జీతం 15వేలు.. 30 కోట్ల ఆస్తులు.. అవినీతి గుమస్తా కథ

కర్ణాటకలో ₹15,000 జీతం తీసుకునే ఒక ప్రభుత్వ ఉద్యోగి, ఏకంగా ₹30 కోట్లకు పైగా ఆస్తులను కూడబెట్టుకోవడం రాష్ట్రంలో కలకలం రేపింది. ఈ గుమస్తా అవినీతి వెనుక ఉన్న ఒక భారీ కుంభకోణం ఇప్పుడు బయటపడింది. అతడి పేరు కలకప్ప నిడగుండి. ఇతను కర్ణాటక రూరల్ ఇన్‌ఫ్రాస్ట్రక్చర్ డెవలప్‌మెంట్ లిమిటెడ్‌ (KRIDL) లో క్లర్క్‌గా పనిచేశారు.

లోకాయుక్త దాడుల్లో బయటపడిన సంచలన విషయాలు

లోకాయుక్త అధికారులు కొప్పల్ జిల్లాలోని నిడగుండి నివాసాల్లో సోదాలు నిర్వహించారు. ఈ దాడుల్లో అవాక్కయ్యే విషయాలు బయటపడ్డాయి. అధికారులు నిడగుండికి చెందిన 24 ఇళ్లు, 4 ఫ్లాట్లు, 40 ఎకరాల వ్యవసాయ భూమిని గుర్తించారు. అంతేకాకుండా అతడి వద్ద 4 వాహనాలు, 350 గ్రాముల బంగారం, 1.5 కేజీల వెండి ఉన్నట్లు తేలింది. ఈ ఆస్తులన్నీ నిడగుండి కుటుంబ సభ్యుల పేర్లపై రిజిస్టర్ అయి ఉన్నాయి.

-భారీ కుంభకోణంపై అనుమానాలు

సాధారణంగా ఒక క్లర్క్‌కి ఇంత పెద్ద మొత్తంలో ఆస్తులు ఉండటం అసాధ్యం. దీని వెనుక పెద్ద కుంభకోణం దాగి ఉందని అధికారులు అనుమానిస్తున్నారు. ఈ వ్యవహారంలో నిడగుండితో పాటు, అప్పటి KRIDL ఇంజనీర్ జెడ్.ఎమ్. చిన్చోల్కర్ కూడా భాగమైనట్లు ఆరోపణలు వచ్చాయి. వీళ్లిద్దరూ కలిసి 96 అసంపూర్ణ ప్రాజెక్టులకు సంబంధించిన నకిలీ పత్రాలు సృష్టించి ₹72 కోట్లకు పైగా ప్రభుత్వ నిధులను పక్కదారి పట్టించారని అధికారులు భావిస్తున్నారు.

ఈ సంఘటనతో ప్రభుత్వ అధికారుల నిర్లక్ష్యం, అవినీతిపై పెద్ద ప్రశ్నలు తలెత్తుతున్నాయి. తక్కువ స్థాయి ఉద్యోగి ఇంత పెద్ద మొత్తంలో అక్రమాస్తులు ఎలా కూడగలిగాడు? ఇందులో ఇంకా ఎంతమంది అధికారులు, రాజకీయ నాయకులు ఉన్నారనే దానిపై సమగ్ర విచారణ జరగాల్సిన అవసరం ఉంది. అక్రమంగా సంపాదించిన ఈ ఆస్తులను ప్రభుత్వ ఖాతాలోకి తీసుకురావడమే లోకాయుక్త అధికారుల లక్ష్యం. ప్రజాధనాన్ని ఇలా దోచుకునే వారిపై కఠిన చర్యలు తీసుకోవాలని ప్రజలు డిమాండ్ చేస్తున్నారు.