ఖమేనీ అంత్యక్రియలకు భారత్ నుంచి వెళ్లేది వీరే.. మోదీ ఎందుకు హాజరు కావట్లేదు?

ఇరాన్ సుప్రీం లీడర్ అలీ ఖమేనీ అంత్యక్రియలకు భారత్ తరఫున ప్రత్యేక ప్రతినిధుల బృందం హాజరుకానుంది. బిహార్ గవర్నర్, రిటైర్డ్ లెఫ్టినెంట్ జనరల్ సయ్యద్ హస్నైన్‌తో పాటు కేంద్ర విదేశాంగ శాఖ సహాయ మంత్రి పబిత్రా మార్గెరిటా భారత ప్రతినిధులుగా ఇరాన్‌కు వెళ్లనున్నట్లు సమాచారం. జూలై 4 నుంచి ప్రారంభమయ్యే అధికారిక రాష్ట్ర అంత్యక్రియల కార్యక్రమంలో వీరు భారతదేశాన్ని ప్రాతినిధ్యం వహించనున్నారు.

అలీ ఖమేనీ మరణం అనంతరం ఇరాన్ ప్రభుత్వం ప్రపంచ దేశాల నేతలకు అధికారిక ఆహ్వానాలు పంపింది. ఈ క్రమంలో భారత ప్రధాని నరేంద్ర మోదీకి కూడా ప్రత్యేక ఆహ్వానం అందినట్లు తెలుస్తోంది. అయితే ఇప్పటికే ఇండోనేషియా, ఆస్ట్రేలియా, న్యూజిలాండ్ దేశాల పర్యటనలు ఖరారై ఉండటంతో ప్రధాని ఈ కార్యక్రమానికి హాజరు కాలేకపోతున్నారని ప్రభుత్వ వర్గాలు పేర్కొంటున్నాయి.

ఇరాన్ రాజకీయ చరిత్రలో అత్యంత ప్రభావశీల నేతలలో ఒకరైన అలీ ఖమేనీ దేశానికి ఎన్నో దశాబ్దాల పాటు మార్గనిర్దేశం చేశారు. ఆయన మరణం ఇరాన్‌తో పాటు మధ్యప్రాచ్య రాజకీయాల్లో కీలక పరిణామాలకు దారితీసింది. ఫిబ్రవరి 28న అమెరికా , ఇజ్రాయెల్ సంయుక్త దాడుల్లో ఖమేనీ మరణించినట్లు అంతర్జాతీయ మీడియా కథనాలు వెలువడ్డాయి. అయితే ఆ సమయంలో ప్రాంతంలో కొనసాగిన యుద్ధ పరిస్థితులు, భద్రతా ఆందోళనల కారణంగా వెంటనే అంత్యక్రియలు నిర్వహించడం సాధ్యపడలేదు.

దీంతో పలుమాసాల తర్వాత ఇప్పుడు అధికారిక రాష్ట్ర అంత్యక్రియలను నిర్వహించేందుకు ఇరాన్ ప్రభుత్వం ఏర్పాట్లు పూర్తి చేసింది. ఈ కార్యక్రమానికి ఆసియా, యూరప్, ఆఫ్రికా దేశాలకు చెందిన పలువురు నేతలు, ఉన్నతాధికారులు హాజరయ్యే అవకాశం ఉందని తెలుస్తోంది.

భారత్ , ఇరాన్ మధ్య చారిత్రాత్మకంగా స్నేహపూర్వక సంబంధాలు కొనసాగుతున్నాయి. ఇంధన రంగం, వాణిజ్యం, వ్యూహాత్మక సహకారం వంటి అంశాల్లో రెండు దేశాలు కీలక భాగస్వాములుగా ఉన్నాయి. ఈ నేపథ్యంలో భారత ప్రభుత్వం ఉన్నత స్థాయి ప్రతినిధులను పంపించడం ద్వారా ఇరాన్ ప్రజలకు, ప్రభుత్వానికి తమ సానుభూతిని తెలియజేయనున్నట్లు విశ్లేషకులు భావిస్తున్నారు.

ఇరాన్‌లో జరగనున్న ఈ రాష్ట్ర అంత్యక్రియలు ప్రపంచ దృష్టిని ఆకర్షిస్తున్నాయి. ఖమేనీ మరణం తర్వాత ప్రాంతీయ రాజకీయ సమీకరణాలు ఎలా మారతాయన్న దానిపై అంతర్జాతీయ వర్గాలు ఆసక్తిగా గమనిస్తున్నాయి.