మార్కులు కాదు.. మీ స్కిల్స్ మీ భవిష్యత్తును నిర్మిస్తాయి... ఇదీ సక్సెస్ అంటే..

“ఎంత జీపీఏ వచ్చింది?”.. కాలేజీ రోజుల్లో విద్యార్థులను ఎక్కువగా వెంటాడే ప్రశ్న ఇది. కానీ ఉద్యోగ ప్రపంచంలో మాత్రం ప్రశ్న కొంచెం మారుతుంది.. “నీకు ఏం తెలుసు? ఏం చేయగలవు?” అనేదే అసలు కొలమానం. దీనికి నిదర్శనంగా నిలుస్తోంది ఆదిత్య జమ్వాల్ సక్సెస్ స్టోరీ. తక్కువ జీపీఏ మార్కులు వచ్చినా అధిక వేతనంతో ఉద్యోగం సాధించిన ఆయన కథ ఇప్పుడు సోషల్ మీడియాలో చర్చనీయాంశంగా మారింది.

6.8 జీపీఏకే ఏకంగా ₹32 లక్షల ప్యాకేజీ

నోయిడాలోని జేపీ ఇన్‌స్టిట్యూట్ ఆఫ్ ఇన్ఫర్మేషన్ టెక్నాలజీలో కంప్యూటర్ సైన్స్ ఇంజినీరింగ్ పూర్తి చేసిన ఆదిత్య జమ్వాల్‌కు డిగ్రీలో 6.8 జీపీఏ వచ్చింది. అయితే అదే ఆయన కెరీర్‌కు అడ్డంకిగా మారలేదు. ప్రస్తుతం హైదరాబాద్‌లోని మైక్రోసాఫ్ట్ ఆఫీసులో సాఫ్ట్‌వేర్ ఇంజినీర్‌గా పనిచేస్తూ ఏడాదికి సుమారు ₹32 లక్షల ప్యాకేజీ అందుకుంటున్నట్లు ఆయన వెల్లడించారు.

ఇదే సమయంలో 9.2 జీపీఏతో బీటెక్ పూర్తి చేసిన మరో విద్యార్థి సుమారు ₹6 లక్షల ప్యాకేజీతో ఉద్యోగం చేస్తున్నాడని ఆదిత్య తన సోషల్ మీడియా పోస్టులో పేర్కొన్నారు. ఈ రెండు ఉదాహరణలను పోల్చి చూస్తే.. ఉద్యోగానికి మార్కులు మాత్రమే అంతిమ ప్రమాణం కాదనే విషయం స్పష్టమవుతుందని ఆయన చెప్పుకొచ్చారు.

మార్కుల కంటే స్కిల్స్‌పై ఫోకస్

ఆదిత్య విజయానికి ప్రధాన కారణం జీపీఏ కాదని.. చదువుతున్న సమయంలో తాను పెంచుకున్న టెక్నికల్ స్కిల్స్ అని చెబుతున్నారు. ముఖ్యంగా డేటా స్ట్రక్చర్స్, అల్గారిథమ్స్‌పై గట్టిగా పనిచేశానని తెలిపారు. సుమారు 50 డేటా స్ట్రక్చర్, అల్గారిథమ్ మోడల్స్‌పై దృష్టి పెట్టి ఒక ప్రాజెక్ట్‌ను అభివృద్ధి చేసినట్లు ఆయన పేర్కొన్నారు. అంతేకాదు ఆపరేటింగ్ సిస్టమ్స్, డేటాబేసెస్, కంప్యూటర్ నెట్‌వర్క్స్ వంటి కోర్ కంప్యూటర్ సైన్స్ అంశాలపై అవగాహన పెంచుకున్నారు. కేవలం పుస్తకాల్లోని థియరీతో ఆగిపోకుండా లో-లెవల్ సిస్టమ్ డిజైన్ పై కూడా అధ్యయనం చేసినట్లు తెలిపారు. టెక్నికల్ ఇంటర్వ్యూలను ఎదుర్కొనేందుకు జనరేటివ్ ఏఐ ఫండమెంటల్స్‌ను కూడా నేర్చుకున్నానని వివరించారు.

‘మార్కులు సాధించండి’ కాదు.. ‘విలువ సృష్టించండి’

విద్యార్థులపై ప్రస్తుతం మార్కులు, ర్యాంకులు, జీపీఏ విషయంలో విపరీతమైన ఒత్తిడి ఉంటుంది. ఉన్నత విద్య, స్కాలర్‌షిప్‌లు, క్యాంపస్ ప్లేస్‌మెంట్స్ వంటి సందర్భాల్లో మార్కులకు ప్రాధాన్యం ఉండటం సహజమే. అయితే కెరీర్‌లో ఎక్కువ కాలం నిలదొక్కుకోవడానికి మార్కులతో పాటు ప్రాక్టికల్ నాలెడ్జ్, సమస్యలను పరిష్కరించే సామర్థ్యం, కమ్యూనికేషన్, టెక్నికల్ స్కిల్స్ కూడా కీలకంగా మారుతున్నాయి.

ఆదిత్య కథలో అసలు పాయింట్ కూడా ఇదే. 6.8 జీపీఏ అనేది అతని సామర్థ్యానికి పరిమితి కాలేదు. తనకు వచ్చిన మార్కుల కంటే తాను నేర్చుకున్న విషయాలపై దృష్టి పెట్టడం ద్వారా తన కెరీర్‌లో మంచి అవకాశాన్ని అందుకున్నాడు.

ఒకరి జీతం.. మరొకరి జీతం కాదు

అయితే ఈ ఉదాహరణను చూసి “మార్కులు అవసరం లేదు” అని భావించడం కూడా సరైనది కాదు. విద్యార్థి కెరీర్‌లో జీపీఏకి కొన్ని సందర్భాల్లో ప్రాధాన్యం ఉంటుంది. కానీ జీపీఏ ఒక్కటే కెరీర్‌ను నిర్ణయించదు అనేది ఆదిత్య కథ ఇచ్చే ముఖ్యమైన సందేశం.

ఉద్యోగ సంస్థలు ముఖ్యంగా టెక్నాలజీ రంగంలో అభ్యర్థి సమస్యను ఎలా పరిష్కరిస్తాడు? కోడ్ రాయగలడా? కాన్సెప్ట్స్‌ను ఎంత బాగా అర్థం చేసుకున్నాడు? కొత్త టెక్నాలజీని ఎంత వేగంగా నేర్చుకోగలడు? అనే అంశాలను కూడా పరిశీలిస్తాయి. అందుకే విద్యార్థులకు సరైన ఫార్ములా.. మార్కులను పూర్తిగా పక్కన పెట్టడం కాదు.. మార్కులతో పాటు మార్కెట్‌లో ఉపయోగపడే నైపుణ్యాలను పెంచుకోవడం.

ఆదిత్య జమ్వాల్ ఉదాహరణ చెప్పేది కూడా ఇదే. సర్టిఫికెట్‌లో ఉన్న జీపీఏ మీ గతాన్ని చెబుతుంది.. కానీ మీ స్కిల్స్ మీ భవిష్యత్తును నిర్మిస్తాయి.