సోషల్ మీడియా ర్యాంకింగ్స్ : మోడీ ప్లేస్ ఎంతో తెలుసా? కేంద్రమంత్రుల పరిస్థితేంటి?

ప్రస్తుత ఆధునిక డిజిటల్ యుగంలో నాయకత్వం అంటే కేవలం సభలు, సమావేశాలకే పరిమితం కాకుండా.. ప్రజలకు ఎంత చేరువగా ఉన్నారనేది అత్యంత కీలకంగా మారింది. ప్రభుత్వ పాలన, సంక్షేమ పథకాలు, కీలక నిర్ణయాలను ప్రతి ఒక్కరికీ వేగంగా చేరవేయడంలో సోషల్ మీడియా ఒక అత్యంత శక్తివంతమైన సాధనంగా అవతరించింది. ఇటీవల జరిగిన కేంద్ర కేబినెట్ సమావేశంలో ప్రధాని నరేంద్ర మోదీ, కేంద్ర మంత్రుల డిజిటల్ యాక్టివిటీపై ప్రత్యేకంగా సమీక్ష నిర్వహించి వారి పనితీరుకు ర్యాంకింగ్స్ కేటాయించిన వైనం నేటి నవతరం పాలనకు సరికొత్త దిశానిర్దేశం చేస్తోంది.

కేంద్ర మంత్రుల సోషల్ మీడియా పనితీరుపై ప్రధాని నరేంద్ర మోదీ ప్రత్యేకంగా దృష్టి సారించినట్లు తెలుస్తోంది. బుధవారం జరిగిన కేంద్ర కేబినెట్ సమావేశంలో మంత్రుల డిజిటల్ యాక్టివిటీపై సమీక్ష నిర్వహించినట్లు సమాచారం. ఇందులో సోషల్ మీడియా వేదికల్లో చురుగ్గా ఉంటున్న మంత్రులకు ర్యాంకింగ్స్ ఇచ్చినట్లు తెలుస్తోంది. ఈ జాబితాలో ప్రధాని నరేంద్ర మోదీ అగ్రస్థానంలో నిలిచినట్లు సమాచారం.

ఈ ర్యాంకింగ్స్‌ను కేవలం మంత్రుల ఫాలోవర్ల సంఖ్య ఆధారంగా కాకుండా.. సోషల్ మీడియాలో వారు ఎంత చురుగ్గా ఉంటున్నారు, ప్రజలతో ఎంతమేరకు నేరుగా కనెక్ట్ అవుతున్నారు, పోస్టులకు ఎలాంటి స్పందన వస్తోంది వంటి అంశాలను పరిగణనలోకి తీసుకుని రూపొందించినట్లు తెలుస్తోంది. ముఖ్యంగా ఎక్స్, ఫేస్‌బుక్, ఇన్‌స్టాగ్రామ్‌ వంటి ప్రధాన సోషల్ మీడియా ప్లాట్‌ఫామ్‌లలో మే 1 నుంచి ఆగస్టు 15 వరకు మంత్రుల కార్యకలాపాలను విశ్లేషించినట్లు సమాచారం.

మంత్రులు చేసిన పోస్టులు, వాటికి వచ్చిన లైక్స్, కామెంట్లు, షేర్లు, మొత్తం ఇంటరాక్షన్‌, ప్రజలతో ఉన్న ఎంగేజ్‌మెంట్‌ వంటి అంశాలను పరిగణనలోకి తీసుకున్నట్లు తెలుస్తోంది. ఈ సమగ్ర ప్రమాణాల ఆధారంగా రూపొందించిన జాబితాలో మోదీ మొదటి స్థానాన్ని దక్కించుకున్నట్లు సమాచారం. ముఖ్యంగా యువతను ఆకట్టుకునేలా మోదీ సోషల్ మీడియాను వినియోగిస్తున్న తీరు ఆయనకు మంచి ఎంగేజ్‌మెంట్‌ తీసుకొస్తున్నట్లు పేర్కొంటున్నారు.

ఇన్‌స్టాగ్రామ్‌పై మోదీ ప్రత్యేక దృష్టి

యువతతో కనెక్ట్ కావడానికి ఇన్‌స్టాగ్రామ్‌ కీలక వేదికగా మారిందని ప్రధాని మోదీ మంత్రులకు సూచించినట్లు తెలుస్తోంది. ప్రభుత్వ కార్యక్రమాలు, సంక్షేమ పథకాలు, కీలక నిర్ణయాలను ప్రజలకు చేరవేయడంలో సోషల్ మీడియా పాత్ర రోజురోజుకూ పెరుగుతోందని ఆయన పేర్కొన్నట్లు సమాచారం.

కేవలం అధికారిక ప్రకటనలు, ప్రభుత్వ కార్యక్రమాలకు సంబంధించిన పోస్టులకే పరిమితం కాకుండా.. ప్రజలను ఆకట్టుకునేలా సృజనాత్మక కంటెంట్‌ను రూపొందించాలని మంత్రులకు సూచించినట్లు తెలుస్తోంది. ముఖ్యంగా యువతను లక్ష్యంగా చేసుకుని ఇన్‌స్టాగ్రామ్‌లో మరింత యాక్టివ్‌గా ఉండాలని దిశానిర్దేశం చేసినట్లు సమాచారం.

ప్రజలతో నేరుగా సంభాషణకు ప్రాధాన్యం

సోషల్ మీడియాను వన్‌వే కమ్యూనికేషన్‌గా కాకుండా.. ప్రజలతో నిరంతర సంభాషణకు వేదికగా ఉపయోగించుకోవాలని మోదీ సూచించినట్లు తెలుస్తోంది. ప్రజల ప్రశ్నలు, అభిప్రాయాలు, స్పందనలకు అనుగుణంగా మంత్రులు తమ డిజిటల్ ప్రొఫైళ్లను మరింత ఇంటరాక్టివ్‌గా మార్చుకోవాల్సిన అవసరం ఉందని ఆయన స్పష్టం చేసినట్లు సమాచారం.

ఇటీవల ఢిల్లీలో జరిగిన నిరసనల సమయంలో మోదీ ఇన్‌స్టాగ్రామ్‌లో చేసిన కొన్ని పోస్టులు, వీడియోలు విస్తృతంగా వైరల్ కావడం కూడా సోషల్ మీడియాపై ఆయన దృష్టికి ఉదాహరణగా నిలిచింది. ఈ నేపథ్యంలో మంత్రుల డిజిటల్ పనితీరును కూడా క్రమం తప్పకుండా సమీక్షించే అవకాశం ఉందని తెలుస్తోంది.

ప్రభుత్వ విధానాలు, సంక్షేమ కార్యక్రమాలు, కీలక నిర్ణయాలను వేగంగా ప్రజల్లోకి తీసుకెళ్లేందుకు డిజిటల్ మీడియాను మరింత సమర్థంగా ఉపయోగించుకోవాలని మోదీ మంత్రులకు సూచించినట్లు సమాచారం. దీంతో ఇకపై కేంద్ర మంత్రుల సోషల్ మీడియా యాక్టివిటీ మరింత పెరిగే అవకాశం కనిపిస్తోంది.