పని ఒత్తిడి.. ఆవేశం కట్టలు తెంచుకుంటోంది.. ప్రాణాలు తీస్తోంది

పని వాతావరణంలో ఒత్తిడి ఈ రోజుల్లో ఒక తీవ్రమైన సమస్యగా మారుతోంది. ఇది కేవలం ఉద్యోగుల పనితీరుపై మాత్రమే కాకుండా వారి మానసిక ఆరోగ్యం, సమాజంపై కూడా తీవ్ర ప్రభావం చూపుతోంది. ఈ మధ్య అమెరికాలో జరిగిన ఒక సంఘటన దీనికి తాజా ఉదాహరణ. యునైటెడ్ హెల్త్‌కేర్ సీఈఓ బ్రయాన్ థాంప్సన్‌ను లిగి మాంజియోన్ అనే యువకుడు కాల్చి చంపిన ఘటన, యువతలో పెరుగుతున్న మానసిక అలసట, ఆవేశపూరిత ఆలోచనలను ప్రపంచానికి మరోసారి చాటి చెప్పింది. ఈ సంఘటన సాధారణ నేరంలా కాకుండా, యువతలో ఉన్న అసంతృప్తిని, ఆగ్రహాన్ని వెలికితీసింది.

-యువతలో పెరుగుతున్న మానసిక అలసట

ఆధునిక ఉద్యోగ రంగం అనూహ్యమైన మార్పులకు గురవుతోంది. అధిక పనిభారం, తక్కువ జీతాలు, ఉన్నతాధికారుల దురాశ, అలాగే గౌరవం, గుర్తింపు లేకపోవడం వంటి అంశాలు యువ ఉద్యోగులను తీవ్రమైన మానసిక ఒత్తిడికి గురిచేస్తున్నాయి. ఉద్యోగులు తమ శ్రమకు తగిన ఫలితం దక్కడం లేదని, తమ కష్టానికి సరైన గుర్తింపు లేదని భావిస్తున్నారు. ఈ అసంతృప్తి క్రమంగా అలసటగా మారి, కొన్నిసార్లు పట్టరాని కోపం, ఆవేశంగా బయటపడుతోంది. దీనితో అన్యాయం జరుగుతోందనే భావనలో చిక్కుకున్న యువత, హింసతోనే సమస్యలకు పరిష్కారం లభిస్తుందనే తప్పుడు నమ్మకానికి వస్తోంది.

- మానసిక నిపుణుల సిద్ధాంతాలు

మనోవిజ్ఞాన నిపుణులు ఈ పరిస్థితిని మూడు ప్రధాన కోణాల్లో విశ్లేషించారు. క్కువ పని, సరైన విశ్రాంతి లేకపోవడం వల్ల ఉద్యోగుల్లో ప్రతికూల ఆలోచనలు, మానసిక అలసట పెరుగుతాయి. ఇది దీర్ఘకాలికంగా వారి ఆరోగ్యంపై, ఆలోచనలపై ప్రభావం చూపుతుంది. తాము చేసే పనిలో తృప్తి లేనప్పుడు, కేవలం డబ్బు కోసం మాత్రమే పని చేస్తున్నప్పుడు విసుగు, అలసట ఎక్కువవుతాయి. దీనివల్ల ఉద్యోగులకు తమ పనిపట్ల ఆసక్తి తగ్గుతుంది. ఈ సిద్ధాంతం ప్రకారం, ఉద్యోగులు ఎంత కష్టపడ్డా తమకు తగిన ప్రాధాన్యం, గుర్తింపు లభించకపోతే, అది వారిలో ఆవేశాన్ని పెంచుతుంది. ఈ ఆవేశం కొన్నిసార్లు హింసాత్మక ఆలోచనలకు దారితీయవచ్చు.

- సంస్థలు చేపట్టాల్సిన చర్యలు

పని వాతావరణంలో ఒత్తిడి, దానివల్ల వచ్చే మానసిక సమస్యలను నివారించడానికి సంస్థలు కొన్ని మార్పులు చేపట్టాలి. సంస్థలు తమ ఉద్యోగుల కృషికి తగిన గుర్తింపు, పురోగతిలో పారదర్శక విధానాలను పాటించాలి. ఇది ఉద్యోగులలో సంస్థ పట్ల విశ్వాసాన్ని, అంకితభావాన్ని పెంచుతుంది. సంస్థలు తమ ఉద్యోగుల మానసిక ఆరోగ్యం కోసం ప్రత్యేక శిక్షణలు, కౌన్సెలింగ్ సెషన్స్ నిర్వహించాలి. సమస్యలు ఉన్న ఉద్యోగులకు మానసిక నిపుణుల సహాయం అందేలా చూడాలి. మేనేజర్లు, ఉన్నతాధికారులు ఉద్యోగుల ఆవేదనను గుర్తించి, వారి సమస్యలను పరిష్కరించడానికి తగిన చర్యలు చేపట్టాలి. గౌరవం, న్యాయమైన నిర్ణయాలు ఉద్యోగుల్లో ధైర్యాన్ని, ఆత్మవిశ్వాసాన్ని పెంచుతాయి.

- సమాజంపై ప్రభావం

ఉద్యోగులు అనుభవించే మానసిక ఒత్తిడి కేవలం ఒక వ్యక్తికి సంబంధించిన సమస్య కాదు, అది క్రమంగా మొత్తం సమాజాన్ని ప్రభావితం చేస్తుంది. యువతలో పెరుగుతున్న హింసాత్మక ఆలోచనలు, అలసట మొత్తం సమాజంపై ప్రతికూల ప్రభావం చూపుతున్నాయి. ప్రస్తుతం ఈ సంఘటనలు తక్కువగా ఉన్నప్పటికీ, ఈ ధోరణి భవిష్యత్తులో తీవ్రమైన సమస్యలకు దారితీయవచ్చని నిపుణులు హెచ్చరిస్తున్నారు. కాబట్టి పని వాతావరణంలో సమతౌల్యం, గౌరవం, గుర్తింపు తప్పనిసరి. ఇది ఉద్యోగుల మానసిక ఆరోగ్యానికి, చివరికి ఆరోగ్యకరమైన సమాజ నిర్మాణానికి తోడ్పడుతుంది.