సొంత పార్టీలోనే పేర్ని నానికి నిరసన సెగ..!

మచిలీపట్నం రాజకీయాల్లో అనూహ్య పరిణామాలు వేగంగా మారుతున్నాయి. ఒకనాడు ఉమ్మడి కృష్ణా జిల్లా రాజకీయాలను శాసించిన మాజీ మంత్రి పేర్ని నాని ప్రస్తుతం సొంత పార్టీ కేడర్‌ నుంచే తీవ్ర వ్యతిరేకతను ఎదుర్కొంటున్నారు. ఇటీవల జరిగిన నియోజకవర్గ కార్యకర్తల సమావేశం ఇందుకు అద్దం పట్టింది. అధీనంలో ఉండే నేతలే నేరుగా ప్రశ్నల వర్షం కురిపించడంతో, ఆయన తీవ్ర అసహనానికి గురయ్యారు. ఈ పరిణామాలు స్థానిక రాజకీయ వర్గాల్లో హాట్ టాపిక్‌గా మారాయి.

గత వైకాపా ప్రభుత్వ హయాంలో పార్టీ కోసం ప్రాణమిచ్చి పనిచేసిన తమను పట్టించుకోలేదనే వేదన క్షేత్రస్థాయి కార్యకర్తల్లో బలంగా గూడుకట్టుకుంది. ఎన్నికల ఫలితాల తర్వాత కూడా పార్టీ క్యాడర్‌ను కూడగట్టడంలో నాయకత్వం విఫలమైందనే విమర్శలు వెల్లువెత్తుతున్నాయి. ముఖ్యంగా సొంత సామాజిక వర్గానికి తగిన ప్రాధాన్యం దక్కలేదంటూ సమావేశంలో కొందరు నేతలు నిలదీయడం పేర్ని నానిని ఉక్కిరిబిక్కిరి చేసింది. ఈ ఊహించని పరిణామానికి సమాధానం చెప్పలేక ఆయన భావోద్వేగానికి లోనయ్యారు. "ఎమ్మెల్యేలకు కులాలు ఏంట్రా?" అంటూ ఆయన చేసిన వ్యాఖ్యలు ఇప్పుడు సొంత పార్టీలోనే తీవ్ర చర్చకు దారితీశాయి. ఒకప్పుడు సామాజిక సమీకరణాల ద్వారానే ఎదిగిన నేత, ఇప్పుడు ఇలా మాట్లాడటం ఆయన నిరాశకు నిదర్శనమని ప్రత్యర్థులు విశ్లేషిస్తున్నారు.

ఈ అనూహ్య నిరసనల నుంచి, కేడర్ సంధించిన ప్రశ్నల నుంచి దృష్టి మళ్లించేందుకే ఆయన ప్రత్యర్థులపై విమర్శల అస్త్రాలు సంధించినట్లు రాజకీయ విశ్లేషకులు భావిస్తున్నారు. ప్రస్తుత మంత్రి కొల్లు రవీంద్ర దూకుడుగా ముందుకు వెళ్తుండటం, టీడీపీ కూటమి స్థానికంగా బలపడుతుండటంతో వైకాపాలో ఆందోళన పెరిగింది. ఈ తరుణంలో పట్టు నిలుపుకోవడం పేర్ని నానికి కత్తి మీద సాములా మారింది. కేడర్ నుంచి వస్తున్న ప్రశ్నలు, కుమారుడు పేర్ని కిట్టు రాజకీయ భవిష్యత్తుపై నెలకొన్న అనిశ్చితి వెరసి మచిలీపట్నం వైకాపాలో భవిష్యత్తు సవాళ్లను స్పష్టంగా తెచ్చిపెడుతున్నాయి.