సొంత బావ ఫోన్ ట్యాపింగ్: కవిత సంచలన వ్యాఖ్యలు..

తెలంగాణ రాజకీయాల్లో ఫోన్ ట్యాపింగ్ వ్యవహారం మరోసారి ప్రకంపనలు సృష్టిస్తోంది. మాజీ ముఖ్యమంత్రి కేసీఆర్ కుమార్తె, తెలంగాణ జాగృతి అధ్యక్షురాలు కల్వకుంట్ల కవిత తాజాగా చేసిన వ్యాఖ్యలు రాష్ట్ర రాజకీయాలపై తీవ్ర ప్రభావాన్ని చూపేలా ఉన్నాయి. తన భర్త అనిల్ కుమార్ ఫోన్‌ను కూడా ట్యాప్ చేశారంటూ ఆమె చేసిన సంచలన వ్యాఖ్యలు బీఆర్ఎస్ అంతర్గత రాజకీయాలపై అనేక ప్రశ్నలను లేవనెత్తుతున్నాయి.

“మా ఆయ‌న అనిల్ ఫోన్‌ను కూడా ట్యాప్ చేశారు. సొంత బావ అని కూడా చూడ‌కుండా రాజకీయాలు చేశారు,” అంటూ కవిత తీవ్ర ఆవేదన వ్యక్తం చేశారు. గతంలో తాము ఎదుర్కొన్న రాజకీయాలు, అవమానాలను ఆమె ఈ సందర్భంగా వెల్లడించారు.

* షాక్‌కు గురయ్యాను: ఫోన్ ట్యాపింగ్ బాధితుల్లో మా కుటుంబం కూడా!

‘జాగృతి జనం బాట’ పేరుతో కరీంనగర్‌ జిల్లాలో ప్రజా యాత్ర నిర్వహిస్తున్న కవిత, కార్మికులు, మహిళలు, యువతతో సమావేశమయ్యారు. అనంతరం మీడియాతో మాట్లాడుతూ, 2023 ఎన్నికల ముందు జరిగిన ఫోన్ ట్యాపింగ్ ఘటనపై స్పందించారు. “ఫోన్ ట్యాపింగ్ కేసు బయటకు వచ్చినప్పుడు మా కుటుంబం కూడా బాధితుల్లో ఒకటని తెలిసి చాలా షాక్‌కి గురయ్యాను. ఇంతవరకు ఆ స్థాయిలో రాజకీయాలు జరిగాయని అనుకోలేదు,” అంటూ ఆమె గత ప్రభుత్వ తీరుపై అసంతృప్తిని వ్యక్తం చేశారు.

* ఆత్మగౌరవాన్ని మించిన అవమానాలు: మౌనం వీడి ప్రజల్లోకి

బీఆర్‌ఎస్‌లో ఉన్న సమయంలో తాను ఎదుర్కొన్న అవమానాలపై కూడా కవిత కీలక వ్యాఖ్యలు చేశారు. న్యాయం కోసం మౌనం వహించినప్పటికీ, కొన్ని అవమానాలు ఆత్మగౌరవాన్ని మించిపోయాయని తెలిపారు. “న్యాయం కోసం మౌనం వహించాను. కానీ ఆత్మగౌరవాన్ని మించిపోయే అవమానాలు ఎదురైనప్పుడు మౌనం సాధ్యం కాదు. అందుకే ప్రజల్లోకి వచ్చాను,” అంటూ ఆమె తన పార్టీని వీడి ప్రజా యాత్రకు రావడానికి గల కారణాన్ని స్పష్టం చేశారు.

* రాజకీయ శూన్యత: కొత్త ప్రత్యామ్నాయం కోసం ఎదురుచూపులు

ప్రస్తుతం తెలంగాణ రాజకీయాల్లో శూన్యత నెలకొన్నదని, ప్రజలు ఒక కొత్త, బలమైన ప్రత్యామ్నాయం కోసం ఎదురుచూస్తున్నారని కవిత అభిప్రాయపడ్డారు. తాను పార్టీని వీడి ప్రజల్లోకి వచ్చిన తర్వాత అనూహ్యమైన మద్దతు లభిస్తోందని వెల్లడించారు. అనేకమంది సీనియర్ నాయకులు తనతో టచ్‌లో ఉన్నారని, వారంతా పార్టీని విడిచి రావడానికి సిద్ధంగా ఉన్నారని పేర్కొన్నారు. “సరైన సమయానికి అందరూ ఒక వేదికపైకి వస్తారు,” అని భవిష్యత్తు కార్యాచరణపై హింట్ ఇచ్చారు. “గతంలో నేను పంజరంలో ఉన్నాను. ఇప్పుడు ఫ్రీబర్డ్‌గా ప్రజల మధ్య ఉన్నాను,” అంటూ తన స్వేచ్ఛాయుత రాజకీయ ప్రయాణాన్ని గురించి వ్యాఖ్యానించారు.

* ఫిబ్రవరిలో కీలక ప్రకటన: పార్టీ స్థాపనపై నిర్ణయం

నిజామాబాద్‌ నుంచి ప్రారంభమైన ‘జాగృతి జనం బాట’ యాత్ర కరీంనగర్‌లో కొనసాగుతోంది. ఈ యాత్ర వచ్చే ఫిబ్రవరి వరకు కొనసాగనుంది. యాత్ర అనంతరం తన భవిష్యత్తు రాజకీయ ప్రణాళికలపై— ముఖ్యంగా పార్టీ స్థాపనపై కీలక ప్రకటన చేస్తానని కవిత స్పష్టం చేశారు.

ప్రస్తుతం ప్రజల నుంచి మిశ్రమ స్పందన వచ్చినప్పటికీ, కవిత ప్రజల ఆత్మీయతతో ఉత్తేజితమవుతున్నారు. ఆమె చేసిన సంచలన వ్యాఖ్యల నేపథ్యంలో తెలంగాణ రాజకీయాల్లో మళ్లీ కవిత పేరు చర్చనీయాంశంగా మారింది.