పెళ్లైన 4 రోజులకే మిస్ యూనివర్స్ మృతి.. వెంటాడిన జింక

రష్యా తరఫున మిస్ యూనివర్స్ 2017లో ప్రాతినిధ్యం వహించిన క్సెనియా అలెగ్జాండ్రోవా కేవలం 30 ఏళ్ల వయస్సులో ఘోర రోడ్డు ప్రమాదంలో మరణించడం తీవ్ర విషాదాన్ని కలిగించింది. ఒక మోడల్‌గా, టీవీ హోస్ట్‌గా, సైకాలజిస్ట్‌గా, బహుముఖ ప్రజ్ఞాశాలిగా ఆమె చేసిన ప్రయాణం ఎంతో మందికి స్ఫూర్తినిచ్చింది.

-విషాదకరమైన ప్రమాదం

జూలై 5న రష్యాలోని ట్వేర్ ఓబ్లాస్ట్ ప్రాంతంలో క్సెనియా తన భర్త ఇల్యా తో కలిసి కారులో ప్రయాణిస్తున్నప్పుడు ఈ దుర్ఘటన జరిగింది. వారు ప్రయాణిస్తున్న పోర్షే పనమెరా కారు విండ్‌షీల్డ్‌పైకి ఒక భారీ ఎల్క్ (పెద్ద జింక జాతి) ఒక్కసారిగా దూసుకొచ్చి ఢీకొట్టింది. ఈ ఘటనలో క్సెనియాకు తీవ్రమైన మెదడు గాయాలు అయ్యాయి. అప్పటినుండి కోమాలో ఉన్న ఆమె, ఆగస్టు 15న తుది శ్వాస విడిచారు.

బహుముఖ ప్రజ్ఞాశాలి క్సెనియా

క్సెనియా కేవలం మోడల్ మాత్రమే కాదు, ఆమె గొప్ప విద్యావంతురాలు కూడా. వివిధ రంగాల్లో ఆమె సాధించిన విజయాలు ఆమె అద్భుతమైన వ్యక్తిత్వానికి నిదర్శనం.19 ఏళ్ల వయస్సులోనే మోడలింగ్ రంగంలోకి అడుగుపెట్టి, 2017లో మిస్ రష్యాలో ఫస్ట్ రన్నరప్‌గా నిలిచారు. అదే ఏడాది మిస్ యూనివర్స్ పోటీలో రష్యాకు ప్రాతినిధ్యం వహించి అందరి దృష్టిని ఆకర్షించారు. ఫైనాన్స్, సినిమా-టెలివిజన్, సైకాలజీ వంటి విభాగాల్లో ఆమె ఉన్నత విద్యను అభ్యసించారు. 2022లో సైకాలజీ డిగ్రీ పూర్తి చేసి సైకాలజిస్ట్‌గా కూడా సేవలందించారు.టెలివిజన్ హోస్ట్‌గా కూడా ఆమెకు మంచి గుర్తింపు ఉంది. ఆమె వ్యక్తిత్వం, ఆత్మవిశ్వాసం ఎందరినో ప్రభావితం చేశాయి.

ఈ విషాదకరమైన మరణం పట్ల మిస్ యూనివర్స్ సంస్థ, మోడస్ వివెండిస్ ఏజెన్సీతో పాటు ఆమె అభిమానులు తీవ్ర దిగ్భ్రాంతి వ్యక్తం చేశారు. “ఆమె అందం, వినయం, ఆత్మవిశ్వాసం ఎప్పటికీ మర్చిపోలేనివి” అని మిస్ యూనివర్స్ సంస్థ పేర్కొంది. అలాగే, మోడలింగ్ ఏజెన్సీ ఆమెను “అందానికి, దయకు, బలానికి ప్రతీక”గా అభివర్ణించింది.

నాలుగు నెలల క్రితమే వివాహం చేసుకుని కొత్త జీవితాన్ని ప్రారంభించిన క్సెనియా, అతి చిన్న వయసులోనే ఈ లోకాన్ని వీడటం అందరినీ కలచివేసింది. క్సెనియా జ్ఞాపకాలు ఎప్పటికీ మన హృదయాల్లో నిలిచి ఉంటాయి.