వివాహానికి దూరంగా ఉన్నారా.. అయితే క్యాన్సర్ వస్తుంది జాగ్రత్త..

వివాహం అనేది కేవలం సామాజిక బంధం మాత్రమే కాదు.., అది ఆరోగ్యానికి ఒక రక్షణ కవచంలా కూడా పనిచేస్తుందని తాజా పరిశోధనలు చెబుతున్నాయి. ‘క్యాన్సర్ రీసెర్చ్ కమ్యూనికేషన్స్’ జర్నల్‌లో ప్రచురితమైన ఈ అధ్యయనం, ఒంటరిగా ఉండడం కంటే భాగస్వామితో కలిసి ఉండడం క్యాన్సర్ ముప్పును ఎలా తగ్గిస్తుందో గణాంకాలతో సహా వివరించింది. మనశ్శాంతి, సామాజిక మద్దతు మనిషిని దీర్ఘకాలిక వ్యాధుల నుంచి ఎలా కాపాడతాయో చెప్పడానికి సర్వే ఒక నిదర్శనం.

పెళ్లి చేసుకుంటే క్యాన్సర్ పరార్..

జీవితంలో ఒక తోడు ఉంటే ఆ ధైర్యమే వేరు.. అది కేవలం మానసిక బలాన్నే కాదు, శారీరక ఆరోగ్యాన్ని కూడా ఇస్తుందని శాస్త్రవేత్తలు చెబుతున్నారు. యూనివర్సిటీ ఆఫ్ మయామికి చెందిన సిల్వెస్టర్ కాంప్రహెన్సివ్ క్యాన్సర్ సెంటర్ పరిశోధకులు సుమారు 40 లక్షల మందిపై జరిపిన ఈ భారీ అధ్యయనంలో విస్తుపోయే నిజాలు వెలుగులోకి వచ్చాయి. పెళ్లి చేసుకోని వారిలో క్యాన్సర్ వచ్చే అవకాశాలు ఎక్కువగా ఉన్నాయని, ముఖ్యంగా పురుషుల కంటే మహిళల్లో ఈ ముప్పు మరింత ఎక్కువగా ఉందని తేలింది. అసలు వివాహానికి, క్యాన్సర్‌కు ఉన్న లింక్ ఏంటి..

పెళ్లికాని ప్రసాదులకు 68 శాతం

ఈ పరిశోధన ప్రకారం.., పెళ్లి చేసుకోని పురుషులలో వివాహితులతో పోలిస్తే క్యాన్సర్ వచ్చే ముప్పు 68 శాతం ఎక్కువగా ఉంది. పురుషులు సాధారణంగా ఆరోగ్య విషయాల్లో నిర్లక్ష్యంగా ఉంటారని, వివాహం తర్వాత భాగస్వామి ఒత్తిడి వల్ల లేదా కుటుంబ బాధ్యత వల్ల క్రమం తప్పకుండా చెకప్స్ చేయించుకోవడం, ఆరోగ్యకరమైన ఆహారం తీసుకోవడం వంటివి చేస్తారని నిపుణులు విశ్లేషిస్తున్నారు. ఈ క్రమశిక్షణే వారిని క్యాన్సర్ వంటి మహమ్మారి నుంచి కాపాడుతోంది.

మహిళల్లో 83 శాతం అధిక ప్రమాదం

ఇక మహిళల విషయానికి వస్తే, పెళ్లి చేసుకోని యువతులలో ఈ ప్రమాదం ఏకంగా 83 శాతం ఎక్కువగా ఉన్నట్లు సర్వే వెల్లడించింది. ముఖ్యంగా గర్భాశయ క్యాన్సర్ వంటి వాటి విషయంలో వివాహిత మహిళల్లో ముప్పు తక్కువగా ఉంది. వివాహం వల్ల లభించే సామాజిక భద్రత, మానసిక ప్రశాంతత మహిళల్లో రోగనిరోధక శక్తిని పెంచుతాయని, తద్వారా క్యాన్సర్ కారక కణాలను శరీరం సమర్థంగా ఎదుర్కొంటుందని పరిశోధకులు భావిస్తున్నారు.

సామాజిక మద్దతు

కేవలం వివాహం మాత్రమే కాదు.., ఒక బలమైన సామాజిక సహాయక వ్యవస్థ ఉండడం ఆరోగ్యానికి మేలు చేస్తుందని ఈ అధ్యయనం స్పష్టం చేసింది. ఒంటరితనం వల్ల కలిగే ఒత్తిడి, ఆందోళన శరీరంలో మంటను పెంచుతాయి, ఇది క్యాన్సర్‌కు దారితీస్తుంది. తోడుగా ఎవరైనా ఉన్నప్పుడు, వ్యాధిని ముందే గుర్తించే అవకాశం ఉంటుంది. అలాగే వ్యాధి వచ్చినా చికిత్సకు స్పందించే తీరులో కూడా వివాహితులు మెరుగ్గా ఉన్నట్లు గుర్తించారు.

జీవనశైలిలో మార్పులు

పెళ్లి చేసుకున్న వారిలో ధూమపానం, మద్యం వంటి అలవాట్లు తక్కువగా ఉండడం లేదా వాటిని నియంత్రించే వారు ఉండడం కూడా క్యాన్సర్ ముప్పు తగ్గడానికి కారణం. క్రమబద్ధమైన నిద్ర, పోషకాహారం, శారీరక శ్రమ వంటివి వివాహ బంధంలో ఉన్నవారిలో ఎక్కువగా కనిపిస్తాయి. అయితే, ఇక్కడ వివాహం అనేది ఒక సంకేతం మాత్రమేనని, అసలైన రక్షణ మనిషికి లభించే సామాజిక సంబంధాలు, ప్రేమ నుండే లభిస్తుందని శాస్త్రవేత్తలు నొక్కి చెబుతున్నారు.

ఈ అధ్యయనం పెళ్లి చేసుకోని వారిని భయపెట్టడానికి కాదు, ఒంటరితనం ఆరోగ్యానికి ఎంత హానికరమో తెలియజేయడానికి ఉద్దేశించింది. జీవితంలో మంచి స్నేహితులు, ఆత్మీయులు లేదా జీవిత భాగస్వామి తోడు ఉండడం వల్ల కలిగే సానుకూల ప్రభావం మనిషి ఆయుష్షు పెంచుతుంది. ఆరోగ్యకరమైన సమాజం కోసం కేవలం మందులే కాదు, మనుషుల మధ్య ఉండే అనుబంధాలు ఎంతో అవసరమని ఈ పరిశోధన మరోసారి గుర్తు చేసింది.