15 ఏళ్లుగా వివాదం.. చిన్న‌నాటి స్నేహితుడి స‌మ‌స్య‌కు ప్ర‌ధాని మోదీ ప‌రిష్కారం!

ప్రధాని నరేంద్ర మోడీ తన చిన్ననాటి స్నేహితుడికి అండగా నిలిచిన ఉదంతం ప్రస్తుతం దేశవ్యాప్తంగా చర్చనీయాంశమైంది. గుజరాత్‌లోని విద్వాన్ నగర్ బి.ఎన్. స్కూల్‌లో మోడీతో కలిసి చదువుకున్న అస్గర్ అలీ వోరా(81), భాజపా ఎమ్మెల్యే నరేంద్ర మెహతాకు చెందిన నిర్మాణ సంస్థ తన భూమిని ఆక్రమించిందని ఆరోపించారు. ఈ భూ వివాదంపై సుమారు 15 ఏళ్లుగా ప‌లుమార్లు ప్రభుత్వ కార్యాలయాల చుట్టూ తిరిగిన ఆయన ఫ‌లితం రాక‌పోవ‌డంతో సెప్టెంబర్ 8న ప్రధాని మోడీని నేరుగా కలిసి న్యాయం చేయాల్సిందిగా కోరారు.

ఈ భేటీ తర్వాత ప్రభుత్వ యంత్రాంగం వేగంగా స్పందించింది. ముంబైలోని మంత్రాలయంలో సీఎం ప్రధాన కార్యదర్శి శ్రీకర్ పర్దేశి ఆధ్వర్యంలో ఉన్నత స్థాయి సమావేశం జరిగింది. ఈ భేటీలో అస్గర్ అలీ వోరా, ఎమ్మెల్యే నరేంద్ర మెహతాతో పాటు స్థానిక మున్సిపల్ కమిషనర్ రాధా వినోద్ శర్మ కూడా పాల్గొన్నారు. ప్రధాని జోక్యంతో అధికారులు రంగంలోకి దిగడంతో ఈ వివాదానికి అనూహ్యంగా తెరపడింది.

ఈ సమావేశంలో ఎమ్మెల్యే నరేంద్ర మెహతా కీలక ప్రకటన చేశారు. తాను వివాదాస్పద భూమి క‌బ్జాను వదులుకుంటున్నట్లు.. ఆ భూమిపై తనకు ఇచ్చిన నిర్మాణ అనుమతులను (కన్‌స్ట్రక్షన్ పర్మిషన్) సరెండర్ చేస్తున్నట్లు టౌన్ ప్లానింగ్ శాఖకు రాతపూర్వకంగా తెలిపారు. అంతేకాకుండా తాను ఇంతకుముందు అస్గర్ అలీ వోరాపై పెట్టిన పోలీసు కేసును కూడా ఉపసంహరించుకుంటున్నట్లు ప్రకటించి.. ఇరువర్గాల మధ్య సయోధ్య‌ కుదిరిందని స్పష్టం చేశారు.

ఇలాంటి ఉదంతాలు రాజకీయ నాయకులు తమ హోదాను-పరపతిని వ్యక్తిగత మిత్రుల సమస్యల పరిష్కారం కోసం సానుకూలంగా ఉపయోగించుకునే సందర్భాలను గుర్తు చేస్తాయి. ఇదే రీతిలో ఆంధ్రప్రదేశ్ రాజకీయాల్లో కూడా ముఖ్యమంత్రి నారా చంద్రబాబు నాయుడు , ఉప ముఖ్యమంత్రి పవన్ కళ్యాణ్ తమ సన్నిహితులు, తోటి మిత్రులు లేదా కష్టాల్లో ఉన్న సాధారణ వ్యక్తుల విజ్ఞప్తులపై స్పందించి పలు సందర్భాల్లో తగిన సహాయ సహకారాలు అందించిన ఉదాహరణలు ఉన్నాయి. ప్రజా జీవితంలో ఉన్న నేతలు తమ చిన్ననాటి మిత్రులు లేదా ఆప్తుల సమస్యలను చట్టపరమైన మార్గాల్లో పరిష్కరించడానికి చొరవ చూపడం నాయకుల మానవత్వానికి నిదర్శనంగా నిలుస్తుంది.

ప్రధాని మోడీ తన చిన్ననాటి స్నేహితుడికి ఎలాంటి రాజకీయ ఒత్తిళ్లకు తావులేకుండా కేవలం న్యాయం జరిగేలా చూడటంలో కీలక పాత్ర పోషించగా ఈ ఉదంతం దేశవ్యాప్తంగా రాజకీయ వర్గాల్లో హాట్ టాపిక్ అయింది. స్నేహం విలువను చాటుతూనే.. ప్రజాస్వామ్య వ్యవస్థలో బాధ్యతాయుతంగా వివాదాలను పరిష్కరించుకోవడానికి ఈ ఉదంతం ఒక చక్కటి ఉదాహరణగా నిలిచింది.