలెన్, ఇంజినీరింగ్ పట్టభద్రుడు. సివిల్ ఇంజినీరింగ్‌లో డిగ్రీ, ఆపై భారతదేశంలోని విశ్వేశ్వరయ్య టెక్నలాజికల్ యూనివర్సిటీ నుంచి స్ట్రక్చరల్ ఇంజినీరింగ్‌లో మాస్టర్స్ పూర్తి చేశారు. రాజకీయాల్లోకి రాకముందు, ఆయన నేపాల్ హిప్–హాప్ రంగంలో రాపర్‌గా పేరుపొందారు. అవినీతి, అసమానతలపై ఆయన రాసిన ‘‘బలిదాన్’’ పాట యువతను విపరీతంగా ఆకర్షించింది.

2022లో కాఠ్మాండు మేయర్ ఎన్నికల్లో స్వతంత్ర అభ్యర్థిగా పోటీ చేసిన బాలెన్, ప్రధాన పార్టీలను ఓడించి ఘనవిజయం సాధించారు. పాలనలో ఆయన చేపట్టిన శుభ్రత కార్యక్రమాలు, అక్రమ నిర్మాణాల తొలగింపు, పన్నుల వసూళ్లు, ప్రభుత్వ భూముల రక్షణ వంటి చర్యలు ప్రజాదరణ తెచ్చాయి.

* జనరేషన్ జెడ్ మద్దతు

సోషల్ మీడియా నిషేధంపై యువత ఆందోళనలకు బాలెన్ బహిరంగ మద్దతు తెలిపారు. "ఇది యువత ఉద్యమం. నేను వయస్సు కారణంగా నేరుగా పాల్గొనలేను కానీ నా మద్దతు మీకే," అని ఆయన ప్రకటించారు. ఆయన పిలుపు సోషల్ మీడియాలో విస్తృత ఆదరణ పొందింది. #BalenForPM, “బాలెన్ దాయ్, టేక్ ద లీడ్” వంటి హ్యాష్‌ట్యాగ్‌లు వైరల్ అయ్యాయి.

అంతర్జాతీయ వేదికలపై కూడా బాలెన్ పేరు వెలుగులోకి వచ్చింది. 2023లో టైమ్ మ్యాగజైన్ ఆయనను “టాప్ 100 ఎమర్జింగ్ లీడర్స్” జాబితాలో చేర్చింది. న్యూయార్క్ టైమ్స్ ఆయనను ప్రజలతో మమేకమై పనిచేసే నాయకుడిగా ప్రశంసించింది.

ముందున్న సవాళ్లు

బాలెన్ పేరు ప్రధానమంత్రి పదవికి వినిపిస్తున్నప్పటికీ, సవాళ్లు తక్కువగా లేవు. ఆయన ఇంకా అధికారికంగా అభ్యర్థిత్వం ప్రకటించలేదు. జాతీయ స్థాయిలో పరిపాలనకు కావాల్సిన అనుభవం, రాజకీయ మద్దతు సేకరించాలి. అదనంగా ఆయన గతంలో చేసిన గ్రేటర్ నేపాల్ వ్యాఖ్యలు, భారత సినిమాపై నిషేధం వంటి నిర్ణయాలు, భారత్‌తో సంబంధాలపై ప్రతికూల ప్రభావం చూపే అవకాశముంది.

అయినప్పటికీ, అవినీతి వ్యతిరేక పోరాటం, పారదర్శక పాలన, యువతతో అనుబంధం బాలెన్‌ను ప్రత్యేక నాయకుడిగా నిలబెడుతున్నాయి. రాబోయే రోజుల్లో ఆయన రాజకీయ ప్రస్థానం నేపాల్ భవిష్యత్తు రాజకీయ దిశను నిర్ణయించే అవకాశముంది.