షట్ డౌన్ లో అమెరికా.. ప్రియురాలితో కాష్ పటేల్ విమాన ప్రయాణాలు.. వివాదంపై క్లారిటీ

అమెరికాలో ఫెడరల్ షట్‌డౌన్ కొనసాగుతున్న కీలక సమయంలో, ఎఫ్‌బీఐ డైరెక్టర్‌, భారతీయ మూలాలున్న కశ్యప్ (కాష్) పటేల్‌ వ్యక్తిగత జీవితం ఇప్పుడు పెద్ద రాజకీయ చర్చకు దారితీసింది. తన ప్రేయసి, అమెరికన్ సింగర్ అలెక్సిస్ విల్కిన్స్ తో కలిసి ఎఫ్‌బీఐకి చెందిన ప్రత్యేక జెట్‌లో ప్రయాణించడంపై విమర్శలు వెల్లువెత్తగా, ఈ ఆరోపణలన్నింటికీ కాష్ పటేల్ స్వయంగా సమాధానం చెప్పారు.

వివాదానికి కారణం: ఎఫ్‌బీఐ జెట్‌లో ప్రయాణం

అక్టోబర్‌ 25న కాష్ పటేల్ (45) తన గర్ల్‌ఫ్రెండ్ అయిన అమెరికన్ సింగర్ అలెక్సిస్ విల్కిన్స్ (26) తో కలిసి పెన్సిల్వేనియాకు వెళ్లారు. అక్కడ జరిగిన ఒక రెజ్లింగ్ ఈవెంట్‌లో అలెక్సిస్ గాన ప్రదర్శన ఇచ్చారు. వారు ప్రయాణించినది ఎఫ్‌బీఐకి చెందిన జెట్ విమానమే కావడం, ఈ ప్రయాణానికి 60 మిలియన్ డాలర్ల ఖర్చు అయ్యిందన్న వార్తలు బయటకు రావడంతో పెద్ద దుమారం చెలరేగింది.

*మాజీ ఏజెంట్ మండిపాటు: "దేశం షట్‌డౌన్‌లో ఉంది"

ఈ ఘటనపై ఎఫ్‌బీఐ మాజీ ఏజెంట్ కైల్ సెరాఫిన్ ఒక పాడ్‌కాస్ట్‌లో తీవ్రంగా స్పందించారు. "దేశం షట్‌డౌన్‌లో ఉంది, ఉద్యోగులకు జీతాలు ఇవ్వలేని పరిస్థితి నెలకొంది. అలాంటి సమయంలో ఎఫ్‌బీఐ డైరెక్టర్‌ సంస్థ నిధులతో ప్రైవేట్ ట్రిప్‌లు ఎందుకు?" అని ఆయన నిలదీశారు. దీంతో కాష్ పటేల్‌పై సోషల్ మీడియాలో విమర్శల వెల్లువ మొదలైంది.

ఎఫ్‌బీఐ, కాష్ పటేల్ స్పందన: 'భద్రత', 'దేశభక్తి'

ఈ ఘటనపై ఎఫ్‌బీఐ అధికార ప్రతినిధి బెన్ విలియమ్సన్ స్పందిస్తూ, "భద్రతా కారణాల దృష్ట్యా డైరెక్టర్‌ ఎఫ్‌బీఐ విమానాన్ని ఉపయోగించారు. వ్యక్తిగత ప్రయాణాల విషయంలో కూడా నిర్దిష్ట పరిమితులు పాటించబడతాయి, ఆయనే ప్రయాణానికి అయ్యే వ్యక్తిగత ఖర్చులు భరిస్తారు" అని స్పష్టం చేశారు.

కాష్ పటేల్ ప్రతిస్పందన

తనపై వస్తున్న ఆరోపణలకు కాష్ పటేల్ సోషల్ మీడియాలో ఘాటుగా స్పందించారు. "ఈ ఆరోపణలు అసత్యం, రాజకీయంగా ప్రేరితమైనవి. నన్ను విమర్శించండి, కానీ నా వ్యక్తిగత జీవితం మీద దాడి చేయడం తగదు. అలెక్సిస్ నిజమైన దేశభక్తురాలు, నా జీవిత భాగస్వామి. ఆమె దేశానికి చేసిన సేవలు చాలా మందికి జీవితకాలంలో సాధ్యం కావు. ఎఫ్‌బీఐని పునర్నిర్మించడమే మా లక్ష్యం," అని ఆయన అన్నారు.

*లీక్‌పై ఆగ్రహం: సీనియర్ అధికారి రాజీనామా

ఈ విమాన ప్రయాణ వివరాలు మీడియాలో లీక్ కావడంపై కాష్ పటేల్ తీవ్ర అసహనం వ్యక్తం చేసినట్లు సమాచారం. ఈ వ్యవహారంలో ఎఫ్‌బీఐ విమాన విభాగ అధిపతి స్టీవెన్ పాల్మర్ రాజీనామా చేసినట్లు కూడా అమెరికా మీడియా నివేదికలు పేర్కొన్నాయి.

కాష్-అలెక్సిస్ సంబంధం: ప్రేమ, వదంతులు, కేసులు

కాష్ పటేల్ – అలెక్సిస్ విల్కిన్స్ ప్రేమకథ 2023 జనవరిలో మొదలైంది. ఇద్దరి మధ్య వయసు తేడా 19 ఏళ్లు. అలెక్సిస్‌పై గతంలో ఇస్రాయెల్ గూఢచారి అన్న ప్రచారం జరిగింది. ఆమె ఎప్‌స్టీన్ ఫైల్స్ విడుదలను అడ్డుకునేందుకు ప్రయత్నించిందని కైల్ సెరాఫిన్ ఆరోపించారు. ఈ ఆరోపణలపై అలెక్సిస్, కైల్ సెరాఫిన్‌పై 5 మిలియన్ డాలర్ల పరిహారం కోరుతూ పరువు నష్టం దావా వేసిన సంగతి తెలిసిందే.

తాజా విమాన ప్రయాణ వివాదం మరోసారి వారి సంబంధాన్ని వార్తలకెక్కించింది. ఈ విమర్శలను పట్టించుకోకుండా, "దేశ సేవే మా ప్రధాన ధ్యేయం" అంటూ కాష్ పటేల్ ముందుకు సాగుతున్నారు.