నాలుగు కార్లనే ఉపయోగిస్తున్న ప్రధాని, హోం మంత్రి.. కారణం ఇదేనా.?

నాయకుడు అంటే ఎవరు? స్టేజీలు ఎక్కి ఊకదంపుడు ఉపన్యాసాలు ఇచ్చే వాడు కాదు.. అతని నోటి నుంచి ఏ మాట వచ్చినా మొదలు అవి తను ఆచరించాలి.. ఆ తర్వాత తన ఫాలోవర్స్ ఆచరించేలా చేయాలి. ప్రధాని నరేంద్రమోడీ మొన్న ప్రసంగంలో ఇంధన వినియోగం తగ్గించండి.. గోల్డ్ కొనకండి.. విదేశీ టూర్లకు దూరంగా ఉండాలని చెప్పారు. చెప్పడమే కాదు.. ఆచరిస్తున్నారు కూడా..

రాజకీయ నాయకుల కాన్వాయ్ అంటే మనకు గుర్తొచ్చేది ఏంటి..? కిలోమీటరు పొడవునా సైరన్లు మోగిస్తూ వెళ్లే డజన్ల కొద్దీ కార్లు, వాటి వెనుక పరిగెత్తే వందలాది మంది సిబ్బంది. కానీ, ఇప్పుడు ఆ విధానం లేదు. ఢిల్లీ రోడ్లపై ఒక వింత కనిపిస్తోంది. అమిత్ షా కాన్వాయ్ చూస్తుంటే, ఎవరో పొరపాటున గారేజీలో సగం కార్లు వదిలేసి వచ్చారేమో అన్నట్టుగా ఉంది. ‘పెట్రోల్ వాడకం తగ్గించండి’ అని ప్రధాని మోడీ మైకులో చెబితే, హోం మంత్రి దాన్ని వేగంగా ఆచరణలోకి తెచ్చారు. ‘తక్కువ కార్లు - ఎక్కువ ఆదా’ అనే మంత్రాన్ని అమిత్ షా ఆచరణలో పెట్టారు. డీజిల్ తాగే ఆ భారీ వాహనాల సంఖ్య తగ్గడంతో, ఇప్పుడు హోం మంత్రి ప్రయాణం కేవలం పవర్ ఫుల్ గానే కాదు, పొదుపుగా కూడా సాగుతోంది.

మాట ఇచ్చారు.. వాహనం తగ్గించారు!

దేశానికి ఇంధన కష్టాలు రాబోతున్నాయని హెచ్చరించిన ప్రధాని మోడీ, కేవలం ఉపన్యాసాలతో సరిపెట్టలేదు. ‘నేను చెబితే మీరు వినడం కాదు.. నేను చేస్తే మీరు చూడండి’ అన్నట్టుగా తన కాన్వాయ్‌లోని వాహనాలను ఆయనే తగ్గించుకున్నారు. సెక్యూరిటీ ప్రోటోకాల్స్ కంటే దేశ ఆర్థిక భద్రతే ముఖ్యం అన్నట్టుగా ప్రధాని తీసుకున్న ఈ నిర్ణయం ఇప్పుడు సౌత్ బ్లాక్ నుంచి నార్త్ బ్లాక్ వరకు మార్మోగుతుంది. ప్రధాని స్థాయి వ్యక్తి తన భద్రతా వాహనాలను తగ్గించుకోవడమంటే, అది కేవలం ఇంధనం ఆదా చేయడం మాత్రమే కాదు.. విలాసాలకు స్వస్తి పలకాలని దేశానికి ఇస్తున్న ఒక గట్టి సందేశం.

‘తక్కువ’ వాహనాలు.. ‘ఎక్కువ’ ఇంధన ఆదా..

ప్రధాని పిలుపుని అందుకోవడంలో అమిత్ షా అందరికంటే ముందుంటారు. ఢిల్లీలోని తన నివాసం నుంచి బయలుదేరేటప్పుడు గతంలో ఉన్న వాహనాల హంగామా ఇప్పుడు లేదు. సగానికి పైగా వాహనాలను ఇంటి దగ్గరే ఆపేసి, తక్కువ కాన్వాయ్‌తో కార్యాలయానికి వెళ్తున్నారు. ‘హోం మంత్రి అంటే వంద కార్లు ఉండాలి’ అనే పాత ఫ్యూడల్ ఆలోచనలకు ఆయన చెక్ పెట్టారు. డీజిల్ బిల్లును సగానికి తగ్గించడమే కాకుండా, ఢిల్లీ ట్రాఫిక్ సమస్యలకు కూడా తన వంతుగా కొంత ఉపశమనం కలిగించారు.

గ్యారేజీలకే పరిమితం కానున్న కార్లు!

ప్రధాని, హోం మంత్రి ఇద్దరూ కలిసి ‘పొదుపు’ బాట పట్టడంతో, ఇప్పుడు మిగతా కేంద్ర మంత్రుల పరిస్థితి ‘మింగలేక కక్కలేక’ అన్నట్టుగా తయారైంది. ‘వాళ్లే తగ్గించుకున్నాక.. మనం ఇంకా ఇన్ని కార్లతో తిరిగితే బాగుండదు’ అని లోలోపల చర్చించుకుంటున్నారు. త్వరలోనే మిగతా మంత్రుల కాన్వాయ్‌లు కూడా షెడ్లకే పరిమితం కావడం కనిపిస్తోంది. కొందరు మంత్రులు అయితే ‘వర్క్ ఫ్రమ్ హోమ్’ లేదా ఒకే కారులో ముగ్గురు నలుగురు కలిసి ‘కార్ పూలింగ్’ చేసినా ఆశ్చర్యపోనక్కర్లేదు. మొత్తానికి మోడీ పిలుపుతో కేంద్ర క్యాబినెట్ లో ఇప్పుడు ఇంధన ఆదా పోటీ మొదలైంది.

దేశం కోసం.. డీజిల్ కోత!

ఇంధన ధరలు ఆకాశాన్ని తాకుతున్న వేళ, సామాన్యుడికి పొదుపు నేర్పే ముందు పాలకులు తమ నుంచి మార్పు మొదలుపెట్టడం అభినందనీయం. కాన్వాయ్ తగ్గడం వల్ల కేవలం కొన్ని లీటర్ల పెట్రోల్ మాత్రమే ఆదా అవ్వదు. అది ప్రభుత్వ ఖర్చును తగ్గించడమే కాకుండా, ప్రజల్లో కూడా ఒక బాధ్యతాయుతమైన ఆలోచనను రేకెత్తిస్తుంది. ‘ప్రభుత్వమే తగ్గించుకున్నప్పుడు.. మనం ఎందుకు తగ్గించకూడదు?’ అనే ప్రశ్న ప్రతి పౌరుడిలో మొదలైతే, దేశం ఇంధన సంక్షోభం నుంచి గట్టెక్కడం పెద్ద కష్టమేమీ కాదు.

మొత్తానికి, ఢిల్లీ రోడ్లపై సైరన్ల శబ్దం తగ్గింది.. ఇంధన ఆదా వేగం పెరిగింది. మోడీ-షా ద్వయం కలిసి నడిపిస్తున్న ఈ ‘తక్కువ వాహనాల’ ప్రయాణం, దేశాన్ని ‘ఎక్కువ అభివృద్ధి’ వైపు తీసుకెళ్లాలని కోరుకుందాం!