‘నోబెల్’ వరించడంపై మరియా రియాక్షన్ ఇదీ

వెనిజులా ప్రజాస్వామ్య పోరాట నాయకురాలు మరియా కొరినా మచాడోకు ప్రతిష్ఠాత్మక 2025 నోబెల్‌ శాంతి బహుమతి లభించింది. ఈ శుభవార్త వినగానే ఆమె భావోద్వేగానికి లోనయ్యారు. ప్రకటనకు కొన్ని నిమిషాల ముందు నోబెల్ కమిటీ సభ్యుడు ఆమెకు ఫోన్ చేసి ఈ విషయం చెప్పగా, ఆమె సంతోషంతో కన్నీళ్లు పెట్టుకున్నారు.

* శుభవార్త విన్న క్షణం: “ఓ మై గాడ్.. నాకు మాటలు రావడం లేదు!”

నోబెల్‌ ప్రైజ్‌ కమిటీ విడుదల చేసిన వీడియోలో బహుమతి గురించి తెలుసుకున్న వెంటనే మరియా కొరినా మచాడో ఆశ్చర్యంతో, ఆనందంతో ఉప్పొంగిపోయిన దృశ్యాలు కనిపించాయి. కమిటీ సభ్యుడు ఫోన్‌లో ఈ శుభవార్త చెప్పగానే, ఆమె “ఓ మై గాడ్... నాకు మాటలు రావడం లేదు!” అంటూ భావోద్వేగానికి లోనయ్యారు. ఆమె కళ్ళలో ఆనందబాష్పాలు కనిపించాయి. ప్రజాస్వామ్యం కోసం ఆమె చేసిన నిరంతర పోరాటానికి దక్కిన ఈ అంతర్జాతీయ గుర్తింపు ఆమెను మాటలు రానివ్వలేదు.

ఆమె వినమ్రత: “ఈ ఘనత నా దేశ ప్రజలందరిదీ”

నోబెల్ శాంతి బహుమతి ప్రకటించిన తర్వాత, మచాడో చూపిన వినమ్రత అందరినీ ఆకట్టుకుంది. "వెనిజులా ప్రజాస్వామ్య ఉద్యమంలో నేను ఓ భాగం మాత్రమే. ఈ గొప్ప బహుమతి నా దేశ ప్రజలందరికీ చెందింది," అని ఆమె వ్యాఖ్యానించారు."దీనికి నేనొక్కదాన్నే అర్హురాలిని కాదు," అంటూ తన పోరాటాన్ని ప్రజలందరి ఉద్యమంగా ఆమె కొనియాడారు.

*వెనిజులాలో ప్రజాస్వామ్యానికి ప్రతీక

వెనిజులాలో ప్రజాస్వామ్య హక్కుల కోసం, నియంతృత్వం నుండి శాంతియుత పరివర్తన కోసం మరియా కొరినా మచాడో చేసిన నిస్వార్థ కృషికి గాను నోబెల్ కమిటీ ఆమెను ఈ బహుమతికి ఎంపిక చేసింది.ఎన్నో ఏళ్లుగా ప్రభుత్వ నిర్బంధాలు, నిషేధాలు ఎదుర్కొన్నప్పటికీ, మచాడో వెనుతిరగలేదు. దేశంలోనే ఉండి ఆమె తన పోరాటాన్ని కొనసాగించారు.

నోబెల్ కమిటీ ఆమెను 'చీకటి పెరుగుతున్న సమయంలోనూ ప్రజాస్వామ్యం జ్వాలను వెలిగిస్తున్న ధైర్యవంతురాలు, అంకితభావం గల శాంతి యోధురాలు'గా అభివర్ణించింది.

ఆమె గెలుపు వెనిజులాలో ప్రజాస్వామ్యానికి ఒక గొప్ప విజయంగా, ఆ దేశ ప్రజలలో అపారమైన ఆనందాన్ని నింపింది. సామాజిక మాధ్యమాల్లో ఆమెకు శుభాకాంక్షలు వెల్లువెత్తుతున్నాయి.